ថ្ងៃ ចន្ទ ទី ២៤ ខែ មករា ឆ្នាំ ២០២២

ឧកញ៉ា​ម្នាក់​ពីមុខ​សញ្ញា​ត្រូវ​តុលាការ​តាម​ចាប់ខ្លួន​ក្លាយជា​ទីប្រឹក្សា​ប្រធាន​គណបក្សកាន់អំណាច និង​ជា​ប្រធានព្រឹទ្ធសភា​

​មន្ត្រី​និង​ឈ្មួញ​មួយចំនួន​ដែល​ទទួលបាន​ការតែងតាំង​ជាទី​ប្រឹក្សា​ថ្នាក់ដឹកនាំ​ប្រទេស ជាពិសេស​ទីប្រឹក្សា​សម្តេច​អគ្គ​មហា​ធម្ម​ពោធិ​សាល ជា ស៊ីម ប្រធានព្រឹទ្ធសភា​នៃ​ព្រះរាជាណាចក្រ​កម្ពុជា និង​ជា​ប្រធាន​គណបក្ស​ប្រជាជន​កម្ពុជា​, ទីប្រឹក្សា​សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា​នៃ​ព្រះរាជាណាចក្រ​កម្ពុជា និង​ជា​ប្រធានកិត្តិយស​គណបក្ស​ប្រជាជន​កម្ពុជា និង​ទីប្រឹក្សា​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​ជា​អនុប្រធាន​គណបក្ស​ប្រជាជន​កម្ពុជា ដ៏​មាន​ឥទ្ធិពល​គឺ​មិនសូវ​ឲ្យ​តម្លៃ​ទៅលើ​សមត្ថភាព​នៃ​ចំណេះដឹង និង​ភាពថ្លៃថ្នូរ​ស្អាតស្អំ​របស់​ជន​ជាទី​ប្រឹក្សា​ទាំង​នោះទេ ប៉ុន្តែ​តែង​ផ្តោតជាសំខាន់​ទៅលើ​លុយកាក់​និង​ខ្សែ​បក្ខពួក​ប៉ុណ្ណោះ​។​

​មាន​ជន​ដែល​ទទួលបាន​ការតែងតាំង​ជាទី​ប្រឹក្សា​ថ្នាក់ដឹកនាំ​ខ្លះ​ជា​ពួក​ម៉ាហ្វីយ៉ា (Mafia) នៅ​បរទេស និង​ខ្លះទៀត​ជា​ជន​មុខសញ្ញា​ត្រូវ​តុលាការ​តាម​ចាប់ខ្លួន​ក្នុង​សំណុំរឿង​ព្រហ្មទណ្ឌ​… ។​ល​។

​ព័ស្ដុតាង​ជាក់ស្ដែង​បាន​បង្ហាញថា លោក​ឧកញ៉ា​ម្នាក់ ឈ្មោះ លី សាយ​ឃាង ជា​នាយក​ក្រុមហ៊ុន​ SKL​​ Group ដែលជាក្រុមហ៊ុនផ្គត់ផ្គង់​បណ្តាញ​ចរន្ដអគ្គិសនី​ត​ភ្ជាប់​ពី​ប្រទេស​ថៃ ប្រើប្រាស់​ក្នុង​ខេត្ត​ចំនួន​៣ នៃ​ប្រទេស​កម្ពុជា (​បន្ទាយមានជ័យ​, សៀមរាប និង​បាត់ដំបង​) ធ្លាប់​ត្រូវបាន​ស្ថាប័ន​តុលាការ​សាលាដំបូង​រាជធានី​ភ្នំពេញ ចេញ​ដីកា​ស្វែងរក​ចាប់ខ្លួន​ក្នុង​សំណុំរឿង​ខ្លែង​លិខិតស្នាម គៃបំបាត់​ទ្រព្យសម្បត្តិ និង​ប្រាក់​ក្រុមហ៊ុន ម៉េង ស្រ៊ាង កាលពី​អំឡុង​ចុងឆ្នាំ​២០០១ ផ្អើល​ដល់​បុរស​ខ្លាំង​ជា​នាយករដ្ឋមន្ត្រី​ចេញមុខ​អន្តរាគមន៍​សង្កត់​បន្ថែ​ម​ឲ្យ​មាន​ចំណាត់ការ​តាមច្បាប់​ទៅលើ​លោក​ឧកញ៉ា លី សាយ​ឃាង យ៉ាងសកម្ម​តាម​ស្មារតី​លិខិត​លេខ ២០៧៩​សជណ ចុះ​ថ្ងៃទី​២៤ ខែធ្នូ ឆ្នាំ​២០០១ របស់​ទីស្តីការគណៈរដ្ឋមន្ត្រី​។​

​ថ្វី​ដ្បិត​លោក​ឧកញ៉ា លី សាយ​ឃាង ធ្លាប់មាន​ឈ្មោះ​ជា​ជន​ត្រូវ​ចោទ និង​ធ្លាប់​តុលា​ការចេញ​ដីកាចាប់ខ្លួន​ក្នុង​សំណុំរឿង​ព្រហ្មទណ្ឌ​ក្តី ប៉ុន្តែ​លោក​ឧកញ៉ា លី សាយ​ឃាង ត្រូវ​ទទួលបាន​ការតែងតាំង​ឲ្យ​ធ្វើជា​ទីប្រឹក្សា​សម្តេច​អគ្គ​មហា​ធម្ម​ពោធិ​សាល ជា ស៊ីម ប្រធានព្រឹទ្ធសភា​នីតិកាល​ទី​២ មាន​ឋានៈ​ស្មើ​រដ្ឋមន្ត្រី ដោយ​ព្រះរាជក្រឹត្យ​លេខ​នស​/​រកត​/០៧១០/៦១៥ ចុះ​ថ្ងៃទី​២១ ខែកក្កដា ឆ្នាំ​២០១០ យ៉ាង​ហ៊ឺហា​ប្រកបដោយ​កិត្តិយស​។​

​ឥឡូវនេះ លោក​ឧកញ៉ា លី សាយ​ឃាង មិនទាន់​មានឈ្មោះ​តែងតាំង​ជាទី​ប្រឹក្សា​សម្តេច​អគ្គ​មហា​ធម្ម​ពោធិ​សាល ជា ស៊ីម ប្រធានព្រឹទ្ធសភា​នៃ​ព្រះរាជាណាចក្រ​កម្ពុជា នីតិកាល​ទី​៣ និង​ជា​ប្រធាន​គណបក្ស​ប្រជាជន​កម្ពុជា ឬ​ជាទី​ប្រឹក្សា​ថ្នាក់ដឹកនាំ​ប្រទេស​មកពី​គណបក្ស​ប្រជាជន​កម្ពុជា​រូប​ណាមួយ​បន្តទៀត​នៅឡើយ​៕​

 

 

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.