ថ្ងៃ ពុធ ទី ២៩ ខែ មិថុនា ឆ្នាំ ២០២២

ស្លាក​លេខទោ​ចក្រយានយន្ត​ទើប​ចេញ​ថ្មី​ដោយ​យុវវ័យ​សម័យ​វង្វេង​នឹង​ពាក្យ​ Kikilu”​គី​.​គី​.​លូ​”

​ពិតជា​គួរ​ឲ្យ​ភ្ញាក់ផ្អើល​ និង​ហួសចិត្ត​ពន់ពេក​ នៅ​ពេល​ដែល​បានឃើញ​ក្រុម​យុវជន​ស្ទាវៗ​មួយ​ចំនួន​បាន​ក្លែង​ស្លាក​លេខ​បំពាក់​លើ​ទោចក្រយានយន្ត​របស់​ខ្លួន​ ទៅ​ជា​រឿង​លេងសើច​កំប្លុកកំប្លែង​ ធ្វើ​ចរាចរណ៍​តាម​ដងផ្លូវ​សាធារណៈ​ បង្អួត​ភ្នែក​សមត្ថកិច្ច​នគរបាល​ចរាចរណ៍​ នៅ​ក្នុងភូមិ​សាស្ត្រ​ខេត្តបាត់ដំបង​ ដោយ​ដាក់​ថា​ "​ហាម​សើច​,​ ល្ងាច​ដើរ​លេង​ និង​ គី​.​គី​.​លូ​…"​ ។​

​ប្រភព​ព័ត៌មាន​ពី​មន្ត្រី​នគរបាល​ចរាចរណ៍​ផ្លូវគោក​ខេត្តបាត់ដំបង​ បាន​ឲ្យ​ដឹង​ថា​ ក្រុម​យុវជន​ស្ទាវៗ​ដែល​ប្រើប្រាស់​ស្លាក​លេខទោ​ចក្រយានយន្ត​ក្លែង​ចេញ​ដោយ​ខ្លួនឯង​ ធ្វើ​ចរាចរណ៍​តាម​ផ្លូវ​សាធារណៈ​ទាំងនោះ​ ត្រូវ​សមត្ថកិច្ច​ចាប់​បាន​យក​មក​ធ្វើការ​អប់រំ​ និង​តម្រូវ​ឲ្យ​ដោះ​ស្លាក​លេខ​ផ្តេសផ្តាស​ចោល​ ហើយ​ក៏​អនុញ្ញាត​ឲ្យ​វិល​ត្រឡប់​ទៅ​ផ្ទះ​វិញ​ ដោយ​មិន​មានការ​ដាក់ទោស​ទណ្ឌ​អ្វី​ទេ​ (Sic​ !)​ ។​

​ប្រជាពលរដ្ឋ​រស់នៅ​ខេត្តបាត់ដំបង​ បាន​និយាយ​ឲ្យ​ដឹង​ថា​ ក្រុម​យុវជន​ស្ទាវៗ​ដែល​ប្រើប្រាស់​ស្លាក​លេខទោ​ចក្រយានយន្ត​ផ្តេសផ្តាស​ច្នៃ​ចេញ​ដោយ​ចិត្ត​ឯង​នោះ​ គឺ​សុទ្ធតែ​ជា​កូនចៅ​របស់​អ្នកមាន​អំណាច​ អ្នកធំ​ និង​អ្នកមាន​លុយកាក់​ក្នុង​ខេត្តបាត់ដំបង​ ទើប​ពួក​គេ​ហ៊ាន​ប្រព្រឹត្ត​ផ្គើន​នឹង​ច្បាប់​ចរាចរណ៍​ផ្លូវគោក​បែប​នេះ​ ។​

​មន្ត្រីរាជការ​ចូល​និវត្តន៍​ដែល​រស់នៅ​ខេត្តបាត់ដំបង​ម្នាក់​ បាន​និយាយ​របៀប​កំប្លែង​លេង​ថា​ ក្រុម​យុវជន​ទាំងនោះ​ពាក់​ស្លាក​លេខ​ម៉ូតូ​ដាក់​ថា​ "​ហាម​សើច​"​ ត្រូវ​ប៉ូលិស​ចាប់​បាន​ ហើយ​ដោះ​លែង​វិញ​ ដូច្នេះ​បើ​ថ្ងៃក្រោយ​ទៀត​ ក្រុម​យុវជន​ដដែល​ ឬ​ក្រុម​យុវជន​ផ្សេងៗ​ពាក់​ស្លាក​លេខ​ម៉ូតូ​ដាក់​ថា​ "​ហាម​ចាប់​ខ្ញុំ​"​ គឺ​ទំនងជា​ប៉ូលិស​លែង​ហ៊ាន​ចាប់​ហើយ​មើលទៅ​ ។​

​មជ្ឈដ្ឋាន​អ្នក​ច្បាប់​ឯករាជ្យ​នៅ​កម្ពុជា​បាន​លើក​ឡើង​ថា​ ការ​អនុវត្ត​ច្បាប់​ពោរពេញ​ទៅ​ដោយ​ការ​រើសអើង​ មិន​ស្មើភាព​គ្នា​រវាង​អ្នកតូច​ និង​អ្នកធំ​ រវាង​អ្នកក្រ​ និង​អ្នកមាន​ គឺ​រូបភាព​អនាធិបតេយ្យ​ និង​ទំនើង​នានា​នឹង​កើត​មាន​ឡើង​ហើយ​ ដោយ​គ្មាន​អ្វី​ប្លែក​ទេ​ក្នុង​សង្គម​បច្ចុប្បន្ន​នេះ​ ។​

​អនុលោម​តាម​មាត្រា​៧៧​នៃ​ច្បាប់​ស្តី​ពី​ចរាចរណ៍​ផ្លូវគោក​ បាន​ចែង​ថា​ "​ជន​ណា​បាន​ប្រើប្រាស់​ប័ណ្ណបើកបរ​ ប័ណ្ណ​សម្គាល់​យាន​ ស្លាក​លេខ​សម្គាល់​យាន​ ឬ​លិខិតអនុញ្ញាត​ផ្សេងៗ​ ដោយ​ដឹង​ថា​ជា​វត្ថុ​ក្លែងក្លាយ​ និង​ជន​ក្លែង​ប័ណ្ណបើកបរ​ ប័ណ្ណ​សម្គាល់​យាន​ ឬ​លិខិតអនុញ្ញាត​ផ្សេងៗ​ ដើម្បី​ចរាចរ​យាន​ ត្រូវ​ផ្តន្ទាទោស​ដាក់​ពន្ធនាគារ​ពី​២​ឆ្នាំទៅ​៥​ឆ្នាំ​ ឬ​/​និង​ផ្តន្ទា​ទោសពិន័យ​ជា​ប្រាក់​ពី​៤​លាន​រៀល​ ទៅ​១០​លាន​រៀល​"​ ដូច្នេះ​ ការណ៍​ដែល​សមត្ថកិច្ច​នគរបាល​ចរាចរណ៍​ផ្លូវគោក​ខេត្តបាត់ដំបង​ ដែល​ចាប់​ក្រុម​យុវជន​ពាក់​ស្លាក​លេខទោ​ចក្រយានយន្ត​ក្លែង​ រួច​ហើយ​ដោះ​លែង​វិញ​ដោយ​មិន​មានការ​កសាង​សំណុំរឿង​បញ្ជូន​ទៅ​តុលាការ​ឲ្យ​ផ្តន្ទាទោស​តាម​ច្បាប់​នោះ​ គឺ​ធ្វើ​ឲ្យ​មជ្ឈដ្ឋាន​នានា​សង្ស័យ​ថា​ សមត្ថកិច្ច​យ៉ាង​ហោច​ណាស់​ក៏​ទទួល​បាន​លុយ​ពី​ជនល្មើស​ក្នុង​ម្នាក់ៗ​ចំនួន​៤​លាន​រៀល​​​ ដាក់ក្នុងហោប៉ៅដែរ​ ៕​

Gang-Battambang-3 Gang-Battambang-1 Gang-BattambangGang-Battambang-2

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.