ថ្ងៃ ពុធ ទី ២៥ ខែ ឧសភា ឆ្នាំ ២០២២

ស្រី​ក្រមុំ​មាន​ផ្ទៃពោះ​៤​ខែ​ជាមួយ​ព្រះសង្ឃ​កំពុង​ឈឺចិត្ត​ដ្បិត​សង្ឃ​កំហូច​មិន​ទទួលខុសត្រូវ​

​ស្រី​ក្រមុំ​អាយុ​១៨​ឆ្នាំ​ម្នាក់​ កំពុង​ទទួល​រង​សម្ពាធ​ឈឺចាប់​ខាង​ផ្លូវចិត្ត​ ដ្បិត​ជ្រុលខ្លួន​មាន​ផ្ទៃពោះ​ចំនួន​៤​ខែ​ក្នុង​សម្ព័ន្ធ​សេ្ន​ហា​លួចលាក់​ជាមួយ​ព្រះសង្ឃ​មួយ​អង្គ​ព្រះ​ជន្ម​២១​ព្រះ​វស្សា​ គង់នៅ​វត្ត​ព្រៃ​តា​កុយ​ ឃុំ​ពងទឹក​ ស្រុក​ដំណាក់​ចង្អើរ​ ខេត្ត​កែប​ ហើយ​សង្ឃ​កំហូច​បែរជា​គេចវេះ​មិន​ទទួលខុសត្រូវ​ពាក់ព័ន្ធ​នឹង​រឿង​ស្នេហា​លួចលាក់​នេះ​ទៅ​វិញ​ ។​

​ព្រះសង្ឃ​វ័យក្មេង​ដែល​ប្រព្រឹត្ត​ប្រាសចាក​ធម៌​វិន័យ​លួច​មាន​សេ្ន​ហា​ជាមួយ​កូនក្រមុំ​អ្នកស្រុក​ រហូត​ដល់​មាន​ផ្ទៃពោះ​ចំនួន​៤​ខែ​នោះ​ មាន​ព្រះ​នាម​ សេង​ ឧត្តម​ ។​ រីឯ​ស្រី​ក្រមុំ​រង​គ្រោះ​ព្រោះ​លួច​មាន​ស្នេហា​ជាមួយ​ព្រះសង្ឃ​របៀប​ទុំ​មុន​ស្រគាល​នោះ​ មានឈ្មោះ​ ហាន​ អ៊ា​ង​ មាន​ទីលំនៅ​ភូមិ​អំពែ​ង​ ឃុំ​អង្កោល​ ស្រុក​ដំណាក់​ចង្អើរ​ ខេត្ត​កែប​ ។​

​តាម​ការ​ឆ្លើយ​បំភ្លឺ​ដោយ​ឥត​លាក់លៀម​របស់​ស្រី​ក្រមុំ​រង​គ្រោះ​ បាន​ឲ្យ​ដឹង​ថា​ នាង​និង​ព្រះសង្ឃ​ សេង​ ឧត្តម​ បាន​ស្គាល់គ្នា​តាម​រយៈ​ទូរស័ព្ទ​ច្រឡំ​លេខ​ និង​ក៏​ឈាន​ដល់​មាន​ទំនាក់ទំនង​ស្នេហា​លួចលាក់​ជាមួយ​គ្នា​ចាប់តាំងពី​ខែមករា​ ឆ្នាំ​២០១៤​មក​ ។​ នា​រយៈពេល​មួយ​ គាប់​ជួន​ឪពុក​ម្តាយ​នាង​មិន​នៅផ្ទះ​ ហើយ​ព្រះសង្ឃ​ សេង​ ឧត្តម​ ក៏​បាន​និមន្ត​មក​លេង​ផ្ទះ​របស់​នាង​ និង​បាន​លួងលោម​នាង​រួមរ័ក​មេត្រី​ ដោយ​សន្យា​ថា​ នឹង​សឹក​លាចាក​សិក្ខាបទ​ចូល​ស្តីដណ្តឹង​នាង​ធ្វើ​ជា​ប្រពន្ធ​តាម​ប្រពៃណី​ ទើប​នាង​ជ្រុល​ប្រគល់​ខ្លួន​ប្រមាណ​ឲ្យ​សង្ឃ​កំហូច​ទាំង​គ្មាន​ស្តាយស្រណោះ​ ។​ លុះ​ក្រោយ​ពី​បាន​ខ្លួនប្រាណ​នាង​រួច​ហើយ​ ព្រះសង្ឃ​ សេង​ ឧត្តម​ បែរជា​គេចវេះ​មិន​ទទួលខុសត្រូវ​ចំពោះ​ការ​ប្រព្រឹត្ត​របស់​ខ្លួន​ឡើយ​ ព្រមទាំង​ញោម​របស់​សង្ឃ​អង្គ​នោះ​បាន​ជួយ​ជម្លៀស​សង្ឃ​កំហូច​ឲ្យ​គង់នៅ​វត្ត​ផ្សេង​ ឈ្មោះ​វត្ត​ចរិយា​វង្ស​ សង្កាត់​អូរ​ក្រសា​ ក្រុងកែប​ ខេត្ត​កែប​ ទៀត​ផង​ ។​

​អ្នកស្រី​ សេង​ រី​ ត្រូវជា​ម្តាយ​របស់​ស្រី​ក្រមុំ​រង​គ្រោះ​បាន​បញ្ជាក់​ឲ្យ​ដឹង​ថា​ ការ​ទំនាក់ទំនង​ស្នេហា​រវាង​កូនស្រី​គាត់​ និង​ព្រះសង្ឃ​អង្គ​នោះ​កាលពី​ដំណាក់កាល​ដំបូង​គាត់​មិន​បានដឹង​ឡើយ​ ហើយ​គាត់​បានដឹង​នៅ​ពេល​ឃើញ​កូនស្រី​មាន​អាកា​រៈ​ចេះ​តែ​ក្អួតចង្អោរ​របៀប​ចាញ់កូន​ ទើប​បែកធ្លាយ​រឿងរ៉ាវ​នេះ​តែ​ម្តង​ ខណៈ​ដែល​ព្រះសង្ឃ​អង្គ​នោះ​ព្យាយាម​គេចវេះ​មិន​ទទួលខុសត្រូវ​ទាល់តែ​សោះ​ ។​

​សូម​ស្ថាប័ន​មន្ទីរ​ធម្មការ​កិច្ចការ​សាសនា​ខេត្ត​ និង​ព្រះ​មេគណ​ខេត្ត​កែប​ មេត្តា​ស៊ើបអង្កេត​ត្រួតពិនិត្យ​លើ​ករណី​ព្រះសង្ឃ​ព្រះ​នាម​ សេង​ ឧត្តម​ លួច​មាន​សេ្ន​ហា​លួចលាក់​រហូត​ធ្វើ​ឲ្យ​កូនក្រមុំ​អ្នកស្រុក​មាន​ផ្ទៃពោះ​៤​ខែ​នេះ​ផង​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.