ថ្ងៃ ចន្ទ ទី ២៤ ខែ មករា ឆ្នាំ ២០២២

ចៅអធិការ​វត្ត​ទួល​ក្រសាំង​ឆាន់​ស្រាស្រ​វឹង​បើករថយន្ត​ធ្លាក់​ផ្លូវ​បុក​ខ្ទេច​ស្លាក​មណ្ឌល​សុខភាព​និង​បង្គោល​ភ្លើង​

​នៅ​វេលា​ម៉ោង​១៦​និង​៣០​នាទី​ល្ងាច​ នា​ថ្ងៃ​ទី​១៨​ ខែមិថុនា​ ឆ្នាំ​២០១៤​នេះ​ ត្រង់​ចំណុច​ផ្លូវជាតិ​លេខ​២១B​ ភូមិ​ទេព​អរជូន​ ឃុំ​កោះ​ខែល​ ស្រុក​ស្អាង​ ខេត្តកណ្តាល​ មាន​ហេតុការណ៍​គ្រោះថ្នាក់​ចរាចរណ៍​ដ៏​គួរ​ឲ្យ​ភ្ញាក់ផ្អើល​មួយ​បាន​កើតឡើង​ ដោយ​រថយន្ត​បង្ក​មួយ​គ្រឿង​ម៉ាក​ PAJERO​ ពណ៌​ទឹកប្រាក់​ ពាក់​ស្លាក​លេខ​ភ្នំពេញ​ 2F-0003​ បើកបរ​ដោយ​ព្រះ​ចៅអធិការ​វត្ត​ទួល​ក្រសាំង​ ឆាន់​ស្រា​ស្រវឹង​ រួម​ដំណើរ​ជាមួយ​ព្រះសង្ឃ​ និង​សិស្ស​លោក​ចំនួន​៤​អង្គ​-​នាក់​ទៀត​ បើក​ធ្លាក់​ផ្លូវ​ជ្រុល​ទៅ​បុក​ស្លាក​មណ្ឌល​សុខភាព​ឃុំ​កោះ​ខែល​ បង្គោល​ភ្លើង​១​ដើម​លេខ​ NR857​ និង​ជ្រុល​ទៅ​បុក​ដើម​អំពិល​ទឹកបាក់​អស់​១​ដើម​ទៀត​ ទើប​ទៅ​មុខ​លែង​រួច​តែ​ម្តង​ ។​

​ព្រះ​ចៅអធិការ​វត្ត​ទួល​ក្រសាំង​ដែល​ឆាន់​ស្រា​ស្រវឹង​បើកបរ​រថយន្ត​ធ្លាក់​ផ្លូវ​ បង្ក​គ្រោះថ្នាក់​ចរាចរណ៍​បុក​ស្លាក​សញ្ញា​មណ្ឌល​សុខភាព​ឃុំ​កោះ​ខែល​ និង​បង្គោល​ភ្លើង​ឲ្យ​បាក់​រលំ​អស់​១​ដើម​ តែ​សំណាងល្អ​គ្មាន​មនុស្ស​រង​របួស​នោះ​ មាន​ព្រះ​នាម​ ខាន់​ ហេង​ ព្រះ​ជន្ម​៥៦​ព្រះ​វស្សា​ និង​អ្នក​រួម​ដំណើរ​ចំនួន​៤​អង្គ​-​នាក់​ទៀត​ រួម​មាន​ ៖​ ១-​ព្រះសង្ឃ​ព្រះ​មាន​ ផង់​ មាស​ ព្រះ​ជន្ម​៧០​ព្រះ​វស្សា​ គង់នៅ​វត្ត​ទួល​ក្រសាំង​,​ ២-​ព្រះសង្ឃ​ព្រះ​នាម​ ផ​ន​ សុខុម​ ព្រះ​ជន្ម​៥០​ព្រះ​វស្សា​ គង់នៅ​វត្ត​ទួល​ក្រសាំង​,​ ៣-​ព្រះសង្ឃ​ព្រះ​នាម​ ស៊ឹ​ម​ ស៊ុន​ហុង​ ព្រះ​ជន្ម​១៧​ព្រះ​វស្សា​ គង់នៅ​វត្ត​ទួល​ក្រសាំង​ និង​៤-​ឈ្មោះ​ សុខ​ ឡេ​ង​ ភេទ​ប្រុស​ អាយុ​១៣​ឆ្នាំ​ ជា​កូនសិស្សលោក​ ។​

​ប្រភព​ព័ត៌មាន​បាន​ឲ្យ​ដឹង​ថា​ ព្រះ​ចៅអធិការ​វត្ត​ទួល​ក្រសាំង​ និង​អ្នក​រួម​ដំណើរ​ក្នុង​រថយន្ត​បាន​នាំ​គ្នា​និមន្ត​ចេញពី​វត្ត​ទួល​ក្រសាំង​ ទៅ​ចូលរួម​បុណ្យសព​បិតា​របស់​ព្រះ​តេជគុណ​ ខាន់​ ហេង​ ជា​ចៅអធិការ​វត្ត​ នៅ​ភូមិ​តា​អី​ ឃុំ​បា​ស្រែ​ ស្រុក​អង្គរបុរី​ ខេត្តតាកែវ​ បើកបរ​រថយន្ត​ដោយ​ផ្ទាល់​ព្រះ​អង្គ​ និង​ពេល​និមន្ត​ត្រឡប់​មក​វិញ​ មក​ដល់​ចំណុច​កើតហេតុ​ រថយន្ត​ក៏​ធ្លាក់​ផ្លូវ​ជ្រុល​ចង្កូត​ទៅ​បុក​ស្លាក​សញ្ញា​មណ្ឌល​សុខភាព​ឃុំ​កោះ​ខែល​ បង្គោល​ភ្លើង​១​ដើម​ និង​ដើម​អំពិលទឹក​១​ដើម​ទៀត​ឲ្យ​បាក់​ខ្ទេច​អស់​ ។​

​នៅ​ក្រោយ​ពេល​កើតហេតុ​គ្រោះថ្នាក់​ចរាចរណ៍​ដ៏​គួរ​ឲ្យ​ភ្ញាក់ផ្អើល​នេះ​ សមត្ថកិច្ច​នគរបាល​ស្រុក​ស្អាង​ ខេត្តកណ្តាល​ បាន​វាស់​កម្រិត​ជាតិ​អាល់កុល​ទៅ​លើ​ព្រះ​តេជគុណ​ ខាន់​ ហេង​ ជា​ចៅអធិការ​វត្ត​ទួល​ក្រសាំង​ ដោយ​មាន​គ្រង​ឯកសណ្ឋាន​អាវ​ប៉ា​រ៉ា​ និង​មាន​ស្លាក​សញ្ញា​ជា​កងរាជអាវុធហត្ថ​ទៀត​នោះ​ មាន​កម្រិត​១,០៦​មី​ល្លី​ក្រាម​ក្នុង​១​លី​ត្រ​ខ្យល់​ និង​ព្រះ​តេជគុណ​ ផ​ន​ សុខុម​ មាន​កម្រិត​ជាតិ​អាល់កុល​ចំនួន​១,០៩​មី​ល្លី​ក្រាម​ក្នុង​១​លី​ត្រ​ខ្យល់​ រីឯ​អ្នក​ផ្សេង​ទៀត​មិន​មាន​ជាតិ​ស្រវឹង​នៅ​ក្នុង​ខ្លួន​ទេ​ ។​

​អនុលោម​តាម​ច្បាប់​ស្តី​ពី​ចរាចរណ៍​ផ្លូវគោក​ ត្រង់​មាត្រា​៧៦​ បាន​ចែង​ថា​ "​ជន​ណា​បើកបរ​យានជំនិះ​នៅ​ពេល​ដែល​ខ្លួន​ឋិត​នៅ​ក្នុង​ភាព​ស្រវឹង​ដោយ​មាន​ជាតិ​អាល់កុល​ចាប់ពី​០,៤០​មី​ល្លី​ក្រាម​ក្នុង​១​លី​ត្រ​ខ្យល់​ ឬ​ចាប់ពី​០,៨​ក្រាម​ក្នុង​១​លី​ត្រ​ឈាម​ឡើង​ទៅ​ ត្រូវ​ផ្តន្ទាទោស​ដាក់​ពន្ធនាគារ​ពី​៦​ថ្ងៃ​ទៅ​៦​ខែ​ ឬ​/​និង​ពិន័យ​ជា​ប្រាក់​ពី​២៥.០០០​រៀល​ ទៅ​១.០០០.០០០​រៀល​"​ ។​ ដូច្នេះ​ នៅ​ក្នុង​ករណី​ចៅអធិការ​វត្ត​ទួល​ក្រសាំង​ឆាន់​ស្រា​ស្រវឹង​ បើករថយន្ត​ធ្លាក់​ផ្លូវ​នេះ​ គេ​រង់ចាំ​មើល​ថា​ តើ​ច្បាប់​ និង​ក្រសួង​ធម្មការ​និង​សាសនា​ ក៏​ដូច​ជា​មន្ទីរ​ធម្មការ​និង​សាសនា​ខេត្តកណ្តាល​ ចាត់ការ​យ៉ាងណា​ដែរ​ ឬ​ក៏​ចាត់ទុកជា​រឿង​ធម្មតា​ ?​ ៕​

Kandal-Monk-1 Kandal-Monk-6 Kandal-Monk-2

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.