ថ្ងៃ ពុធ ទី ២៩ ខែ មិថុនា ឆ្នាំ ២០២២

រត់ប្រណាំង​ Marathon​ ចក្រភព​អង្គរ​លើក​ទី​១​បាន​បញ្ចប់​ជាមួយនឹង​កីឡាករ​ជិត​៣​ពាន់​នាក់​មក​ពី​៤២​ប្រទេស​ចូលរួម​

​រត់ប្រណាំង​ Marathon​ ចក្រភព​អង្គរ​លើក​ទី​១​ ឆ្នាំ​២០១៤​ ដែល​ជា​ព្រឹត្តិការណ៍​កីឡា​ទេសចរណ៍​ដ៏​មាន​សារៈសំខាន់​ប្រចាំឆ្នាំ​នៅ​លើ​ទឹកដី​ខេត្តសៀមរាប​ កាលពី​ថ្ងៃអាទិត្យ​ ទី​១៧​ ខែសីហា​ ឆ្នាំ​២០១៤​ម្សិលមិញ​នេះ​ ក្រោម​អធិបតីភាព​ឯកឧត្តម​បណ្ឌិត​ ថោ​ង​ ខុន​ រដ្ឋមន្ត្រី​ក្រសួងទេសចរណ៍​និង​ជា​ប្រធាន​គណៈកម្មាធិការ​ជាតិ​អូ​ឡាំ​ពិ​ក​កម្ពុជា​(NOCC)​ បាន​បិទ​បញ្ចប់​ដោយ​ជោគជ័យ​ ជាមួយនឹង​ក្រុម​កីឡាករ​ចំនួន​២.៦៣០​នាក់​(​បរទេស​១.២៥០​នាក់​ និង​កម្ពុជា​១.៣៧០​នាក់​)​មក​ពី​៤២​ប្រទេស​ចូលរួម​ ។​

​ឯកឧត្តម​បណ្ឌិត​ ថោ​ង​ ខុន​ បាន​មាន​ប្រសាសន៍​បញ្ជាក់​ថា​ "​តាម​បច្ចេកទេស​កីឡា​ គឺ​បុព្វបុរស​ខ្មែរ​បាន​កសាង​អង្គរ​ដោយ​បន្សល់​ទុក​នូវ​លក្ខណៈ​បច្ចេកទេស​ត្រឹមត្រូវ​ឥត​ខ្ចោះ​នៃ​ចម្ងាយ​ផ្លូវ​រត់​តាម​ស្តង់ដារ​កីឡា​រួច​ជា​ស្រេច​ គឺ​ពា​ក់ណ្តាល​ Marathon​ ២១​គីឡូម៉ែត្រ​ រត់​ជុំវិញ​វង់​តូច​អង្គរ​ និង​ Marathon​ ៤២,១៩៥​គីឡូម៉ែត្រ​ រត់​ជុំវិញ​វង់​ធំ​អង្គរ​។​ លក្ខណៈ​ធម្មជាតិ​ និង​លក្ខណៈ​វិទ្យាសាស្ត្រ​ទីតាំង​នេះ​ បាន​នាំ​មក​នូវ​ការ​ទាក់ទាញ​ភ្ញៀវ​ទេសចរ​យ៉ាងច្រើន​បំផុត​  ដូច្នេះ​ កីឡា​ និង​ទេសចរណ៍​ មិន​អាច​ឋិត​នៅ​ឆ្ងាយ​ពី​គ្នា​បាន​ទេ​ "​ ។​

​ដោយឡែក​ ឯកឧត្តម​ វ៉ា​ត់​ ចំរើន​ អនុរដ្ឋលេខាធិការ​ក្រសួងទេសចរណ៍​ អគ្គលេខាធិការ​គណៈកម្មាធិការ​ជាតិ​អូ​ឡាំ​ពិ​ក​កម្ពុជា​ (NOCC)​ និង​ជា​គណៈកម្មការ​គ្រប់គ្រង​ការ​ប្រកួត​បាន​ថ្លែង​ឲ្យ​ដឹង​ថា​ "​សកម្មភាព​កីឡា​ដែល​ទទួល​បានការ​គាំទ្រ​បែប​នេះ​ ដោយសារ​យើង​មាន​ដៃគូ​សហការ​ពី​សហព័ន្ធ​ខ្មែរ​អត្តពលកម្ម​ស្ម​គ្រ័​ចិត្ត​ ពិសេស​ដៃគូ​ឧបត្ថម្ភ​ ដូច​ជា​ក្រុមហ៊ុន​ Cambrew​ Angkor​ Beer,​ Angkor​ Puro​ ,​ Pepsi​ ,​ ក្រុមហ៊ុន​ Smart,​ សណ្ឋាគារ​ Park​ Hyatte,​ Apsara​ Angkor​ និង​ Sokhalay​ Resort​ ដែល​តែងតែ​រួមចំណែក​ឧបត្ថម្ភ​គាំទ្រ​ព្រឹត្តិការណ៍​កីឡា​ទេសចរណ៍​ ដែល​ផ្តល់​អត្ត​ប្រយោជន៍​ដល់​សេវាកម្ម​ទេសចរណ៍​ផង​ និង​សេដ្ឋកិច្ចជាតិ​ផង​"​ ។​

​លទ្ធផល​រត់ប្រណាំង​ Marathon​ ចម្ងាយ​១០​គីឡូម៉ែត្រ​ ផ្នែក​បុរស​បាន​ទៅ​លើ​កីឡាករ​កម្ពុជា​ទាំងអស់​ដែល​ទទួល​បាន​ជ័យ​លា​ភី​ គឺ​ លេខ​១​ បាន​លើ​ គៀង​ សា​ម៉​ន​,​ លេខ​២​ បាន​លើ​ គង់​ សីហា​ និង​លេខ​៣​ បាន​លើ​ ហម​ បញ្ញា​ ។​ រីឯ​ផ្នែក​នារី​ គឺ​លេខ​១​ បាន​លើ​ Sarah​ Hopkins​ មក​ពី​អង់គ្លេស​,​ លេខ​២​ បាន​លើ​ Hillary​ Acer​ មក​ពី​អា​មេ​រិ​ក​ និង​លេខ​៣​ បាន​លើ​ Rence​ Hulsmann​ មក​ពី​កា​ណា​ដា​ ។​

​រត់​ពាក់កណ្តាល​ Marathon​ ចម្ងាយ​២១​គីឡូម៉ែត្រ​ ផ្នែក​បុរស​ គឺ​លេខ​១​ បាន​លើ​ Marjin​ Vander​ មក​ពី​ហូល្ល​ង់​,​ លេខ​២​ បាន​លើ​ Simon​ Lorelly​ មក​ពី​បារាំង​ និង​លេខ​៣​ បាន​លើ​ Joss​ Vasquez​ មក​ពី​បារាំង​ ។​ រីឯ​ផ្នែក​នារី​ គឺ​លេខ​១​ បាន​លើ​ Camilla​ Munch​ Nielsen​ មក​ពី​ដា​ណឺ​ម៉ាក​ ,​ លេខ​២​ បាន​លើ​ Shumei​ Jia​ មក​ពី​ចិន​ និង​លេខ​៣​ បាន​លើ​ Petra​ Diener​ មក​ពី​អា​ល្លឺ​ម៉​ង់​ ។​

​រត់​ Marathon​ ចម្ងាយ​៤២,១៩៥​គីឡូម៉ែត្រ​ ផ្នែក​បុរស​ គឺ​លេខ​១​ បាន​លើ​ Neko​ Hiroshi​ ជនជាតិ​ជប៉ុន​ សញ្ជាតិ​កម្ពុជា​ (​ជា​ម្ចាស់​ជើងឯក​តំណាង​ឲ្យ​កម្ពុជា​)​ លេខ​២​ បាន​លើ​ Ba​ Gan​ មក​ពី​ជប៉ុន​ និង​លេខ​៣​ បាន​លើ​ Yann​ Defond​ មក​ពី​បារាំង​ ។​ រីឯ​ផ្នែក​នារី​ គឺ​លេខ​១​ បាន​លើ​ Veronique​ Messina​ មក​ពី​បារាំង​ (​ជា​ជើងឯក​នារី​ផ្នែក​ Marathon)​ លេខ​២​ បាន​លើ​ Wai​ Fong-Cham​ មក​ពី​ចិន​ និង​លេខ​៣​ បាន​លើ​ Marj​ Kauri​ មក​ពី​ហ្វាំ​ង​ឡង់​ ។​

​សូម​បញ្ជាក់​ជូន​ថា​ ព្រឹត្តិការណ៍​រត់ប្រណាំង​ Marathon​ ចក្រភព​អង្គរ​នេះ​ ត្រូវ​បាន​រាជរដ្ឋាភិបាល​កម្ពុជា​ដែល​មាន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ជា​នាយក​រដ្ឋមន្ត្រី​ សម្រេច​ឲ្យ​គណៈកម្មាធិការ​ជាតិ​អូ​ឡាំ​ពិ​ក​កម្ពុជា​ (NOCC)​រៀបចំ​ព្រឹត្តិការណ៍​កីឡា​ទេសចរណ៍​ស្តង់ដារ​កីឡា​រត់ប្រណាំង​ដ៏​ធំ​ឈ្មោះ​ថា​ "Angkor​ Empire​ Marathon"​ ដែល​នឹង​ប្រព្រឹត្ត​ធ្វើ​ជា​រៀង​រាល់​ឆ្នាំ​នា​ខែសីហា​នៅ​ខេត្តសៀមរាប​ ៕​

 

Filed in: Feature, កីឡា, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.