ថ្ងៃ អាទិត្យ ទី ១៤ ខែ សីហា ឆ្នាំ ២០២២

ប៉ូលិស​ធ្វេសប្រហែស​ជនសង្ស័យ​យក​កាំភ្លើង​ប៉ូលិស​បាញ់​សម្លាប់ខ្លួន​ផ្អើល​ប៉ុស្តិ៍​ព្រែកប្រា​

​ខណៈដែល​សមត្ថកិច្ច​នគ​របាល​ជាច្រើន​រយ​នាក់​កំពុង​ប្រមូលផ្តុំ​កម្លាំង​ត្រៀម​ទប់ទល់​នឹង​ក្រុមបាតុករ​ជា​កម្មករ កម្មការិនី​រោងចក្រ SL នៅ​ម្តុំ​ស្ពាន​ស្ទឹងមានជ័យ​រហូតដល់​ប​ង្ក​ឲ្យ​ផ្ទុះ​អំពើហិង្សា​មាន​មនុស្ស​ស្លាប់ និង​របួស​នោះ ដោយឡែក​នៅ​ប៉ុស្តិ៍នគរបាល​រដ្ឋបាល​ព្រែកប្រា​ឯណោះ​វិញ​មាន​ករណី​ផ្ទុះអាវុធ​មួយ​បាន​កើតឡើង​ក្នុង​បន្ទប់​ឃាត់ខ្លួន​ជនសង្ស័យ​តែម្តង ដោយសារ​ជនសង្ស័យ​ដែល​ប៉ូលិស​ប៉ុស្តិ៍​ឃាត់ខ្លួន​ម្នាក់​យក​កាំភ្លើង​ប៉ូលិស​បាញ់សម្លាប់​ខ្លួនឯង ធ្វើ​ឲ្យ​ផ្អើល​ប៉ុស្តិ៍​ប៉ូលិស​ព្រែកប្រា​ទាំង​ព្រឹក​។​

​សមត្ថកិច្ច​បាន​ប្រាប់​ឲ្យ​ដឹងថា ហេតុការណ៍​ផ្ទុះអាវុធ​នេះ​បាន​កើតឡើង​នៅវេលា​ម៉ោង​០៩ និង​៣០​នាទី​ព្រឹក នា​ថ្ងៃទី​១២ ខែវិច្ឆិកា ឆ្នាំ​២០១៣​នេះ នៅ​ទីស្នាក់ការ​ប៉ុស្តិ៍នគរបាល​រដ្ឋបាល​ព្រែកប្រា មាន​ទីតាំង​តាម​បណ្តោយ​ផ្លូវ​លេខ​៣៦៩ សង្កាត់​ព្រែកប្រា ខណ្ឌមានជ័យ រាជធានី​ភ្នំពេញ ដោយ​ជនសង្ស័យ​ម្នាក់​ឈ្មោះ ឃឹម រ៉ា ភេទ​ប្រុស អាយុ​២៤​ឆ្នាំ មានមុខរ​បរជា​កម្ម​ករ​សំណង់ បាន​យក​កាំភ្លើងខ្លី​ម៉ាក​រ៉ូឡូ របស់​មន្ត្រីនគរបាល​ប៉ុស្តិ៍​ឈ្មោះ ជន សុ​ទិវា បាញ់សម្លាប់​ខ្លួន​។​

​ព័ត៌មាន​ជំហាន​ដំបូង​ត្រូវបាន​សមត្ថកិច្ច​ប្រាប់​ឲ្យ​ដឹងថា នៅវេលា​ព្រឹក​នា​ថ្ងៃកើតហេតុ​មន្ត្រីនគរបាល​ឈ្មោះ ជន សុ​ទិវា ដែលជា​ម្ចាស់​កាំភ្លើង​បាន​ទុក​កាំភ្លើងខ្លី​ម៉ាក​រ៉ូឡូ ក្នុង​ថតតុ​របស់ខ្លួន​ក្នុង​បន្ទប់​ឃាត់ខ្លួន​ជនសង្ស័យ​តែ​មិន​បានដាក់​ខ្នោះដៃ​ជនសង្ស័យ​ទេ​។ ទំនងជា​ភ្លេចភ្លាំង​ដោយ​ការធ្វេសប្រហែស មន្ត្រីប៉ូលិស​រូបនោះ​បាន​ដើរ​ចេញពី​បន្ទប់​មក​ក្រៅ ដើម្បី​ស្រស់ស្រូប​អាហារ​ពេលព្រឹក ដោយ​ចាក់សោ​ទ្វារ​បន្ទប់​ពី​ខាងក្រៅ ទុក​ជនសង្ស័យ​ក្នុង​បន្ទប់​ម្នាក់ឯង ប៉ុន្តែ​មិនបាន​ចាក់សោ​ថតតុ​ទុកដាក់​កាំភ្លើង​ឡើយ​ជាហេតុ​ធ្វើ​ឲ្យ​ជនសង្ស័យ​ឆ្លៀតឱកាស​ទាញ​បើក​ថតតុ​យក​កាំភ្លើង​របស់​ប៉ូលិស​បាញ់​សម្លាប់ខ្លួន​ក្នុង​បន្ទប់​តែម្តង បង្ក​ឲ្យ​មានការ​ភ្ញាក់ផ្អើល​ប៉ុស្តិ៍​ព្រែកប្រា​ទាំង​ព្រឹក​។​

​ទាំងនេះ គឺជា​កំហុស​នៃ​ការធ្វេសប្រហែស​របស់​ម​ន្ត្រី​នគរបាល​ដែល​នាំ​ឲ្យ​មាន​ករណី​ជនសង្ស័យ​បាញ់សម្លាប់​ខ្លួន​ក្នុង​ប៉ុស្តិ៍​ប៉ូលិស​ដោយ​នឹកស្មាន​មិន​ដល់ និង​ក៏​អាច​ទុកជា​បទពិសោធន៍​សម្រាប់​ប៉ូលិស​ដទៃទៀត​ផងដែរ​៕​

1274363035_n

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.