ថ្ងៃ ពុធ ទី ២២ ខែ កញ្ញា ឆ្នាំ ២០២១

តារា​សម្តែង​ ច​ន​ ច័ន្ទ​ល​ក្ខិ​ណា​ បដិសេធ​ការ​លែងលះ​ស្វាមី​មក​ពី​ស្នេហា​ត្រីកោណ​ជាមួយ​នាយ​ឧត្តមសេនីយ៍​ពោះម៉ាយ​ម្នាក់​

​បន្ទាប់​ពី​តារា​សម្តែង​ជើង​ចាស់​ និង​ជា​ពិធី​ការិនី​ក្នុង​កម្មវិធី​"​សមាគម​ជុំ​មិត្ត​"​នៃ​ស្ថានីយ៍ទូរទស្សន៍​បាយ័ន​ ច​ន​ ច័ន្ទ​ល​ក្ខិ​ណា​ ដាក់​ពាក្យសុំ​លែងលះ​ប្តី​គឺ​លោក​ យុ​ត្ថា​រ៉ា​ ឆា​នី​ ទៅ​តុលាការ​សាលាដំបូង​រាជធានី​ភ្នំពេញ​ ជិត​២​ខែ​កន្លង​មក​ និង​អ្នក​នាង​អម​ដោយ​មេធាវី​តំណាង​ដោយ​អាណត្តិ​ បាន​ទៅ​បំពេញ​នីតិវិធី​ត្រៀម​ទាញហេតុផល​ដោយ​ផ្ទាល់មាត់​ នៅ​ចំពោះ​មុខ​ចៅក្រម​ទទួល​បន្ទុក​សំណុំរឿង​រួច​ជា​ស្រេច​ កាលពី​ថ្ងៃ​ទី​៣១​ ខែតុលា​ ឆ្នាំ​២០១៣​នោះ​ បាន​ធ្វើ​ឲ្យ​លេច​ចេញ​នូវ​ព័ត៌មាន​ភ្ញាក់ផ្អើល​កក្រើក​ក្នុង​ពិភព​សិល្បៈ​ថា​ មក​ពី​អ្នក​នាង​ ច​ន​ ច័ន្ទ​ល​ក្ខិ​ណា​ លេងល្បែង​ស្នេហា​ត្រីកោណ​ជាមួយ​ឯកឧត្តម​នាយ​ឧត្តមសេនីយ៍​ផ្កាយ​មាស​៤​ម្នាក់​ ទើប​នាំ​ឲ្យ​ស្នេហា​ប្តី​ប្រពន្ធ​កម្សត់កម្រ​របស់​អ្នក​នាង​ជាមួយ​លោក​ យុ​ត្ថា​រ៉ា​ ឆា​នី​ ទទួល​រង​ការ​ប៉ះទង្គិច​រហូត​ដំណាក់កាល​ប្រេះស្រាំ​បែកបាក់​ ។​

​មជ្ឈដ្ឋាន​អ្នកសិល្បៈ​ រួម​ទាំង​ការ​ចុះ​ផ្សាយ​របស់​សារព័ត៌មាន​មួយ​ចំនួន​ បាន​ភ្ជាប់​ស្នេហា​ត្រីកោណ​របស់​តារា​សម្តែង​ជើង​ចាស់​ ច​ន​ ច័ន្ទ​ល​ក្ខិ​ណា​ ទៅ​នឹង​ឯកឧត្តម​ នាយ​ឧត្តមសេនីយ៍​ផ្កាយ​មាស​៤​ ជា​ តារា​ នាយទាហានជាន់ខ្ពស់​នៃ​កង​យោធពលខេមរភូមិន្ទ​ ដែល​ជា​នាយទាហាន​ពោះម៉ាយ​កូន​២​ ដោយ​អ្នក​សារព័ត៌មាន​ខ្លះ​បាន​ផ្សព្វផ្សាយ​ថា​ "​បើ​ ច​ន​ ច័ន្ទ​ល​ក្ខិ​ណា​ លែងលះ​ប្តី​ដាច់​ស្រឡះ​នោះ​ មន្ត្រី​ធំ​ពាក់​ផ្កាយ​៤​លើ​ស្មា​ នឹង​រៀប​ការ​ជាមួយ​ ច​ន​ ច័ន្ទ​ល​ក្ខិ​ណា​ ដោយ​បើកចំហ​ ហើយ​ ល​ក្ខិ​ណា​ នឹង​ក្លាយជា​លោក​ជំទាវ​មាន​អង្គរក្ស​តាម​ការពារ​ឆ្វេង​ស្តាំ​ជាក់​ជា​មិន​ខាន​"​ ។​

​ទាក់ទង​នឹង​ព័ត៌មាន​ចុះ​ផ្សាយ​ព្រោងព្រាត​ទាំងនោះ​ តារា​សម្តែង​ជើង​ចាស់​ ច​ន​ ច័ន្ទ​ល​ក្ខិ​ណា​ បាន​ប្រកាសប្រាប់​បណ្តាញឃោសនា​នានា​ដែរ​ថា​ ការ​បែកបាក់​ឬ​មិន​បែកបាក់​ជាមួយ​ស្វាមី​របស់​អ្នក​នាង​ គឺជា​រឿង​ជីវិត​ឯកជន​ផ្ទៃក្នុង​គ្រួសារ​ប៉ុណ្ណោះ​ គ្មាន​ពាក់ព័ន្ធ​នឹង​មេទ័ព​ពោះម៉ាយ​ ឬ​បុគ្គល​ណា​ផ្សេង​ដែល​ជា​បុគ្គល​ទី​៣​ចូល​ជ្រៀតជ្រែក​ឡើយ​ ហើយ​បញ្ហា​ទាំងនេះ​គឺ​កើត​ចេញពី​ការ​រស់នៅ​មិន​ចុះសម្រុង​គ្នា​ ទើប​យើង​ត្រូវ​ជ្រើសរើស​យក​ការ​ចែកផ្លូវ​គ្នា​ដើរ​ ។​

​អ្នក​នាង​ ច​ន​ ច័ន្ទ​ល​ក្ខិ​ណា​ បាន​ប្រកាស​ឲ្យ​ដឹង​ទៀត​ថា​ ការ​និយាយ​រិះគន់​មក​លើ​រូប​អ្នក​នាង​ថា​ មាន​ស្នេហា​ត្រីកោណ​ជាមួយ​មេទ័ព​ពោះម៉ាយ​ផ្កាយ​៤​នោះ​ គឺជា​ការ​បរិហារកេរ្តិ៍​ប៉ះពាល់​ដល់​កិត្តិយស​ និង​សេចក្តី​ថ្លៃថ្នូរ​របស់​អ្នក​នាង​យ៉ាងធ្ងន់ធ្ងរ​ ។​

​សូម​បញ្ជាក់​ជូន​ថា​ លោក​ឧត្តមសេនីយ៍ឯក​ ជា​ តារា​ នាយទាហានជាន់ខ្ពស់​នៃ​កង​យោធពលខេមរភូមិន្ទ​ អត្តលេខ​០០០១៨៣​ ត្រូវ​បាន​តែងតាំង​ជា​អគ្គមេបញ្ជាការ​រង​នៃ​កង​យោធពលខេមរភូមិន្ទ​ ដោយ​ព្រះរាជក្រឹត្យ​លេខ​ន​ស​/​រក​ត​/០១០៩/០៦១​ ចុះ​ថ្ងៃ​ទី​២២​ ខែមករា​ ឆ្នាំ​២០០៩​ និង​ត្រូវ​បាន​តែងតាំង​ជាទី​ប្រឹក្សា​ផ្ទាល់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ អាណត្តិ​ទី​៤​ ដោយ​ព្រះរាជក្រឹត្យ​លេខ​ន​ស​/​រក​ត​/០៦០៩/៦៤៦​ ចុះ​ថ្ងៃ​ទី​១៣​ ខែមិថុនា​ ឆ្នាំ​២០០៩​ ។​

​លុះ​ក្រោយមក​ ឯកឧត្តម​ ឧត្តមសេនីយ៍​ ជា​ តារា​ ត្រូវ​បាន​ដំឡើង​ឋានន្តរស័ក្តិ​ជា​នាយ​ឧត្តមសេនីយ៍​ផ្កាយ​មាស​៤​ដោយ​ព្រះរាជក្រឹត្យ​លេខ​ន​ស​/​រក​ត​/០៣១០/២២០​ ចុះ​ថ្ងៃ​ទី​០៩​ ខែមីនា​ ឆ្នាំ​២០១០​ ហើយ​ក៏​ត្រូវ​បាន​តែងតាំង​ជា​មេបញ្ជាការ​សមរភូមិ​ទិស​ប្រាសាទព្រះវិហារ​នា​សម័យ​ផ្ទុះអាវុធ​ជាមួយ​កងកម្លាំង​យោធា​ថៃ​ទៀត​ផង​ ៕​  Chea-TaraChan-Chanleakhena-20Chan-Chanleakhena-10

Filed in: Feature, សិល្បៈកម្សាន្ត

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.