ថ្ងៃ អាទិត្យ ទី ១៤ ខែ សីហា ឆ្នាំ ២០២២

សម្បុក​ក្រុមចោរប្លន់​ជ្រក​ក្រោម​ស្លាក​ហាង​កែ​សម្ផស្ស​របស់​កញ្ញា​ស្រស់ស្អាត​ម្នាក់​ឈ្មោះ សៀង ម៉ី ត្រូវបាន​សមត្ថកិច្ច​ចម្រុះ​បង្ក្រាប​បំបែក​បាន​នៅ​រសៀល​ថ្ងៃនេះ​

​នៅវេលា​ម៉ោង​១៣ រសៀល​នា​ថ្ងៃទី​២២ ខែកុម្ភៈ ឆ្នាំ​២០១៤​នេះ សមត្ថកិច្ច​ចម្រុះ​មាន​ទាំង​កម្លាំង​កងរាជអាវុធហត្ថ និង​នគរបាល​ខណ្ឌ​សែន​សុខ សហការ​ជាមួយ​នគរបាល​ព្រហ្មទណ្ឌ​កម្រិត​ស្រាល​-​ធ្ងន់ នៃ​ស្នងការដ្ឋាន​នគរបាល​រាជធានី​ភ្នំពេញ បាន​បើក​ប្រតិបត្តិ​ការឡោមព័ទ្ធ​បង្ក្រាប​មុខសញ្ញា​ជនសង្ស័យ​ជា​ចោរប្លន់​ជ្រក​ក្រោម​ស្លាក​ហាង​កែ​សម្ផស្ស​មួយ​យីហោ (​សៀង ម៉ី មែក​អាប់​) របស់​កញ្ញា​ស្រស់ស្អាត​ម្នាក់​ឈ្មោះ សៀង ម៉ី មាន​ទីតាំង​ឋិត​នៅតាម​ផ្លូវ​បេតុង​លេខ​១៩៨៦ ក្បែរ​ស្ថានីយ៍​ប្រេងឥន្ធនៈ​សូគីម៉ិច ភូមិ​ភ្នំពេញ​ថ្មី សង្កាត់​ភ្នំពេញ​ថ្មី ខណ្ឌ​សែន​សុខ រាជធានី​ភ្នំពេញ  ដោយ​បំបែកសម្បុក​ក្រុមចោរប្លន់​ទាំងនេះ​បានសម្រេច ព្រមទាំង​ចាប់​ឃាត់ខ្លួន​ក្រុមចោរប្លន់​ចំនួន​៤​នាក់ និង​ឃាត់ខ្លួន​ម្ចាស់​ហាង​កែ​សម្ផស្ស​ដែល​ផ្តល់​ជម្រក​ឲ្យ​ក្រុមចោរប្លន់​នោះ​ផងដែរ​។​

​សមត្ថកិច្ច​បាន​ឲ្យ​ដឹងថា មុនពេល​កើតហេតុ​មាន​ជនរងគ្រោះ​ម្នាក់​ជា​ម្ចាស់​ទោចក្រយានយន្ត​ឈ្មោះ អ៊ា​ម វិច្ឆិកា អាយុ​២៣​ឆ្នាំ មុខរបរ​ជា​និស្សិត ដែល​ត្រូវ​ចោរប្លន់​កាលពី​វេលា​ម៉ោង​០២ រំលងអធ្រាត្រ​ឈានចូល​ថ្ងៃទី​១០ ខែកុម្ភៈ ឆ្នាំ​២០១៤ នៅ​ម្តុំ​គល់ស្ពាន ស្ទឹងមានជ័យ បាន​ប្រទះឃើញ​ទោចក្រយានយន្ត​របស់ខ្លួន ត្រូវបាន​ជនសង្ស័យ​២​នាក់​ជិះ​តាមផ្លូវ​រួចហើយ​ក៏បាន​ប្តឹងទៅ​សមត្ថកិច្ច​។ ក្រោយមក​សមត្ថកិច្ច​ក៏​តាម​ប្រមាញ់​ជនសង្ស័យ​នោះ​រហូតដល់​គោលដៅ​ចុងក្រោយ​ដែល​ជនសង្ស័យ​បាន​ជិះ​ទោចក្រយានយន្ត​ចូលទៅក្នុង​ហាង​កែ​សម្ផស្ស​យីហោ (​សៀង ម៉ី មែក​អាប់​) និង​បាន​ឡោមព័ទ្ធ​មុខសញ្ញា​តែម្តង ព្រមទាំង​បង្ក្រាបបាន​ក្រុម​ជនសង្ស័យ​ជា​ចោរប្លន់​ចំនួន​៤​នាក់ និង​ឃាត់ខ្លួន​ម្ចាស់​ហាង​កែ​សម្ផស្ស​ដែលជា​កញ្ញា​ស្រស់ស្អាត​ម្នាក់​បញ្ជូន​ខ្លួន​ទៅកាន់​ស្នងការ​រដ្ឋា​ន​នគរបាល​រាជធានី​ភ្នំពេញ​ដោយ​ប្រើប្រាស់​រយៈពេល​ប្រមាណ​ជិត​១​ម៉ោង​។​

​ក្រៅពី​ការឃាត់ខ្លួន​កញ្ញា​ស្រស់ស្អាត​ម្នាក់​ជា​ម្ចាស់​ហាង​កែ​សម្ផស្ស​យីហោ (​សៀង ម៉ី មែក​អាប់​) និង​បំបែកសម្បុក​ក្រុមចោរប្លន់​ទាំង​៤​នាក់​នោះ គឺ​សម្ថ​កិច្ច​ក៏បាន​រកឃើញ និង​ដកហូត​បាន​ទោចក្រយានយន្ត​ចំនួន​២​គ្រឿង​ជា​វត្ថុតាង​ផងដែរ ដែល​មួយគ្រឿង​ម៉ាក DUKE ពណ៌​លឿង​លាយ​ខ្មៅ និង​មួយគ្រឿង​ទៀត​ម៉ាក Honda C100 Fi ស៊េរី​ឆ្នាំ​២០១២ ពណ៌​ខ្មៅ​៕​

 

 

 

 

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.