ថ្ងៃ ពុធ ទី ២៩ ខែ មិថុនា ឆ្នាំ ២០២២

នយោបាយ​ដឹកនាំ​របស់​បុរស​ខ្លាំង​គឺ​ធ្វើ​តាម​អារម្មណ៍​អាច​ធ្វើ​ឲ្យ​ប្រទេស​ជាតិ​ក្លាយជា​ស្រុក​សម្បុក​ចោរ​និង​អយុត្តិធម៌​

​ប្រិ​យ​មិត្ត​អ្នក​អាន​ទំនងជា​អាច​នៅ​ចង​ចាំ​បាន​ថា​ កាលពី​ចុងឆ្នាំ​២០០១​ រាជរដ្ឋាភិបាល​កម្ពុជា​ក្រោម​ការ​ដឹកនាំ​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ ជា​នាយក​រដ្ឋមន្ត្រី​ ធ្លាប់​បាន​ចេញ​បទបញ្ជា​មួយ​លេខ​០០១​បប​ ចុះ​ថ្ងៃ​ទី​២០​ ខែវិច្ឆិកា​ ឆ្នាំ​២០០១​ បង្គាប់​ឲ្យ​បញ្ឈប់​ការ​ធ្វើ​អាជីវកម្ម​រង្គសាល​ ក្លឹ​បរា​ត្រី​ ឌី​ស្កូ​ថែ​ក​ និង​ខារ៉ាអូខេ​ទាំងឡាយ​ដែល​កំពុង​ធ្វើ​សកម្មភាព​ក្នុង​រាជធានី​ភ្នំពេញ​ និង​ខេត្ត​-​ក្រុង​ទូ​ទាំង​ព្រះរាជាណាចក្រ​កម្ពុជា​ ។​ បទបញ្ជា​របស់​បុរស​ខ្លាំង​នោះ​ ធ្វើ​ឲ្យ​ក្លឹ​ប​ខារ៉ាអូខេ​តូចតាច​គ្មាន​ខ្នងបង្អែក​មួយ​ចំនួន​"​ដួល​បះជើង​ខាត​ឡុងចុង​"​ ដ្បិត​ស្រង់​ដើម​មិន​ទាន់​រួច​ផង​ បែរ​ជា​ត្រូវ​បាន​អាជ្ញាធរ​បិទទ្វារ​អា​ជី​វក​ម្ម​ ខណៈ​ដែល​ក្លឹ​ប​ខារ៉ាអូខេ​ធំៗ​អាច​នៅ​បន្ត​ធ្វើ​អាជីវកម្ម​បាន​ ក្រោម​រូបភាព​"​លួចលាក់​ ឬ​បន្លំ​ប្រើ​ស្លា​កថា​ បន្ទប់​ទស្សនា​បាល់ទាត់​"​ ដោយ​មាន​វត្តមាន​សមាជិក​រដ្ឋសភា​ សមាជិក​រាជរដ្ឋាភិបាល​ និង​សមត្ថកិច្ច​ប៉ូលិស​ ប៉េ​អឹ​ម​ …​នាំ​គ្នា​ទៅ​ចូល​ច្រៀង​ខារ៉ាអូខេ​ជា​ធម្មតា​ជា​ហូរហែ​ រហូត​ដល់​រង្គសាល​ ក្លឹ​បរា​ត្រី​ និង​ខារ៉ាអូខេ​ដំណើរការ​រីក​ដូច​ផ្សិត​ត្រូវ​ទឹកភ្លៀង​ឡើង​វិញ​ទល់​បច្ចុប្បន្ន​ ដោយ​មិន​ចាំបាច់​មាន​ប្រកាស​ពី​បុរស​ខ្លាំង​ ។​

​បទបញ្ជា​របស់​បុរស​ខ្លាំង​ក្នុង​ការ​បិទ​អាជីវកម្ម​ខារ៉ាអូខេ​ និង​ក្លឹ​បរា​ត្រី​ដែល​ជា​កម្មវិធី​កម្សាន្ត​របស់​មនុស្ស​ ត្រូវ​បាន​ទទួល​រង​ការ​រិះគន់​តាំងពី​ដើម​ទី​ ប៉ុន្តែ​មិន​អាច​កែប្រែ​"​អារម្មណ៍​"​របស់​បុរស​ខ្លាំង​បាន​ឡើយ​នា​ពេល​នោះ​ គឺ​ម្ចាស់​អាជីវកម្ម​ខារ៉ាអូខេ​ធំៗ​ដែល​មាន​ខ្នងបង្អែក​ជា​មន្ត្រី​គ្រាក់ៗ​សុខចិត្ត​ស៊ូទ្រាំ​ដំណើរការ​អាជីវកម្ម​របស់​ខ្លួន​ ក្រោម​រូបភាព​"​លួចលាក់​"​ ដ្បិត​មាន​ប្រភព​ព័ត៌មាន​ខ្លះ​លួច​បង្ហើប​ប្រាប់​ថា​ ការណ៍​ដែល​នាំ​ឲ្យ​បុរស​ខ្លាំង​សម្រេច​ប្រកាស​បិទ​ខារ៉ាអូខេ​ ដោយសារ​បុរស​ខ្លាំង​ខឹងសម្បា​នឹង​កូនប្រសា​(​អតីត​ស្វាមី​របស់​លោកស្រី​ ហ៊ុន​ ម៉ា​ណា​ គឺ​លោក​ឧត្តមសេនីយ៍​យោធា​ ម៉ឹង​ កុម្ភៈ​ ជា​កូនប្រុស​របស់​ឯកឧត្តម​នាយ​ឧត្តមសេនីយ៍​ ម៉ឹង​ សំ​ផ​ន​ រដ្ឋលេខាធិការ​ក្រសួងការពារជាតិ​)​ ចូល​ចិត្ត​ដើរ​លេង​យប់​ ចូល​ខារ៉ាអូខេ​ (Sic!)​ ។​ ទីបំផុត​ បទបញ្ជា​របស់​បុរស​ខ្លាំង​សាបរលាប​គ្មាន​តម្លៃ​ គឺ​ក្លឹ​បរា​ត្រី​ និង​ខារ៉ាអូខេ​នៅ​តែ​បិទ​មិន​ជិត​ ទប់​មិន​ឈ្នះ​ ហើយ​ដំណើរការ​គគ្រឹកគគ្រេង​លើស​ដើម​ទល់​បច្ចុប្បន្ន​ ។​

​ក្រោយមក​ ឆ្នោត​ឡូ​តូ​ ល្បែង​អេ​ឡិច​ត្រូ​និ​ច​-​មេ​ហ្គា​និ​ច​ ស្លុត​ម៉ាស៊ីន​ និង​ល្បែងភ្នាល់​បាល់​ (​កាល​ណោះ​ក្រុមហ៊ុន​ Cambo​ Six​ ជា​ក្រុមហ៊ុន​ទទួល​បាន​អាជ្ញាប័ណ្ណ​បម្រើ​សេវាកម្ម​ល្បែងភ្នាល់​បាល់ទាត់​)​ បាន​កើតឡើង​រីក​សុសសាយ​នៅ​កម្ពុជា​ ប៉ុន្តែ​ត្រូវ​បាន​រាជរដ្ឋាភិបាល​បុរស​ខ្លាំង​ប្រកាស​បិទ​អាជីវកម្ម​ជា​បន្តបន្ទាប់​ចាប់តាំងពី​ចុងឆ្នាំ​២០០៨​ មក​ដល់​ថ្ងៃ​ទី​២៥​ ខែកុម្ភៈ​ ឆ្នាំ​២០០៩​ (​លើកលែងតែ​ក្រុមហ៊ុន​ល្បែង​កាស៊ីណូ​)​ ធ្វើ​ឲ្យ​ក្រុមហ៊ុន​ធ្វើ​សេវាកម្ម​ល្បែងភ្នាល់​បាល់​ Cambo​ Six​ ដែល​ទទួល​បាន​អាជ្ញាប័ណ្ណ​ពី​ក្រសួង​សេដ្ឋកិច្ច​និង​ហិរញ្ញវត្ថុ​ខឹងសម្បា​នឹង​បុរស​ខ្លាំង​មិន​ស្ទើរ​ឡើយ​ ។​

​ទោះបី​រាជរដ្ឋាភិបាល​បុរស​ខ្លាំង​ប្រកាស​បិទ​អាជីវកម្ម​ភ្នាល់​បាល់ទាត់​ និង​អាជីវកម្ម​ល្បែង​ឆ្នោត​គ្រប់​ប្រភេទ​ក៏​ដោយ​ ប៉ុន្តែ​ជាក់ស្តែង​បាន​បង្ហាញ​ថា​ ល្បែងភ្នាល់​បាល់ទាត់​នៅ​តែ​មាន​លេង​តាម​កាស៊ីណូ​រហូត​ដល់​មានការ​បង្កើត​ Account​ សម្រាប់​លេង​តាម​ Internet​ ទៅ​ទៀត​ ដែល​កាង​ដោយ​មន្ត្រី​ អ្នក​ឈ្មួញ​គ្រាក់ៗ​ស្និទ្ធ​នឹង​បុរស​ខ្លាំង​ ឋិត​ក្រោម​រូបភាព​"​លួចលាក់​"​មិន​ចំហ​ ។​ រីឯ​ល្បែង​ឆ្នោត​"​កន្ទុយលេខ​"​មាន​លេង​សឹង​នៅ​គ្រប់​ទីផ្សារ​ក្នុង​រាជធានី​-​ខេត្ត​ ហើយ​សូ​ម្បី​តែ​ក្រុម​សមត្ថកិច្ច​ក៏​ចូលរួម​លេងឆ្នោត​ដែរ​ ក្រោម​រូបភាព​"​លួចលាក់​"​ ខណៈ​ឆ្នោត​យួន​បាន​ធ្វើ​អាជីវកម្ម​ជា​ចំហ​នៅ​ក្នុងស្រុក​ខ្មែរ​តែ​ម្តង​ ។​ មាន​ន័យ​ថា​ បិទ​ពី​ការ​ធ្វើ​អាជីវកម្ម​ដោយ​ចំហ​ស្របច្បាប់​ បែរជា​មក​ទុក​ផ្លូវ​ និង​ឱកាស​ឲ្យ​មន្ត្រី​ ព្រមទាំង​ឈ្មួញ​មួយ​ចំនួន​បើក​អាជីវកម្ម​ក្រោម​រូបភាព​"​លួចលាក់​"​របៀប​ជា​មុខរបរ​របស់​ចោរ​ទៅ​វិញ​ ។​

​ក្រុម​អ្នកវិភាគ​សេដ្ឋកិច្ច​និង​កិច្ចការ​សង្គម​នៅ​កម្ពុជា​ បាន​លើក​ឡើង​ថា​ ការ​បិទ​អាជីវកម្ម​ដែល​មាន​ចំណូល​ពី​រូបភាព​ស្របច្បាប់​ ហើយ​បែរជា​បិទ​មិន​បាន​ឲ្យ​ក្លាយទៅជា​មាន​រូបភាព​"​លួចលាក់​"​មិន​ស្របច្បាប់​ រកស៊ី​ដូច​ចោរ​ ជា​អាទិ៍​ ល្បែងភ្នាល់​បាល់​ ឆ្នោត​កន្ទុយលេខ​…​។​ល​។​ គឺ​ធ្វើ​ឲ្យ​បាត់បង់​ចំណូល​ថវិការដ្ឋ​បាន​ត្រឹមតែ​ទៅ​បំប៉ន​ឲ្យ​ហោប៉ៅ​ឈ្មួញ​ និង​មន្ត្រី​ធ្វើ​ជា​ខ្នងបង្អែក​មួយ​ចំនួន​ និង​ឈាន​ទៅ​មានការ​ពិបាក​ក្នុង​ការ​គ្រប់គ្រង​ថែម​ទៀត​ ។​

​ដោយឡែក​ ទាក់ទង​នឹង​ការ​ដោះស្រាយ​ទំនាស់​ដីធ្លី​ និង​ការ​ជួយ​អន្តរាគមន៍​ក្នុង​សំណុំរឿង​ផ្សេងៗ​ទៀត​ គឺ​បុរស​ខ្លាំង​តែង​ធ្វើការ​សម្រេច​ត្រឡប់ត្រឡិន​ច្រើន​ដង​ សាចុះសាឡើង​ទៅ​តាមតែ​របាយការណ៍​របស់​មន្ត្រី​ថ្នាក់​ក្រោម​ ដោយ​ម្តង​សម្រេច​ឲ្យ​"​ភាគី​ក​"​ ម្តងទៀត​សម្រេច​ឲ្យ​"​ភាគី​ខ​"​ រួច​ហើយ​ត្រឡប់​មក​សម្រេច​ឲ្យ​"​ភាគី​ក​"​វិញ​ និង​បែរ​ទៅ​ជាស​ម្រេច​ឲ្យ​"​ភាគី​ខ​"​សា​ជា​ថ្មី​ទៀត​តាម​អារម្មណ៍​របស់​បុរស​ខ្លាំង​ (​ឧទាហរណ៍​ សំណុំរឿង​ទំនាស់​ដីធ្លី​ទំហំ​៣៥២​ហិ​កតារ​វាង​លោក​ឧកញ៉ា​ ជៀម​ ផែន​ ថៅកែ​ក្រុមហ៊ុនស្រា​បៀរ​លី​អូ​ និង​ក្រុម​ប្រជាពលរដ្ឋ​ចំនួន​៤៩​គ្រួសារ​ ឋិត​នៅ​ភូមិ​កែវ​ផុស​ ឃុំ​ទំនប់​រលក​ ស្រុក​ស្ទឹង​ហាវ​ ខេត្ត​ព្រះ​សីហ​នុ​ ជាដើម​…)​ ធ្វើ​ឲ្យ​ភាគី​ទំនាស់​ទាំង​សងខាង​ទទួល​រង​ការ​ខាតបង់​រៀងៗ​ខ្លួន​ ទម្រាំ​ទទួល​បាន​លទ្ធផល​សម្រេច​ចុង​ក្រោយ​ពី​បុរស​ខ្លាំង​ដែល​មាន​ចរិត​របៀប​នយោបាយ​ទៅ​ទៀត​ ។​

​សរុបសេចក្តី​មក​ រូបភាព​ទាំងនេះ​គឺជា​ព័ស្តុតាង​បង្ហាញ​ថា​ មួយ​ផ្នែក​នៃ​នយោបាយ​ដឹកនាំ​របស់​បុរស​ខ្លាំង​ គឺ​"​ធ្វើ​តាម​អារម្មណ៍​"​ ដែល​អាច​ធ្វើ​ឲ្យ​ប្រទេស​ជាតិ​ទាំងមូល​ក្លាយទៅជា​មានឈ្មោះ​"​ស្រុក​សម្បុក​ចោរ​"​ និង​ពោរពេញ​ដោយ​អយុត្តិធម៌​សង្គម​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.