ថ្ងៃ ពុធ ទី ២៩ ខែ មិថុនា ឆ្នាំ ២០២២

បទល្មើស​ដឹកជញ្ជូន​ឈើ​ប្រណីត​ចាប់ផ្តើម​កម្រើក​ឡើងវិញ ក្រោយ​ទីផ្សារ​ឈើ​ស្រុក​យួន​បើកចំហ​

​សកម្មភាព​ដឹកជញ្ជូន​ឈើ​ប្រណីត​ល្មើសច្បាប់​នៅ​ខេត្តកំពង់ធំ បានចាប់ផ្តើម​កម្រើក​សាជាថ្មី​ឡើងវិញ​ហើយ បន្ទាប់ពី​ទីផ្សារ​ឈើ​នៅ​ប្រទេស​វៀតណាម បាន​បើកចំហ​នា​រយៈពេល​កន្ល​ង​ទៅ​ថ្មីៗ​នេះ ខណៈដែល​កងកម្លាំង​សមត្ថកិច្ច​មាន​តួនាទី​បង្ក្រាប​បទល្មើស​ព្រៃ​ឈើ ហាក់ដូចជា ព្រងើយកន្តើយ​មើលរំលង​ទៅវិញ និង​លើសពីនេះ មាន​សមត្ថកិច្ច​មួយចំនួន​បាន​បណ្តោយ​ខ្លួន​ឲ្យ​ជាប់​ពាក់ព័ន្ធ​យ៉ាងជ្រៅ​ក្នុង​រឿង​បទល្មើស​ព្រៃឈើ​នោះ​ទៀតផង ដើម្បី​តែ​ផលប្រយោជន៍​ផ្ទាល់ខ្លួន និង​បក្ខពួក​។​

​មជ្ឈដ្ឋាន​ប្រជាពលរដ្ឋ​រស់នៅ​ខេត្តកំពង់ធំ បាន​និយាយ​ឲ្យ​ដឹងថា ពេលខ្លះ​ប្រជាពលរដ្ឋ​ដែល​បានឃើញ​ករណី​រថយន្ត​ដឹកជញ្ជូន​ឈើ​ខុសច្បាប់​ក៏បាន​ទូរស័ព្ទ​ប្រាប់​ទៅ​សមត្ថកិច្ច​ជំនាញ​រដ្ឋបាល​ព្រៃឈើ ដែលមាន​តួនាទី​បង្ក្រាប​បទល្មើស​ច​ល័ត​តាម​ដងផ្លូវ បែរជា​មេព្រៃ​ឆ្លើយថា «​អត់​ឃើញ​» លុះដល់​ពេលខ្លះ​បទល្មើស​នៅ​នឹង​មុខ​បែរជា​មេព្រៃ​ឆ្លើយថា «​អត់​មាន​កម្លាំង​» និង​ពេលខ្លះទៀត​មាន​ទូរស័ព្ទ​បញ្ជា​ពី​លោក​ព្រះរាជអាជ្ញា​អម​សាលាដំបូង​ខេត្តកំពង់ធំ​ក៏ដោយ ក៏​លោក​មេព្រៃ​កំពង់ថ្ម​ឆ្លើយថា «​ដេញចាប់​អត់​បាន​» (Sic!)​។​

​មន្ត្រីរាជការ​បម្រើការ​ងារ​នៅ​សាលាខេត្ត​កំពង់ធំ​ដែល​ជិត​ចូលនិវត្តន៍​ម្នាក់​បាន​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ​ឲ្យ​ដឹងថា លទ្ធផល​នៃ​ការបង្ក្រាប​បទល្មើស​ព្រៃឈើ​នៅ​ខេត្តកំពង់ធំ មិនសូវមាន​ប្រសិទ្ធភាព​ទេ ហើយ​បើ​មាន​ក៏មាន​មួយគ្រាៗ​ប៉ុណ្ណោះ ដើម្បី​បង្ហាញ​យក​ស្នាដៃ​ថត​ដាក់​ទូរទស្សន៍ និង​ចុះផ្សាយ​តាម​កាសែត ពីព្រោះ​សមត្ថកិច្ច​ពាក់ព័ន្ធ​បាន​ចងក្រង​គ្នា​ប្រព្រឹត្ត​អំពើពុករលួយ​ទទួល​លុយកាក់ និង​ផលប្រយោជន៍​ប្រចាំខែ ពី​ឈ្មួញ​ឈើ​ជា​ប្រព័ន្ធ​ទៅហើយ ពោលគឺ​ទាំង​ស្គរ ទាំង​ប៉ី ទាំង​មន្ត្រី​តូច ទាំង​មន្ត្រី​ធំ ជាពិសេស អង្គភាព​នគរបាល និង​អង្គភាព​ជំនាញ​មេព្រៃ សុទ្ធ​តែមាន​បាតដៃ​ប្រឡាក់ប្រឡូស​នឹង​លុយកាក់​របស់​ក្រុម​ឈ្មួញ​ឈើ​សឹង​ទាំងអស់​។​

​សូម​អង្គភាព​ប្រឆាំង​អំពើពុករលួយ ដែលមាន​ឯកឧត្តម​បណ្ឌិត​ទេសរដ្ឋមន្ត្រី ឱម យ៉ិនទៀង ជា​ប្រធាន​មេត្តា​ចាត់វិធានការ​ទៅលើ​អំពើពុករលួយ​ពាក់ព័ន្ធ​នឹង​បទល្មើស​ព្រៃឈើ​នៅ​កម្ពុជា​ផង ពីព្រោះ​ភ្នំ​មួយចំនួន​ឬ​ភាគច្រើន​ក្លាយជា​ត្រងោល ឬ​ទំពែក​អស់​ព្រៃ​ដុះ​លម្អ​ទៀតហើយ​៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.