ថ្ងៃ ពុធ ទី ២៥ ខែ ឧសភា ឆ្នាំ ២០២២

បទល្មើស​ព្រៃឈើ​កើតឡើង​កក្រើក​ខេត្តសៀមរាប​ តែ​មិន​ភ្ញាក់ផ្អើល​រំខាន​ដល់​សមត្ថកិច្ច​បន្តិច​ឡើយ​

​បទល្មើស​ព្រៃឈើ​ដែល​ត្រូវ​បាន​ដឹក​ជញ្ជូន​យ៉ាង​អនាធិបតេយ្យ​ចេញពី​ស្រុក​ស្វាយ​លើ​ បាន​កើតឡើង​កក្រើក​ខេត្តសៀមរាប​ តែ​មិន​បង្ក​ឲ្យ​មានការ​ភ្ញាក់ផ្អើល​រំខាន​ដល់​សមត្ថកិច្ច​ពាក់ព័ន្ធ​ ជា​ពិសេស​រដ្ឋបាល​ព្រៃឈើ​ស្រុក​ស្វាយ​លើ​បន្តិច​ណា​ឡើយ​ ហើយ​ត្រូវ​បាន​មជ្ឈដ្ឋាន​ប្រជាពលរដ្ឋ​សង្ស័យ​ថា​ ក្រុម​សមត្ថកិច្ច​ទាំងនោះ​ត្រូវ​ថ្នាំ​សណ្តំ​សញ្ញា​ម៉ាក​ "$"​ ផលិត​នៅ​សហរដ្ឋអាមេរិក​ ទើប​គ្រប់​គ្នា​ងាប់​ត្រគាក​ស្តូក​កម្រើក​លែង​រួច​បែប​នេះ​ ។​

​ព័ស្តុតាង​ជាក់ស្តែង​មួយ​ក្នុង​ចំណោម​ព័ស្តុតាង​ជា​ច្រើន​ទៀត​ គឺ​កាលពី​វេលា​ម៉ោង​២១​និង​៣០​នាទី​រាត្រី​ថ្ងៃ​ទី​១៣​ ខែសីហា​ ឆ្នាំ​២០១៤​កន្លង​ទៅ​ មាន​គោ​យន្ត​ចំនួន​៣​គ្រឿង​ បាន​ដឹក​ជញ្ជូន​ឈើ​ប្រភេទ​លេខ​២​តាម​ផ្លូវជាតិ​លេខ​២១០​ មក​កាន់​ស្រុក​ស្វាយ​លើ​ ដោយ​បុរស​ឈ្មោះ​ ជិន​ ស្នា​ អាយុ​២៣​ឆ្នាំ​ និង​បុរស​ឈ្មោះ​ លួ​ន​ ផុស​ អាយុ​១៨​ឆ្នាំ​ មាន​ទីលំនៅ​ភូមិ​ត្រពាំង​ស្វាយ​ ឃុំ​ស្វាយ​លើ​ ស្រុក​ស្វាយ​លើ​ ខេត្តសៀមរាប​ ប្រគល់​ឲ្យ​ទៅ​ថៅកែ​ឈ្មោះ​ ទក​ និង​ឈ្មោះ​ ឈុត​ ខណៈ​មាន​មួយ​ក្រុម​ទៀត​បាន​ដឹក​ជញ្ជូន​ឈើ​លេខ​១​ ដោយ​បុរស​ឈ្មោះ​ ហង​ ហ៊ុន​ អាយុ​២៥​ឆ្នាំ​ មាន​ទីលំនៅ​ភូមិ​លំ​ទូក​ ឃុំ​ស្វាយ​លើ​ ស្រុក​ស្វាយ​លើ​ ខេត្តសៀមរាប​ ប្រគល់​ឲ្យ​ទៅ​ថៅកែ​ឈ្មោះ​ សិលា​ យ៉ាង​ហ៊ឺហា​ គ្មាន​ការ​រំខាន​ដល់​សមត្ថកិច្ច​ពាក់ព័ន្ធ​ណាមួយ​ឡើយ​ ។​

​ក្រុម​ប្រជាពលរដ្ឋ​បាន​បង្ហើប​បណ្តាញ​អ្នក​សារព័ត៌មាន​ថា​ មន្ត្រី​រដ្ឋបាល​ព្រៃឈើ​ស្រុក​ស្វាយ​លើ​ដែល​បាន​សហការ​គ្នា​យ៉ាង​ស្អិត​ល្មួត​ជាមួយ​កងកម្លាំង​យោធា​ភូមិភាគ​៤​ ឈរជើង​នៅ​ចំណុច​ផ្លូវបំបែក​ទៅ​ត្រពាំង​ប្រាសាទ​ ដើម្បី​ការពារ​ព្រៃឈើ​ពូជ​នោះ​ បាន​យក​លុយ​ប្រចាំ​ថ្ងៃ​ពី​៤​ម៉ឺន​រៀល​ទៅ​៥​ម៉ឺន​រៀល​ក្នុង​១​គោ​យន្ត​ពី​ប្រជាពលរដ្ឋ​ដែល​ចូល​ទៅ​ដឹកឈើ​ចេញពី​តំបន់​ព្រៃ​ពូជឈើ​ទាំងនោះ​ ។​

​សូម​ឯកឧត្តម​រដ្ឋមន្ត្រី​ក្រសួងកសិកម្ម​ រុក្ខា​ប្រមាញ់​ និង​នេសាទ​ និង​ឯកឧត្តម​ប្រតិភូ​រាជរដ្ឋាភិបាល​ទទួល​បន្ទុក​ជា​ប្រធាន​រដ្ឋបាល​ព្រៃឈើ​ មេត្តា​ចុះ​ស៊ើបអង្កេត​ និង​មាន​វិធានការ​ទៅ​លើ​ករណី​បទល្មើស​ព្រៃឈើ​ដែល​កើតឡើង​កក្រើក​ខេត្តសៀមរាប​នោះ​ផង​ ដ្បិត​សមត្ថកិច្ច​ថ្នាក់​ក្រោម​ត្រូវ​ថ្នាំ​សណ្តំ​ឈ្មួញ​ឈើ​សញ្ញា​ម៉ាក​ "$"​ ផលិត​នៅ​សហរដ្ឋអាមេរិក​អស់ហើយ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.