ថ្ងៃ ពុធ ទី ២៩ ខែ មិថុនា ឆ្នាំ ២០២២

ល្បីល្បាញ​ថា​ កូនប្រុស​ចៅហ្វាយ​ខេត្តកណ្តាល​កាង​រថយន្ត​ដឹក​ខ្សាច់​ ដេប៉ូ​លក់​ខ្សាច់​ និង​បូម​ខ្សាច់​កក្រើក​ខេត្តកណ្តាល​ ដោយ​អាង​អំណាច​ឪពុក

​ប្រភព​ព័ត៌មាន​ពី​ប្រជាពលរដ្ឋ​រស់នៅ​តាម​ដង​ទន្លេបាសាក់​ ចាប់ពី​ក្រុង​តា​ខ្មៅ​រហូត​ដល់​ស្រុក​កៀនស្វាយ​ ស្រុក​ស្អាង​ និង​ស្រុក​កោះធំ​ ខេត្តកណ្តាល​ បាន​នាំ​គ្នា​បរិហារ​រិះគន់​ដោយ​ចំៗ​ទៅ​លើ​លោក​ ឈឿ​ន​ ប៊ុ​ន​ឆ​ន​ ជា​មន្ត្រី​នគរបាល​អន្តោប្រវេសន៍​ប្រចាំ​ច្រក​ទ្វារ​ជ្រៃ​ធំ​ និង​ត្រូវជា​កូនប្រុស​របស់​ឯកឧត្តម​ ផៃ​ ប៊ុ​ន​ឈឿ​ន​ អភិបាល​នៃ​គណៈ​អភិបាល​ខេត្តកណ្តាល​ ដែល​បាន​ចេញ​មុខ​កាង​រថយន្ត​ដឹក​ខ្សាច់​ សូ​ម្បី​តែ​ក្រុម​ជញ្ជីង​ថ្លឹង​រថយន្ត​ដឹក​លើស​ទម្ងន់​កម្រិត​កំណត់​ក៏​ខ្លបខ្លាច​មិន​ហ៊ាន​យក​លុយ​ដែរ​ កាង​ដេប៉ូ​លក់​ខ្សាច់​ចំនួន​៥​ទីតាំង​ និង​ធ្វើ​សកម្មភាព​រកស៊ី​បូម​ខ្សាច់​យ៉ាង​អនាធិបតេយ្យ​ មាន​ទូក​សា​ឡង់​បូម​ខ្សាច់​ចំនួន​៦​គ្រឿង​ធំៗ​ ឡើង​កក្រើក​ខេត្តកណ្តាល​ ដោយ​អាង​អំណាច​ឪពុក​ជា​ចៅហ្វាយខេត្ត​ ។​

​ប្រជាពលរដ្ឋ​បាន​រាយការណ៍​ឲ្យ​ដឹង​ថា​ លោក​ ឈឿ​ន​ ប៊ុ​ន​ឆ​ន​ បាន​ធ្វើ​សកម្មភាព​បូម​ខ្សាច់​យ៉ាង​អនាធិបតេយ្យ​បំផុត​នៅ​តាម​ដង​ទន្លេបាសាក់​ ចាប់ពី​ក្រុង​តា​ខ្មៅ​ រហូត​ដល់​ស្រុក​កៀនស្វាយ​ ស្រុក​ស្អាង​ និង​ស្រុក​កោះធំ​ ឡើង​កក្រើក​ខេត្តកណ្តាល​ទាំងមូល​ ដោយ​ប្រើប្រាស់​ទូក​សា​ឡង់​បូម​ខ្សាច់​ចំនួន​៦​គ្រឿង​ធំៗ​ ។​ លោក​ ឈឿ​ន​ ប៊ុ​ន​ឆ​ន​ បាន​កាង​ធ្វើ​ខ្នងបង្អែក​ឲ្យ​ដេប៉ូ​លក់​ខ្សាច់​ចំនួន​៥​កន្លែង​ គឺ​ទី​១​របស់​ឈ្មោះ​ ឡាំ​ ថេ​ង​,​ ទី​២​ឈ្មោះ​ ងួ​ន​ ស៊ី​ឡុ​ង​,​ ទី​៣​ឈ្មោះ​ ឌៀង​ សា​រ៉ា​ន់​,​ ទី​៤​ឈ្មោះ​ វ៉ា​ន់​ គ្រុយ​ មាន​ទីតាំង​ឋិត​នៅ​ភូមិ​លេខ​២​ ឃុំ​ស្វាយ​រលំ​ ស្រុក​ស្អាង​ និង​ទី​៥​ឈ្មោះ​ កេង​ វ​ណ្ណា​ ឋិត​នៅ​ទល់មុខ​សាលាសង្កាត់​តា​ខ្មៅ​ ក្រុង​តា​ខ្មៅ​ ខេត្តកណ្តាល​ ព្រមទាំង​មាន​មួយ​កន្លែង​ទៀត​ឋិត​នៅ​ឃុំ​សិ​ត្បូ​ ផង​ដែរ​ ។​

​មន្ត្រីរាជការ​បម្រើ​ការងារ​នៅ​សាលា​ខេត្តកណ្តាល​មួយ​ចំនួន​បាន​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ​ឲ្យ​ដឹង​ថា​ ទូក​សា​ឡង់​បូម​ខ្សាច់​ និង​ដេប៉ូ​លក់​ខ្សាច់​ដែល​កាង​ដោយ​លោក​ ឈឿ​ន​ ប៊ុ​ន​ឆ​ន​ នោះ​ សុទ្ធតែ​គ្មាន​ច្បាប់​អនុញ្ញាត​ពី​ក្រសួង​ ឬ​មន្ទីរ​ជំនាញ​អ្វី​ឡើយ​ គឺ​គ្រប់យ៉ាង​អាច​ធ្វើ​សកម្មភាព​ទៅ​បាន​ ដោយសារ​លោក​ ឈឿ​ន​ ប៊ុ​ន​ឆ​ន​ អាង​អំណាច​ឪពុក​របស់​ខ្លួន​ជា​ចៅហ្វាយ​ខេត្តកណ្តាល​   ​​     តែ​ម្តង​ ។​

​ក្រុម​ប្រជាពលរដ្ឋ​រស់នៅ​តាម​ដង​ទន្លេបាសាក់​ បាន​សម្តែង​នូវ​ការ​ព្រួយបារម្ភ​យ៉ាង​ខ្លាំង​ចំពោះ​សកម្មភាព​បូម​ខ្សាច់​របៀប​អនាធិបតេយ្យ​ទាំង​យប់​ទាំង​ថ្ងៃ​របស់​លោក​ ឈឿ​ន​ ប៊ុ​ន​ឆ​ន​ ដែល​អាច​បណ្តាល​ឲ្យ​លំនៅ​ឋាន​របស់​ពួក​គាត់​ធ្លាក់​ចូល​ទៅ​ក្នុង​ទឹកទន្លេ​ ដោយ​មហន្តរាយ​បាក់​ដី​ច្រាំង​ទន្លេ​ ខណៈ​រដូវវស្សា​ទឹកទន្លេ​កំពុង​តែ​ហក់​ឡើ់ង​ស្រឺ​តៗ​នោះ​ ។​

​ពាក់ព័ន្ធ​នឹង​សកម្មភាព​ធ្វើ​អាជីវកម្ម​បូម​ខ្សាច់​យ៉ាង​អនាធិបតេយ្យ​របស់​លោក​ ឈឿ​ន​ ប៊ុ​ន​ឆ​ន​ នោះ​ ក្រុម​ប្រជាពលរដ្ឋ​ដែល​មាន​លំនៅ​ឋាន​តាម​ដង​ទន្លេបាសាក់​ បាន​អះអាង​ឲ្យ​ដឹង​ថា​ ពួក​គាត់​ធ្លាប់​បាន​ដាក់​ពាក្យបណ្តឹង​ទៅ​អាជ្ញាធរ​ដែនដី​សុំ​ការ​អន្តរាគមន៍​ដែរ​ ប៉ុន្តែ​គ្មាន​ទទួល​បាន​លទ្ធផល​ជា​ផ្លែផ្កា​អ្វី​ទេ​ គឺ​មាន​តែ​ទទួល​បាន​នូវ​ការ​គំរាមកំហែង​ និង​ប្រមាថ​តប​ពី​មនុស្ស​ជា​ដៃជើង​បរិវា​របស់​ឈ្មោះ​ ឈឿ​ន​ ប៊ុ​ន​ឆ​ន​ ទៅ​វិញ​ប៉ុណ្ណោះ​ ។​

​ប្រជាពលរដ្ឋ​ទាំងនោះ​បាន​សំណូមពរ​ចំពោះ​ឯកឧត្តម​ លឹ​ម​ គាន​ហោ​ រដ្ឋមន្ត្រីក្រសួង​ធនធានទឹក​ និង​ឧតុនិយម​ និង​ជា​ប្រធាន​គណៈកម្មាធិការ​គ្រប់គ្រង​ធនធាន​ខ្សាច់​នៅ​កម្ពុជា​ មេត្តា​ធ្វើការ​ស៊ើបអង្កេត​ និង​មាន​វិធានការ​ទៅ​លើ​សកម្មភាព​បូម​ខ្សាច់​យ៉ាង​អនាធិបតេយ្យ​របស់​លោក​ ឈឿ​ន​ ប៊ុ​ន​ឆ​ន​ ត្រូវជា​កូនប្រុស​របស់​ឯកឧត្តម​ ផៃ​ ប៊ុ​ន​ឈឿ​ន​ អភិបាល​នៃ​គណៈ​អភិបាល​ខេត្តកណ្តាល​នោះ​ផង​ ។​

​ជុំវិញ​ការ​ចោទប្រកាន់​ពី​សំណាក់​ក្រុម​ប្រជាពលរដ្ឋ​រស់នៅ​តាម​ដង​ទន្លេបាសាក់​ទៅ​លើ​សកម្មភាព​បូម​ខ្សាច់​ កាង​រថយន្ត​ដឹក​ខ្សាច់​ និង​កាង​ដេប៉ូ​លក់​ខ្សាច់​របស់​លោក​ ឈឿ​ន​ ប៊ុ​ន​ឆ​ន​ នោះ​ គេហទំព័រ​សារព័ត៌មាន​ដើម​ត្នោត​មិន​ទាន់​អាច​សុំ​ការ​បំភ្លឺ​បញ្ជាក់​ពី​លោក​ ឈឿ​ន​ ប៊ុ​ន​ឆ​ន​ បាន​នៅឡើយ​ទេ​ គិត​ត្រឹម​ថ្ងៃ​សៅរ៍​ ទី​២៣​ ខែសីហា​ ឆ្នាំ​២០១៤​នេះ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.