ថ្ងៃ ពុធ ទី ២៩ ខែ មិថុនា ឆ្នាំ ២០២២

រថយន្ត​កុងតឺន័រ​ក្រុមហ៊ុន​ Union​ បុក​រះ​បណ្តាល​ឲ្យ​មនុស្ស​ស្លាប់​និង​រង​របួស​៨​នាក់​នៅ​ខេត្ត​ព្រះ​សីហ​នុ​

​យ៉ាង​ហោច​ណាស់​មាន​មនុស្ស​ចំនួន​៨​នាក់​បាន​ស្លាប់​ និង​រង​របួសធ្ងន់​-​ស្រាល​រដូករណែល​ ក្នុង​ហេតុការណ៍​គ្រោះថ្នាក់​ចរាចរណ៍​ដ៏​សែន​រន្ធត់​មួយ​កើតឡើង​នា​វេលា​ម៉ោង​១៦​និង​១៥​នាទី​រសៀល​ ថ្ងៃ​ទី​១៣​ ខែសីហា​ ឆ្នាំ​២០១៤​នេះ​ នៅ​ត្រង់​ចំណុច​វិ​ថី​ផែ​ មុខ​ស្ថានីយ៍​រថភ្លើង​(​កន្លែង​ផ្សារ​ក្តាម​)​ ភូមិ​៣​ សង្កាត់​លេខ​៣​ ក្រុងព្រះសីហនុ​ ខេត្ត​ព្រះ​សីហ​នុ​ បង្ក​ដោយ​រថយន្ត​កុងតឺន័រ​មួយ​គ្រឿង​របស់​ក្រុមហ៊ុន​ Union​ បុក​រះ​ទៅ​លើ​ទោចក្រយានយន្ត​៣​គ្រឿង​ និង​រថយន្ត​តាក់ស៊ី​មួយ​គ្រឿង​ទៀត​ បណ្តាល​ឲ្យ​ធ្លាក់​ជ្រោះ​ ព្រមទាំង​បង្គោល​ភ្លើង​១​ដើម​ត្រូវ​ដួលរ​លំបាក់​ខ្ទេចខ្ទី​ ខណៈ​រថយន្ត​បង្ក​ដួល​បះជើង​ច្រងាង​ ។​

​សមត្ថកិច្ច​នគរបាល​ចរាចរណ៍​ផ្លូវគោក​ខេត្ត​ព្រះ​សីហ​នុ​ បាន​ឲ្យ​ដឹង​ថា​ រថយន្ត​កុងតឺន័រ​បង្កហេតុ​នោះ​ជា​កម្មសិទ្ធិ​របស់​ក្រុមហ៊ុន​ Union​ ពាក់​ស្លាក​លេខ​ភ្នំពេញ​ 3A-6142​ បើកបរ​ដោយ​បុរស​ឈ្មោះ​ យន់​ សុ​ភ័ក្ត្រ​ អាយុ​២៩​ឆ្នាំ​ មាន​ទីលំនៅ​ក្រុងព្រះសីហនុ​ ខេត្ត​ព្រះ​សីហ​នុ​ ហើយ​អ្នកបើកបរ​រថយន្ត​បង្ក​ហេតុនេះ​ក៏​បាន​រង​របួស​ក្បាល​ដែរ​ និង​ត្រូវ​បាន​សមត្ថកិច្ច​ឃាត់ខ្លួន​ភ្លាមៗ​ ក្រោយ​គ្រោះថ្នាក់​ចរាចរណ៍​ដ៏​រន្ធត់​នេះ​កើតឡើង​រួច​មក​ ។​

​សមត្ថកិច្ច​បាន​ឲ្យ​ដឹង​ទៀត​ថា​ ក្រៅពី​អ្នក​ស្លាប់​បាត់បង់​ជីវិត​នៅ​កន្លែង​កើតហេតុ​ គឺ​អ្នក​រង​របួសធ្ងន់​-​ស្រាល​ទាំងអស់​ដែល​មិន​ទាន់​ស្គាល់​អត្តសញ្ញាណ​ច្បាស់​ ត្រូវ​បាន​ដឹក​បញ្ជូន​យក​ទៅ​សង្គ្រោះ​នៅ​មន្ទីរពេទ្យ​រួចរាល់​ហើយៗ​វត្ថុ​តាង​នានា​ ដូច​ជា​រថយន្ត​ និង​ទោចក្រ​ យានយន្ត​ក៏​ត្រូវ​បាន​យក​ទៅ​រក្សា​ទុក​នៅ​ការិយាល័យ​នគរបាល​ចរាចរណ៍​ផ្លូវគោក​ខេត្ត​ព្រះ​សីហ​នុ​ ដើម្បី​បន្ត​ចាត់ការ​តាម​ច្បាប់​ ។​

​គួរ​កត់សម្គាល់​ឃើញ​ថា​ គ្រោះថ្នាក់​ចរាចរណ៍​បង្ក​ឡើង​ដោយ​រថយន្ត​ធុន​ធំ​ដឹក​កុងតឺន័រ​ បាន​កើត​មាន​ឡើងជា​ញឹកញាប់​នៅ​តាម​បណ្តោយ​ផ្លូវជាតិ​លេខ​៤​ ដែល​ជា​ផ្លូវជាតិ​មួយ​មាន​សក្តានុពល​ដឹក​ជញ្ជូន​ទំនិញ​ពី​កំពង់​ផែ​ស្វយ័ត​ខេត្ត​ព្រះ​សីហ​នុ​ចូល​មក​រាជធានី​ភ្នំពេញ​ និង​តាម​បណ្តា​ខេត្ត​នានា​ ដោយសារ​អ្នកបើកបរ​រថយន្ត​ទាំងនោះ​មានការ​ធ្វេសប្រហែស​ មិនសូវ​គោរព​ច្បាប់​ចរាចរណ៍​ផង​ និង​បណ្តាល​មក​ពី​កត្តា​យានយន្ត​ដែល​មិន​សម​ស្រប​នឹង​បទដ្ឋាន​បច្ចេកទេស​ដឹក​ជញ្ជូន​ផង​ ។​ ដូច្នេះ​ សូម​ភាគី​ពាក់ព័ន្ធ​ទាំងអស់​មេត្តា​មាន​វិធានការ​ត្រួតពិនិត្យ​ និង​ប្រុង​ប្រយ័ត្ន​ឲ្យ​មាន​កម្រិត​ខ្ពស់​បំផុត​ ទាំង​កត្តា​មនុស្ស​ ទាំង​កត្តា​យានយន្ត​ ដើម្បី​បញ្ជៀ​សបាន​នូវ​គ្រោះថ្នាក់​ចរាចរណ៍​ជាយថាហេតុ​ ៕​

Siha-333

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.