ថ្ងៃ ពុធ ទី ២៩ ខែ មិថុនា ឆ្នាំ ២០២២

ល្បី​ថា​មន្ទីរ​អប់រំ​ខេត្តបាត់ដំបង​ស៊ីដាច់​ប្រាក់​ឧបត្ថម្ភ​កីឡា​និង​ប្រាក់​ដំណើរ​លំហែ​និង​សិក្សា​របស់​សិស្ស​មិន​តិច​ជាង​១០០​លាន​រៀល​

​រឿងអាស្រូវ​ពុក​រលួយ​មួយ​ឈុត​ថ្មី​ទៀត​បាន​កើត​មាន​ឡើង​នៅ​មន្ទីរ​អប់រំ​ យុវជន​ និង​កីឡា​ ខេត្តបាត់ដំបង​ ដោយ​ក្រុម​មន្ត្រីរាជការ​ក្រោម​ឱវាទ​ទម្លាយ​ចេញ​មក​ឲ្យ​ដឹង​ថា​ អស់​រយៈពេល​ជា​ច្រើន​ឆ្នាំ​ហើយ​ លោក​ ងី​ សែត​ ជា​ប្រធាន​មន្ទីរ​ និង​មន្ត្រី​ជំនិត​មួយ​ក្តាប់​តូច​ បាន​រួមដៃគ្នា​ប្រព្រឹត្ត​អំពើ​ពុក​រលួយ​ដ៏​ធ្ងន់ធ្ងរ​ តាម​វិធី​កិបកេង​ថវិកាជាតិ​សម្រាប់​ឧបត្ថម្ភ​សហគមន៍​កីឡា​ និង​ប្រាក់​សម្រាប់​ឧបត្ថម្ភ​ដំណើរ​លំហែ​ និង​សិក្សា​របស់​សិស្ស​ មិន​តិច​ជាង​ចំនួន​១០០​លាន​រៀល​ឡើយ​ក្នុង​មួយ​ឆ្នាំៗ​ ។​

​សេចក្តីរាយការណ៍​បាន​ឲ្យ​ដឹង​ថា​ កាលពី​ឆ្នាំ​២០១៣​កន្លង​ទៅ​ មន្ទីរ​អប់រំ​ យុវជន​ និង​កីឡា​ ខេត្តបាត់ដំបង​ បាន​ចំណាយ​ថវិកាជាតិ​សម្រាប់​ឧបត្ថម្ភ​សហគមន៍​កីឡា​អស់​ចំនួន​២៣៩.៣៩០.០០០​រៀល​ និង​ថវិកា​សម្រាប់​ដំណើរ​លំហែ​ និង​សិក្សា​របស់​សិស្ស​អស់​ចំនួន​១៧១.៦៦៤.០០០​រៀល​ ។​ ប៉ុន្តែ​ថវិកា​ទាំងនេះ​គឺ​គ្រាន់តែ​ជា​តួលេខ​ដែល​មន្ទីរ​អប់រំ​ យុវជន​ និង​កីឡា​ខេត្តបាត់ដំបង​ បាន​ដក​ថវិកាជាតិ​មក​ចាយវាយ​ប៉ុណ្ណោះ​ ខណៈ​ដែល​សកម្មភាព​ជាក់ស្តែង​គឺ​ខ្ទង់​ថវិកា​ខាងលើ​ត្រូវ​បាន​គេ​កិបកេង​អស់​មិន​តិច​ជាង​១០០​លាន​រៀល​(២៥.០០០​ដុល្លារ​អា​មេ​រិ​ក​)​ក្នុង​១​ឆ្នាំ​ តាម​ល្បិច​ធ្វើ​ឯកសារ​បំប៉ោង​តួលេខ​ចំនួន​នៃ​ការ​ប្រកួត​កីឡា​ និង​ចំនួន​អ្នក​ដើរ​លំហែ​ និង​សិក្សា​ ។​

​ក្រុម​មន្ត្រីរាជការ​ក្រោម​ឱវាទ​មន្ទីរ​អប់រំ​ យុវជន​ និង​កីឡា​ ខេត្តបាត់ដំបង​ បាន​សំណូមពរ​ចំពោះ​ឯកឧត្តម​បណ្ឌិត​ ឱម​ យ៉ិ​ន​ទៀង​ ទេស​រដ្ឋមន្ត្រី​ ទទួល​បន្ទុក​ជា​ប្រធាន​អង្គភាព​ប្រឆាំង​អំពើ​ពុក​រលួយ​ និង​ឯកឧត្តម​បណ្ឌិត​ ហង់​ជួន​ ណា​រ៉ុ​ន​ ជា​រដ្ឋមន្ត្រីក្រសួង​អប់រំ​ យុវជន​ និង​កីឡា​ មេត្តា​បើក​ការ​ស៊ើបអង្កេត​ និង​មាន​វិធានការ​ក្នុង​រឿង​អំពើ​ពុក​រលួយ​របស់​លោក​ប្រធាន​មន្ទីរ​ ងី​ សែត​ និង​គូកន​នោះ​ផង​ ។​

​ពាក់ព័ន្ធ​នឹង​ការ​ចោទប្រកាន់​ពី​សំណាក់​មន្ត្រីរាជការ​ក្រោម​ឱវាទ​ដែល​ថា​ លោក​ប្រធាន​មន្ទីរ​អប់រំ​ យុវជន​ និង​កីឡា​ ខេត្តបាត់ដំបង​ ប្រព្រឹត្ត​អំពើ​ពុក​រលួយ​កិបកេង​ស៊ីដាច់​ប្រាក់​ឧបត្ថម្ភ​សហគមន៍​កីឡា​ និង​ប្រាក់​ដំណើរ​លំហែ​ និង​សិក្សា​របស់​សិស្ស​មាន​ចំនួន​មិន​តិច​ជាង​១០០​លាន​រៀល​ក្នុង​១​ឆ្នាំៗ​នោះ​ គេហទំព័រ​សារព័ត៌មាន​ដើម​ត្នោត​មិន​ទាន់​អាច​សុំ​ការ​បំភ្លឺ​បញ្ជាក់​ពី​លោក​ ងី​ សែត​ បាន​នៅឡើយ​ទេ​ គិត​ត្រឹម​ថ្ងៃ​ទី​១៥​ ខែសីហា​ ឆ្នាំ​២០១៤​នេះ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.