ថ្ងៃ អាទិត្យ ទី ១៤ ខែ សីហា ឆ្នាំ ២០២២

ប្រធាន​សហជីព និង​សមាគម​ចំនួន​៦ ត្រូវបាន​សមាគម​ថៅកែ​រោងចក្រ​ប្តឹងទៅ​តុលាការ​ចោទប្រកាន់​ក្នុង​រឿង​ព្រហ្មទណ្ឌ​

ប្រធាន​សហជីព​ចំនួន​៥ និង​ប្រធាន​សមាគម​ចំនួន​១ ព្រមទាំង​គូកន​ត្រូវបាន​សមាគម​រោងចក្រ​កាត់ដេរ​នៅ​កម្ពុជា (GMAC) ប្តឹងទៅ​អយ្យការ​អម​សាលាដំបូង​រាជធានី​ភ្នំពេញ កាលពី​ថ្ងៃទី​០៦ ខែមករា ឆ្នាំ​២០១៤ ដោយ​ចោទប្រកាន់​អំពី​បទល្មើស​យ៉ាងច្រើន​ក្នុង​រឿង​ព្រហ្មទណ្ឌ​ជាអាទិ៍​៖ បទ​គំរាមកំហែង ដោយមាន​បញ្ជា​ឲ្យ​បំពេញ​លក្ខខណ្ឌ​អ្វីមួយ​, បទ​គំរាមកំហែង​ថា នឹងធ្វើ​ឲ្យ​ខូចខាត​, បទ​ធ្វើ​ឲ្យ​ខូចខាត​ដោយ​ចេតនា​មាន​ស្ថាន​ទម្ងន់ទោស​, បទ​ហិង្សា​ដោយ​ចេតនា​មាន​ស្ថាន​ទម្ងន់ទោស​… ។​ល​។​

​ប្រធាន​សហជីព និង​ប្រធាន​សមាគម ដែល​ត្រូវ​សមាគម​ថៅកែ​រោងចក្រ​កាត់ដេរ​ប្តឹង​ចោទប្រកាន់​ក្នុង​រឿង​ព្រហ្មទណ្ឌ​ជាច្រើន​បទល្មើស​ទៅ​ស្ថាប័ន​អយ្យការ​អម​សាលាដំបូង​រាជធានី​ភ្នំពេញ​នោះ​រួមមាន​៖ ១- លោក អាត់ ធន់ ប្រធាន​ស​ម្ព័​ន​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា (C.CAWDU) ២- លោកស្រី ម៉ម ញឹម ប្រធាន​សហព័ន្ធ​សហជីព​ជាតិ​នៃ​ឧស្សាហកម្ម​កាត់ដេរ​កម្ពុ​ជា (NIFTUC) ៣- លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្ពុជា (CUMW) ៤- លោក ជា មុនី ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា (FTUWKC) ៥- លោក រ៉ុង ឈុន ប្រធាន​សមាគម​គ្រូបង្រៀន​កម្ពុជា​ឯករាជ្យ (CITA) និង ៦- លោកស្រី យ៉ាង សុ​ភ័​ណ្ឌ ប្រធាន​សម្ព័ន្ធ​សហជីព​កម្ពុជា (CATU) ។​

​សមាគម​ថៅកែ​រោងចក្រ​កាត់ដេរ​កម្ពុជា បានធ្វើការ​ចោទប្រកាន់​ថា ចាប់តាំងពី​ថ្ងៃទី​២៥ ខែធ្នូ ឆ្នាំ​២០១៣ បន្ត​បន្ទាប់មក ក្រុម​សហជីព និង​សមាគម​ទាំង​៦ ព្រមទាំង​គូកន បានធ្វើ​សកម្មភាព​ដឹកនាំ​បាតុកម្ម និង​ញុះញង់​នឹង​ដឹកនាំ​បាតុកម្ម ដោយ​ប្រើ​រូបភាព​គំរាមកំហែង​ធ្វើ​ឲ្យ​ខាតបង់​ដល់​និយោជក ដែលជា​សមាជិកសមាគម​របស់ខ្លួន​យ៉ាងធ្ងន់ធ្ងរ​។​

​រហូតមក​ទល់នឹង​ពេលនេះ ខាង​តំណាង​អយ្យការ​អម​សាលាដំបូង​រាជធានី​ភ្នំពេញ​មិនទាន់​បានចេញ​ដីកាកោះ​ប្រធាន​សហជីព និង​សមាគម​ទាំង​៦ ឲ្យ​ចូលខ្លួន​ឆ្លើយបំភ្លឺ​ដោះ​បន្ទុក​នៅ​តុលាការ​នៅឡើយ​ទេ​។​

​ដោយឡែក សហជីព​ទាំង​៥ និង​សមាគម​ចំនួន​១ ក្នុងចំណោម​សហជីព និង​សមាគម​ចំនួន​១៨ បានធ្វើការ​អំពាវនាវ​កាលពី​ថ្ងៃទី​១៣ ខែកុម្ភៈ ឆ្នាំ​២០១៤ ឲ្យ​សមាជិក សមាជិកា បងប្អូន​កម្មករ និយោជិត មន្ត្រីរាជការ និង​ប្រជាពលរដ្ឋ​ចូលរួម​ធ្វើពហិការ​មិន​ធ្វើការ​ថែម​ម៉ោង​នៅ​គ្រប់​បណ្តា​រោងចក្រ សហគ្រាស និង​គ្រឹះស្ថាន​ទាំងអស់​ចាប់ពី​ថ្ងៃទី​២៤ ខែកុម្ភៈ ដល់​ថ្ងៃទី​២៨ ខែកុម្ភៈ ឆ្នាំ​២០១៤ និង​ចូលរួម​វេទិកាសាធារណៈ​នៅ​ទីលាន​ប្រជាធិបតេយ្យ​នា​ថ្ងៃទី​០៨ ខែមីនា ឆ្នាំ​២០១៤ និង​គ្រោង​ដឹកនាំ​ធ្វើ​កូដកម្ម​ធំ​ទូទាំងប្រទេស​ចាប់ពី​ថ្ងៃទី​១២ ខែមីនា ដល់​ថ្ងៃទី​១៥ ខែមីនា ឆ្នាំ​២០១៤ ដើម្បី​ទាមទារ​ឲ្យ​និយោជក និង​រាជរដ្ឋាភិបាល​ដោះស្រាយ​បញ្ហា​ចំនួន​៧​ចំណុច​ដូចខាងក្រោម​៖ 

១-​សុំ​ដោះ​លែង​ជនជាប់ចោទ​ទាំង​២១​នាក់​ និង​ទម្លាក់​ចោលការ​ចោទប្រកាន់​២៣​នាក់​ទាំងស្រុង​

២-​ស្នើ​សុំ​ឲ្យ​មានការ​ចរចា​ដំឡើង​ប្រាក់​ឈ្នួល​គោល​១៦០​ដុល្លារ​ក្នុង​១​ខែ​ឡើង​វិញ​

៣-​ត្រូវ​ដាក់ទោស​ដល់​ជនល្មើស​ដែល​បាន​ប្រើ​ហិង្សា​ និង​សម្លាប់​កម្មករ​ ព្រមទាំង​ផ្តល់​សំណង​ជំងឺ​ចិត្ត​ដល់​ជន​រង​គ្រោះ​ដែល​បាន​បាត់បង់​ជីវិត​ រង​របួស​ និង​ជាប់​ឃុំឃាំង​

៤-​រាជរដ្ឋាភិបាល​ត្រូវ​ដក​បម្រាម​នៃ​ការ​ជួប​ប្រជុំ​ជា​សាធារណៈ​របស់​ប្រជាពលរដ្ឋ​ចេញ​វិញ​ និង​លុប​ចោលការ​ព្យួរ​ការ​ចុះ​បញ្ជិកា​អង្គការ​វិជ្ជាជីវៈ​ពី​ក្រសួង​ការងារ​ និង​បណ្តុះបណ្តាល​វិជ្ជាជីវៈ​

៥-​តំណាង​ក្រុមហ៊ុន​ត្រូវ​ដក​បណ្តឹង​ដែល​ប្រឆាំង​សហជីព​ និង​កម្មករ​ និយោជិត​ទាំងអស់​

៦-​និយោជក​ត្រូវ​ទទួលយក​កម្មករ​ដែល​បាន​បញ្ឈប់​ពី​ការងារ​ឲ្យ​ចូល​ធ្វើការ​វិញ​ ព្រមទាំង​បង់ប្រាក់​រំលឹក​ដល់​ពួក​គេ​ឲ្យ​បាន​គ្រប់ៗ​គ្នា​

៧-​និយោជក​ណា​ដែល​បាន​កាត់​ប្រាក់​ឈ្នួល​ និង​ប្រាក់​រង្វាន់​ទៀងទាត់​ក្នុងអំឡុងពេល​ធ្វើ​កូដកម្ម​ ឬ​កន្លង​មក​ ត្រូវ​ផ្តល់​ជូន​ដល់​កម្មករ​វិញ​៕

Chea-Mony8898

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.