ថ្ងៃ អង្គារ ទី ៣០ ខែ វិច្ឆិកា ឆ្នាំ ២០២១

ប្រឡង​បាក់​ឌុ​ប​ឆ្នាំ​២០១៤​ដែល​ប្រព្រឹត្ត​ទៅ​ចំនួន​២​លើក​នឹង​ក្លាយជា​ប្រវត្តិសាស្ត្រ​ថ្មី​ក្នុង​សម័យ​គ្រប់គ្រង​អំណាច​របស់​បុរស​ខ្លាំង​

​ដោយ​មិន​មានការ​ផ្លាស់​ប្តូរ​ជំហរ​ទេ​ គឺ​រាជរដ្ឋាភិបាល​កម្ពុជា​ដែល​មាន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ជា​នាយក​រដ្ឋមន្ត្រី​ តាម​រយៈ​ក្រសួង​អប់រំ​ យុវជន​ និង​កីឡា​ ដែល​មាន​ឯកឧត្តម​បណ្ឌិត​ ហង់​ជួន​ ណា​រ៉ុ​ន​ ជា​រដ្ឋមន្ត្រី​ នឹង​រៀបចំ​ឲ្យ​មានការ​ប្រឡង​សញ្ញាបត្រ​មធ្យមសិក្សា​ទុតិយភូមិ​(​បាក់​ឌុ​ប​)​លើក​ទី​២​ ចំពោះ​សិស្ស​ជា​បេក្ខជន​ប្រឡង​ធ្លាក់​កាលពី​លើក​ទី​១​ (​កាលបរិច្ឆេទ​ប្រឡង​ថ្ងៃ​ទី​០៤-០៥​ ខែសីហា​ ឆ្នាំ​២០១៤)​ គ្រោង​ប្រព្រឹត្ត​ទៅ​នៅ​ថ្ងៃ​ទី​១៣-១៤​ ខែតុលា​ ឆ្នាំ​២០១៤​ខាង​មុខ​ ទោះបី​ទទួល​រង​នូវ​ការ​រិះគន់​ និង​មានការ​ផ្តល់​ជា​មតិយោបល់​ពី​មជ្ឈដ្ឋាន​ខាងក្រៅ​យ៉ាងណា​ក៏​ដោយ​ ។​ ដូច្នេះ​ ក្នុង​មួយ​ឆ្នាំ​នឹង​មានការ​ប្រឡង​បាក់​ឌុ​បរ​ហូត​ដល់​ទៅ​ចំនួន​២​លើក​ ដោយ​មាន​កាលបរិច្ឆេទ​ប្រឡង​ខុស​គ្នា​ ខណៈ​សិស្ស​ជា​បេក្ខជន​ប្រឡង​ជាប់​ទទួល​បាន​សញ្ញាបត្រ​បាក់​ឌុ​ប​ដូច​គ្នា​ ដែល​ក្នុង​ពិភពលោក​យើង​នេះ​ទំនងជា​គ្មាន​ប្រទេស​ណាមួយ​អនុវត្តន៍​ដូច​កម្ពុជា​ ជា​"​ព្រះរាជាណាចក្រ​អច្ឆរិយៈ​"​របស់​បុរស​ខ្លាំង​ឡើយ​ ។​

​ការ​អះអាង​របស់​ក្រសួង​អប់រំ​ យុវជន​ និង​កីឡា​ ដែល​ថា​ ទុក​ឱកាស​ឲ្យ​សិស្ស​ជា​បេក្ខជន​ប្រឡង​ធ្លាក់​នា​សម័យ​ប្រឡង​លើក​ទី​១​ បាន​ត្រៀមខ្លួន​ប្រឹងប្រែង​រៀនសូត្រ​សម្រាប់​ការ​ប្រឡង​លើក​ទី​២​ ក្រោម​ការ​បំប៉ន​បន្ថែម​ពី​គ្រូបង្រៀន​ចាត់ចែង​ពី​សំណាក់​ក្រសួង​ក៏​ដោយ​ ក៏​គេ​អាច​កាត់​យល់​បាន​ថា​ គឺ​បុរស​ខ្លាំង​មាន​បំណង​ចង់​ស្រោចស្រង់​ឲ្យ​សិស្ស​បាន​ជាប់​ច្រើន​ ជាង​ការ​ប្រឡង​លើក​ទី​១​ តាម​ការ​បន្ធូរបន្ថយ​វិញ្ញាសា​ប្រឡង​កុំ​ឲ្យ​តឹងតែង​ ឬ​ពិបាក​ពេក​ចំពោះ​ការ​ប្រឡង​លើក​ទី​២​ខាង​មុខ​ ក្នុង​ន័យ​រំលេច​ឲ្យ​ឃើញ​អំពី​ការ​យកចិត្តទុកដាក់​របស់​បុរស​ខ្លាំង​ចំពោះ​សិស្សានុសិស្ស​ជា​បេក្ខជន​ប្រឡង​ និង​ផ្គាប់ចិត្ត​ដល់​ថៅកែ​សាកលវិទ្យាល័យ​ដែល​ព្រួយបារម្ភ​ខ្លាច​សាលា​ដួល​រលំ​ ដោយ​គ្មាន​សិស្ស​ចូល​រៀន​ផង​ ។​

​ពាក្យស្លោក​"​អ្នកចេះ​ គឺ​ជាប់​"​ របស់​ឯកឧត្តម​បណ្ឌិត​ ហង់​ជួន​ ណា​រ៉ុ​ន​ រដ្ឋមន្ត្រីក្រសួង​អប់រំ​ យុវជន​ និង​កីឡា​ លែង​សូវ​មាន​ន័យ​ខ្លឹមសារ​ ការ​ប្រឹងប្រែង​ដ៏​ស្វាហាប់​របស់​មន្ត្រី​អង្គភាព​ប្រឆាំង​អំពើ​ពុក​លួ​យ​(ACU)​ ចូលរួម​សង្កេតការណ៍​ជាមួយ​ក្រសួង​អប់រំ​ យុវជន​ និង​កីឡាករ​នា​សម័យ​ប្រឡង​លើក​ទី​១​ ក្លាយជា​ឥតប្រយោជន៍​ ឪពុក​ម្តាយ​ អាណាព្យាបាល​សិស្ស​ដែល​ខិតខំ​រៀនសូត្រ​ និង​អ្នកគ្រូ​ លោកគ្រូ​ បុគ្គលិក​សិក្សា​ដែល​ប្រឹងប្រែង​អនុវត្តន៍​តាម​បញ្ញត្តិ​របស់​ក្រសួង​អប់រំ​ យុវជន​ និង​កីឡា​ នា​ពេល​ប្រឡង​លើក​ទី​១​ ទទួល​រង​នូវ​ការ​បាក់ទឹកចិត្ត​ ថវិកាជាតិ​ត្រូវ​បាន​ចំណាយ​មួយ​លើក​ទៀត​ សម្រាប់​ការ​ប្រឡង​នៅ​លើក​ទី​២​ (​ប្រឡង​លើក​ទី​១​បាន​ចំណាយ​ថវិកាជាតិ​អស់​ប្រមាណ​៤​លាន​ដុល្លារ​អា​មេ​រិ​ក​)​ ។​

​លទ្ធផល​នៃ​ការ​ប្រឡង​សញ្ញាបត្រ​មធ្យមសិក្សា​ទុតិយភូមិ​(​បាក់​ឌុ​ប​)​ លើក​ទី​១​ដែល​មាន​បេក្ខជន​ប្រឡង​ជាង​៩​ម៉ឺន​នាក់​នោះ​ នឹង​ត្រូវ​ប្រកាស​នៅ​ថ្ងៃ​ទី​២៩​ ខែសីហា​ ឆ្នាំ​២០១៤​ខាង​មុខ​ នៅ​រាជធានី​ភ្នំពេញ​ និង​នៅ​ថ្ងៃ​ទី​៣០​ ខែសីហា​ ឆ្នាំ​២០១៤​ នៅ​មណ្ឌល​ប្រឡង​តាម​បណ្តា​ខេត្ត​នានា​ ។​

​រួម​សេចក្តី​មក​ ការ​ប្រឡង​បាក់​ឌុ​ប​ឆ្នាំ​២០១៤​ដែល​ប្រព្រឹត្ត​ទៅ​ចំនួន​២​លើក​  ធ្វើ​ឲ្យ​រវល់​ដល់​មន្ត្រី​ពាក់ព័ន្ធ​ចំនួន​២​លើក​ បេក្ខជន​ប្រឡង​ចំនួន​២​លើក​(​ចំពោះ​បេក្ខជន​ប្រឡង​ធ្លាក់​លើក​ទី​១)​ ចំណាយ​ថវិកាជាតិ​ និង​ថវិកា​របស់​សាមី​បេក្ខជន​ប្រឡង​អស់​ចំនួន​២​លើក​…​នឹង​ក្លាយទៅជា​ប្រវត្តិសាស្ត្រ​ថ្មី​មួយ​ក្នុង​សម័យ​គ្រប់គ្រង​អំណាច​របស់​បុរស​ខ្លាំង​ធ្វើ​ជា​នាយ​រដ្ឋមន្ត្រី​ព្រះរាជាណាចក្រ​កម្ពុ​ជាទី​២​ គឺ​បេក្ខជន​ប្រឡង​ជាប់​ទ​ទូល​បាន​សញ្ញាបត្រ​បាក់​ឌុ​ប​ដូច​គ្នា​ ប៉ុន្តែ​មាន​កាលបរិច្ឆេទ​ប្រឡង​ខុស​គ្នា​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.