ថ្ងៃ ពុធ ទី ២៥ ខែ ឧសភា ឆ្នាំ ២០២២

អ្នក​អនុវត្តន៍​ច្បាប់​មើល​រំលង​លើ​ករណី​នាយទាហាន​មួយ​ចំនួន​ប្រើប្រាស់​អំណាច​គ្រប់គ្រង​ក្រុមហ៊ុន​ឯកជន​

​អ្នក​អនុវត្តន៍​ច្បាប់​នៅ​កម្ពុជា​ត្រូវ​ទទួល​រង​ការ​ចោទប្រកាន់​ថា​ បាន​មើល​រំលង​លើ​ករណី​នាយទាហាន​នៃ​កង​យោធពលខេមរភូមិន្ទ​មួយ​ចំនួន​ ពាក់ព័ន្ធ​នឹង​ការ​ប្រើប្រាស់​អំណាច​គ្រប់គ្រង​ក្រុមហ៊ុន​ជា​លក្ខណៈ​ឯកជន​ រំលោភ​បំពាន​ទៅ​លើ​បញ្ញត្តិ​មាត្រា​២៥​នៃ​ច្បាប់​ស្តី​ពី​លក្ខន្តិកៈ​ទូទៅ​ចំពោះ​យោធិន​នៃ​កង​យោធពលខេមរភូមិន្ទ​ ដែល​បាន​ចែង​ថា​ "​ហាម​ដាច់ខាត​មិន​ឲ្យ​យក​ម៉ោង​រដ្ឋបាល​ទៅ​ប្រកប​វិជ្ជាជីវៈ​ជា​ឯកជន​ ។​ ហាម​ដាច់ខាត​មិន​ឲ្យ​ចូល​ជា​សមាជិក​នៃ​ក្រុមប្រឹក្សាភិបាល​ ឬ​គ្រប់គ្រង​ក្រុមហ៊ុន​ជា​លក្ខណៈ​ឯកជន​ ។​ "​ ។​

​ព័ស្តុតាង​បាន​បង្ហាញ​ថា​ លោក​ឧត្តមសេនីយ៍ឯក​ ណឹ​ម​ ម៉េ​ង​ នាយទាហាន​នៃ​កង​យោធពលខេមរភូមិន្ទ​ អត្តលេខ​០៣២៥០៥​ មេបញ្ជាការ​រង​កង​អង្គរក្ស​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ត្រូវ​បាន​សារព័ត៌មាន​មួយ​ចំនួន​ដែល​ដង្ហែ​គាំទ្រ​គណបក្ស​ប្រជាជន​កម្ពុជា​ ចុះ​ផ្សាយ​ថា​ ជា​ប្រធាន​ក្រុមហ៊ុន​ណឹ​ម​ ម៉េ​ង​ គ្រុប​ ខូ​អិ​ល​ធី​ឌី​ ។​ រីឯ​សារព័ត៌មាន​ខ្លះ​ទៀត​ចុះ​ផ្សាយ​ថា​ លោក​ជំទាវ​ ឡាយ​ ស៊ី​នាង​ ណឹ​ម​ ម៉េ​ង​ ជា​ភរិយា​របស់​លោក​ឧត្តមសេនីយ៍ឯក​ ណឹ​ម​ ម៉េ​ង​ ជា​អគ្គ​នាយិកា​ក្រុមហ៊ុន​ណឹ​ម​ ម៉េ​ង​ គ្រុប​ ខូ​អិ​ល​ធី​ឌី​ ។​

​ក្រុមហ៊ុន​ ណឹ​ម​ ម៉េ​ង​ គ្រុប​ ធ្លាប់​បាន​ចូលរួម​ជាមួយ​ក្រុមហ៊ុន​ចិន​មួយ​ឈ្មោះ​ ហុង​ ទុង​ ធ្វើ​អាជីវកម្ម​រុករក​រ៉ែ​រួម​គ្នា​នៅ​ស្រុក​ជីក្រែង​ ខេត្តសៀមរាប​ ។​ ក្រុមហ៊ុន​ណឹ​ម​ ម៉េ​ង​ គ្រុប​ ក៏​ធ្លាប់​ឈ្នះ​លើ​ការ​ដេញថ្លៃ​រៀបចំ​ដោយ​សាលា​រាជធានី​ភ្នំពេញ​ ក្នុង​គម្រោង​ស្ថាបនា​ផ្លូវ​ចម្ការ​ដូង​លេខ​២១៧​ ប្រវែង​ជាង​៧​គីឡូម៉ែត្រ​ ប្រើប្រាស់​ថវិកា​អស់​ជិត​២០​លាន​ដុល្លារ​អា​មេ​រិ​ក​ ។​

​កាលពី​ថ្ងៃ​ទី​១២​ ខែឧសភា​ ឆ្នាំ​២០១៤​កន្លង​ទៅ​ថ្មីៗ​នេះ​ ក្រុមហ៊ុន​ ណឹ​ម​ ម៉េ​ង​ គ្រុប​ ត្រូវ​បាន​ស្ថាប័ន​តុលាការ​សាលាដំបូង​រាជធានី​ភ្នំពេញ​ប្រកាស​សាលក្រម​ឲ្យ​ឈ្នះក្តី​ទៅ​លើ​ស្ត្រីជន​ជាតិចិន​ សញ្ជាតិ​ខ្មែរ​ម្នាក់​ឈ្មោះ​ សុខ​ នាង​ហ្គិ​ច​ អាយុ​៤៦​ឆ្នាំ​ ដោយ​សម្រេច​ឲ្យ​ឈ្មោះ​ សុខ​ នាង​ហ្គិ​ច​ សង​ប្រាក់​ចំនួន​២០​លាន​រៀល​ឲ្យ​ទៅ​លោក​ឧត្តមសេនីយ៍ឯក​ ណឹ​ម​ ម៉េ​ង​ ជាដើម​បណ្តឹងរដ្ឋប្បវេណី​ និង​ផាកពិន័យ​ចំនួន​៤​លាន​រៀល​ ក្នុង​សំណុំរឿង​បរិហារ​បង្កាច់​កេរ្តិ៍​ ។​

​មជ្ឈដ្ឋាន​អ្នក​ឃ្លាំមើល​កិច្ចការ​សង្គម​នៅ​កម្ពុជា​ បាន​លើក​ឡើង​ថា​ កិត្យានុភាព​របស់​កង​យោធពលខេមរភូមិន្ទ​បច្ចុប្បន្ន​មាន​ភាព​អាប់ឱន​ ដោយសារ​នាយទាហាន​ពាក់​ផ្កាយ​ខ្លះ​ប្រើប្រាស់​អំណាច​ប្រព្រឹត្ត​ខុសច្បាប់​ ពល​ទាហាន​ខ្លះ​យក​ម៉ោង​រដ្ឋបាល​ទៅ​បម្រើ​ការងារ​ឲ្យ​ក្រុមហ៊ុន​ឯកជន​ ដើម្បី​បាន​ផលប្រយោជន៍​ជា​ប្រាក់​ កាង​ការពារ​ឲ្យ​ក្រុមហ៊ុន​ឯកជន​ក្នុង​សកម្មភាព​រំលោភ​បំពាន​ទៅ​លើ​សិទ្ធិ​ និង​ផលប្រយោជន៍​របស់​ប្រជាពលរដ្ឋ​តូចតាច​…​។​ល​៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.