ថ្ងៃ សុក្រ ទី ១៩ ខែ សីហា ឆ្នាំ ២០២២

មេ​រដ្ឋប្រហារ​យោធា​ថៃ​ហាមប្រាម​អតីត​នាយក​រដ្ឋមន្ត្រី​ យី​ង​ឡាក់​ ស៊ី​ណា​វ៉ា​ត្រា​ និង​មន្ត្រី​១៥៥​នាក់​ផ្សេង​ទៀត​មិន​ឲ្យ​ចេញពី​ប្រទេស​

​ក្រោយ​ពី​បាន​ធ្វើ​រដ្ឋប្រហារ​យោធា​ប្រកបដោយ​ជោគជ័យ​កាលពី​ថ្ងៃ​ម្សិលមិញ​ និង​បាន​តែងតាំង​ខ្លួនឯង​ជា​នាយក​រដ្ឋមន្ត្រី​ ដោយ​អះអាង​ថា​ ក្នុង​គោលបំណង​គ្រប់គ្រង​ស្ថានការណ៍​ប្រទេស​ជាតិ​ឲ្យ​មាន​របៀបរៀបរយ​ឡើង​វិញ​រួច​មក​ លោក​ឧត្តមសេនីយ៍​ ប្រា​យុទ្ធ​ ចាន់​អូ​ចា​ អគ្គមេបញ្ជាការ​កំពូល​ និង​ជា​មេបញ្ជាការ​កងទ័ពជើងគោក​ថៃ​ បាន​កោះ​លោកស្រី​ យី​ង​ឡាក់​ ស៊ី​ណា​វ៉ា​ត្រា​ អតីត​នាយក​រដ្ឋមន្ត្រី​ថៃ​ និង​មន្ត្រី​ស្និទ្ធ​លោកស្រី​ចំនួន​២២​នាក់​ឲ្យ​មក​ចូលរួម​ប្រជុំ​នៅ​ការិយាល័យ​យោធា​នា​ថ្ងៃ​សុក្រ​ ទី​២៣​ ខែឧសភា​ ឆ្នាំ​២០១៤​នេះ​ ដោយ​សម្រេច​ហាមប្រាម​លោកស្រី​អតីត​នាយក​រដ្ឋមន្ត្រី​ សាច់ញាតិ​របស់​លោកស្រី​ លោកនាយក​រដ្ឋមន្ត្រី​ចាំផ្ទះ​ Niwatthamrong​ Boonsongpaisan​ ព្រមទាំង​ជាន់ខ្ពស់​ចំនួន​ជាង​១៥០​នាក់​ផ្សេង​ទៀត​ មិន​ឲ្យ​ធ្វើ​ដំណើរ​ចាក​ចេញពី​ប្រទេស​ដោយ​គ្មាន​ការ​អនុញ្ញាត​ឡើយ​ ។​

​កងកម្លាំង​យោធា​បាន​ត្រួតពិនិត្យ​ និង​សម្រេច​ឲ្យ​មានការ​ផ្អាក​នូវ​ប្រព័ន្ធ​ផ្សព្វផ្សាយ​ជា​ច្រើន​ ដូច​ជា​ ទូរទស្សន៍​ប៉ុស្តិ៍​លេខ​៣​ លេខ​៧​ លេខ​៩​ លេខ​១១​ និង​ប៉ុស្តិ៍​PBS​ វៀរលែងតែ​ទូរទស្សន៍​ប៉ុស្តិ៍​លេខ​៥​ ដែល​ជា​កម្មសិទ្ធិ​ផ្ទាល់​របស់​យោធា​ បន្ទាប់​ពី​ថ្ងៃ​ធ្វើ​រដ្ឋប្រហារ​យោធា​ភ្លាមៗ​ ។​ ជាមួយ​គ្នា​នេះ​ ការ​ជួបជុំ​របស់​ក្រុម​បាតុករ​ប្រឆាំង​ក៏​ត្រូវ​ដាក់​បម្រាម​ និង​បម្រាម​គោចរ​នៅ​ទូ​ទាំង​ប្រទេស​ត្រូវ​បាន​ដាក់​ចេញ​ផង​ដែរ​ចាប់ពី​ម៉ោង​២២​យប់​រហូត​ដល់​ម៉ោង​០៥​ទៀប​ភ្លឺ​ ។​

​ប្រភព​ព័ត៌មាន​ចុង​ក្រោយ​បាន​ឲ្យ​ដឹង​ថា​ នៅ​រាត្រី​ថ្ងៃ​សុក្រ​ ទី​២៣​ ខែឧសភា​ ឆ្នាំ​២០១៤​នេះ​ ទូរទស្សន៍​ប៉ុ​ស្តិ័​លេខ​៣​ លេខ​៧​ លេខ​៩​ និង​លេខ​១១​ នឹង​ត្រូវ​អនុញ្ញាត​ឲ្យ​ដំណើរការ​ផ្សព្វផ្សាយ​ប្រក្រតី​ឡើង​វិញ​ លើកលែងតែ​ទូរទស្សន៍​ប៉ុស្តិ៍​PBS​ ត្រូវ​បាន​បន្ត​បិទ​ ខណៈ​ដែល​នៅ​ទីក្រុង​បាងកក​មាន​សភាព​ស្ងប់ស្ងាត់​ ។​ សកម្មភាព​ប្រកប​មុខរបរ​រកស៊ី​របស់​ប្រជារាស្ត្រ​ប្រព្រឹត្ត​ទៅ​ជា​ធម្មតា​ ប៉ុន្តែ​សាលារៀន​រហូត​ដល់​កម្រិត​ថ្នាក់​មហាវិទ្យាល័យ​ត្រូវ​បាន​បិទ​ជា​បណ្តោះអាសន្ន​សិន​ ។​ មាន​ប្រជារាស្ត្រ​ខ្លះ​បាន​ផ្តល់​បទ​សម្ភាសន៍​ថា​ ពួក​គេ​ពេញចិត្ត​នឹង​ការ​ធ្វើ​រដ្ឋប្រហារ​របស់​កម្លាំងយោធា​ ដើម្បី​ដោះស្រាយ​ស្ថានការណ៍​នយោបាយ​ប្រទេស​ជាតិ​ឡើង​វិញ​ បន្ទាប់​ពីរ​លក​នៃ​ការ​បះបោរ​តវ៉ា​រាប់​ខែ​នាំ​ឲ្យ​បែកបាក់​នូវ​ផ្ទៃក្នុង​ជាតិ​ ។​

​នេះ​គឺជា​សកម្មភាព​នៃ​ការ​ធ្វើ​រដ្ឋប្រហារ​យោធា​លើក​ទី​១៩​ហើយ​ ពាក់ព័ន្ធ​នឹង​ដំណើរការ​ដឹកនាំ​ប្រទេស​នៃ​ព្រះរាជាណាចក្រ​ថៃ​ ដែល​អង្គ​ព្រះមហាក្សត្រ​មាន​ព្រះរាជ​ឥទ្ធិពល​យ៉ាង​ខ្លាំង​ទៅ​លើ​កង​កម្លាំងយោធា​ ៕​

 

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.