ថ្ងៃ អង្គារ ទី ៣០ ខែ វិច្ឆិកា ឆ្នាំ ២០២១

អង្គភាព​ប្រឆាំង​អំពើ​ពុក​រលួយ​ចាប់​ឃាត់ខ្លួន​ក្រឡាបញ្ជី​សាលាដំបូង​ខេត្តស្វាយរៀង​ម្នាក់​ពាក់ព័ន្ធ​នឹង​រឿង​ពុក​រលួយ​

​កាលពី​ថ្ងៃ​ទី​១៨​ ខែកុម្ភៈ​ ឆ្នាំ​២០១៤​កន្លង​មក​ ក្រឡាបញ្ជី​នៃ​សាលាដំបូង​ខេត្តស្វាយរៀង​ម្នាក់​ ត្រូវ​បាន​អង្គភាព​ប្រឆាំង​អំពើ​ពុក​រលួយ​ ដែល​មាន​ឯកឧត្តម​បណ្ឌិត​ ឱម​ យ៉ិ​ន​ទៀង​ ជា​ប្រធាន​ ធ្វើការ​ចាប់​ឃាត់ខ្លួន​ ពាក់ព័ន្ធ​នឹង​រឿង​ពុក​រលួយ​ក្នុង​ស្ថាប័ន​តុលាការ​ និង​បញ្ជូន​ឲ្យ​ស្ថាប័ន​អយ្យការ​អម​សាលាដំបូង​ខេត្តស្វាយរៀង​ ចាត់ការ​តាម​នីតិវិធី​បន្ត​ ។​

​ប្រភព​ព័ត៌មាន​ពី​មន្ត្រី​អង្គភាព​ប្រឆាំង​អំពើ​ពុក​រលួយ​ បាន​ឲ្យ​ដឹង​ថា​ ក្រឡាបញ្ជី​នៃ​សាលាដំបូង​ខេត្តស្វាយរៀង​ដែល​ត្រូវ​អង្គភាព​ប្រឆាំង​អំពើ​ពុក​រលួយ​ធ្វើការ​ចាប់​ឃាត់ខ្លួន​នោះ​ ឈ្មោះ​ ម៉ុ​ញ​ សា​រ៉េ​ន​ ភេទ​ប្រុស​ អាយុ​៤៨​ឆ្នាំ​ ក្រោម​ការ​ចោទប្រកាន់​ពី​បទ​ស៊ីសំណូក​ ហើយ​អង្គភាព​ប្រឆាំង​អំពើ​ពុក​រលួយ​បាន​កសាង​សំណុំរឿង​ និង​បញ្ជូន​ខ្លួន​ក្រឡាបញ្ជី​រូប​នេះ​មក​ស្ថាប័ន​អយ្យការ​អម​សាលាដំបូង​ខេត្តស្វាយរៀង​ចាត់ការ​បន្ត​តាម​នីតិវិធី​ ។​

​ករណី​ចាប់​ឃាត់ខ្លួន​លោក​ក្រឡាបញ្ជី​ ម៉ុ​ញ​ សា​រ៉េ​ន​ ជា​កូនចៅ​របស់​លោក​ចៅក្រម​ កើត​ សាំង​ ពាក់ព័ន្ធ​នឹង​រឿង​ពុក​រលួយ​ ខាង​តំណាង​អយ្យការ​អម​សាលាដំបូង​ខេត្តស្វាយរៀង​ បាន​សាកសួរ​អស់​ជា​ច្រើន​ម៉ោង​នា​រសៀល​ថ្ងៃ​ទី​២១​ ខែកុម្ភៈ​ ឆ្នាំ​២០១៤​នេះ​ ប៉ុន្តែ​មិន​ទាន់​បានដឹង​អំពី​លទ្ធផល​នៃ​ចំណាត់ការ​របស់​ស្ថាប័ន​អយ្យការ​អម​សាលាដំបូង​ខេត្តស្វាយរៀង​នៅឡើយ​ទេ​ ខណៈ​ដែល​មជ្ឈដ្ឋាន​នានា​រំពឹង​ទុក​ថា​ ភាគច្រើន​នឹង​មានការ​ចោទប្រកាន់​ជា​ផ្លូវការ​ប្តឹង​ទៅ​ចៅក្រម​ស៊ើបសួរ​បន្ត​ ។​

​លោក​ ម៉ុ​ញ​ សា​រ៉េ​ន​ អាយុ​៤៨​ឆ្នាំ​ ជា​ក្រឡាបញ្ជី​សាលាដំបូង​ខេត្តស្វាយរៀង​ ដោយ​បាន​ឆ្លងកាត់​សុក្រឹតការ​ជាប់​ក្នុង​វគ្គ​ទី​៦​នៃ​រាជបណ្ឌិត្យសភា​វិជ្ជាជីវៈ​តុលាការ​ ។​ លោក​បាន​ចូល​បម្រើ​ការងារ​រដ្ឋ​នៅ​ឆ្នាំ​១៩៨៥​ ។​

​មជ្ឈដ្ឋាន​អ្នក​តាមដាន​វិស័យ​តុលាការ​នៅ​កម្ពុជា​ បាន​លើក​ឡើង​ថា​ តាម​ធម្មតា​ ក្រឡាបញ្ជី​ដែល​ជា​កូនចៅ​របស់​ចៅក្រម​ បើ​ចង់​ប្រព្រឹត្ត​អំពើ​ពុក​រលួយ​ គឺ​ទំនងជា​មិន​អាច​ថ្លើមធំ​ហ៊ាន​មិន​ឆ្លងកាត់​ចៅក្រម​ជា​មេ​កើយ​របស់​ខ្លួន​នោះ​ទេ​ ។​ ដូច្នេះ​ ករណី​ពុក​រលួយ​របស់​លោក​ក្រឡាបញ្ជី​ ម៉ុ​ញ​ សា​រ៉េ​ន​ ត្រូវ​តែ​មានការ​ពាក់ព័ន្ធ​ជាមួយនឹង​លោក​ចៅក្រម​ កើត​ សាំង​ ប្រសិនបើ​មានការ​ស្រាវជ្រាវ​បន្ត​ឲ្យ​បាន​ដិត​ដល់​ ។​

​លោក​ចៅក្រម​ កើត​ សាំង​ ដែល​ល្បីល្បាញ​ថា​ មាន​ខ្សែ​ បក្ខពួក​ធំ​នោះ​ ជា​សិស្ស​ចៅក្រម​ជំនាន់​ទី​៤​ សាលា​ភូមិន្ទ​ចៅក្រម​នៃ​រាជបណ្ឌិត្យសភា​វិជ្ជាជីវៈ​តុលាការ​ ដែល​ត្រូវ​បាន​តែងតាំង​ឲ្យ​បម្រើ​ការងារ​ជា​ចៅក្រម​កម្មសិក្សា​នៅ​សាលាដំបូង​ខេត្តស្វាយរៀង​ ដោយ​ព្រះរាជក្រឹត្យ​លេខ​ន​ស​/​រក​ត​/០៣១១/២៣៣​ ចុះ​ថ្ងៃ​ទី​១០​ ខែមីនា​ ឆ្នាំ​២០១១​ និង​ត្រូវ​បាន​តាំងស៊ប់​ក្នុង​ក្របខ័ណ្ឌ​ចៅក្រម​បម្រើ​ការងារ​នៅ​សាលាដំបូង​ខេត្តស្វាយរៀង​ទល់​បច្ចុប្បន្ន​ ដោយ​ព្រះរាជក្រឹត្យ​លេខ​ន​ស​/​រក​ត​/០៦១២/៥៩១​ ចុះ​ថ្ងៃ​ទី​២១​ ខែមិថុនា​ ឆ្នាំ​២០១២​ ៕​

 

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.