ថ្ងៃ ពុធ ទី ២៩ ខែ មិថុនា ឆ្នាំ ២០២២

ស្វែងយល់​អំពី​ភារកិច្ច​របស់​នាយករ​ដ្ឋ​មន្ត្រី និង​ឧបនាយករដ្ឋមន្ត្រី​ទាំង​៩ សម្រាប់​រាជរដ្ឋាភិបាល​អាណ​តិ្ត​ទី​៥

របៀបរបប​ការងារ និង​ការបែងចែក​ភារកិច្ច​របស់​ថ្នាក់ដឹកនាំ​រាជរដ្ឋាភិបាល​នីតិកាល​ទី​៥​នៃ​រដ្ឋសភា​គណបក្ស​ប្រជាជន​កម្ពុជា ត្រូវបាន​កំណត់ដោយ​សេចក្តីសម្រេច​របស់​រាជ​រដ្ឋាភិបាល​លេខ​២៨​សសរ ចុះ​ថ្ងៃទី​២៥ ខែកញ្ញា ឆ្នាំ​២០១៣ ដូចតទៅ​៖

១- នាយករដ្ឋមន្ត្រី​៖ សម្តេច​អគ្គមហាសេនាបតី​តេ​ជោ ហ៊ុន សែន ទទួលបន្ទុក​ដឹកនាំ​ការងារ​រួម​របស់​គណៈរដ្ឋមន្ត្រី និង​ចាត់ចែង​បញ្ជា​រាល់​សកម្មភាព​របស់​រា​ជ​រដ្ឋាភិបាល​លើ​គ្រប់​វិស័យ​។​

២- ឧបនាយករដ្ឋមន្ត្រី​៖ 

​ក​. ឯកឧត្តម ស ខេង​៖ ឧបនាយករដ្ឋមន្ត្រី ទទួលបន្ទុក​ជា​នាយករដ្ឋមន្ត្រី​ស្តីទី ពេល​នាយករដ្ឋមន្ត្រី​អវត្តមាន​, ជួយ​នាយករដ្ឋមន្ត្រី​លើ​ការងារ​សន្តិសុខ​ជាតិ ការងារ​ប្រយុទ្ធប្រឆាំង​គ្រឿងញៀន និង​ការជួញដូរ​មនុស្ស​, ដឹកនាំ​ប្រតិបត្តិ​ការទប់ស្កាត់​និង​ប្រឆាំង​ភេរវកម្ម​, ដឹកនាំ​គណៈកម្មាធិការ​ជាតិ​កែទម្រង់​វិមជ្ឈការ និង​វិសហមជ្ឈការ «​គជ​វ​វ​» និង​ការ​បំផ្លាញចោល​អាវុធ ព្រមទាំង​ការងារ​ភូមិ​-​ឃុំ​មាន​សុវត្ថិភាព​។​

​ខ​. ឯកឧត្តម សុខ អាន​៖ ឧបនាយករដ្ឋមន្ត្រី ទទួលបន្ទុក​សម្របសម្រួល​កិច្ចការ​សម្រាប់​គណៈរដ្ឋមន្ត្រី នាយករដ្ឋមន្ត្រី និង​បណ្តា​ឧបនាយករដ្ឋមន្ត្រី​, ជួយ​នាយករដ្ឋមន្ត្រី​ក្នុង​ការងារ​តាមដាន​សម្របសម្រួល​ដំណើរការ​តុលាការ​កាត់ទោស​អតីត​មេដឹកនាំ​ខ្មែរក្រហម​, ដឹកនាំ​ផ្ទាល់​អាជ្ញាធរ​ប្រេងកាត​ជាតិ​កម្ពុជា អាជ្ញាធរ​អប្សរា គណៈកម្មការ UNESCO និង​ក្រុមប្រឹក្សា​អ្នកច្បាប់ ព្រមទាំង​ជួយ​នាយករដ្ឋមន្ត្រី​ក្នុងការ​រៀបចំ​ចម្លើយ​តប​នឹង​សំណួរ​របស់​សមាជិករ​ដ្ឋ​សភា ស្របតាម​នីតិវិធី​ដូច​មានចែង​ក្នុង​មាត្រា​៩៦​នៃ​រដ្ឋធម្មនុញ្ញ​។​

​គ​. ឯកឧត្តម ទៀ បាញ់​៖ ឧបនាយករដ្ឋមន្ត្រី ទទួលបន្ទុក​ការងារ​ការពារជាតិ​, ទទួល​សិទ្ធិ​ពី​នាយករដ្ឋមន្ត្រី​ក្នុង​ការបញ្ជា​កងរាជអាវុធហត្ថ​លើ​ផ្ទៃ​ប្រទេស​, ដឹកនាំ​កិច្ច​ការបញ្ជូន​កងកម្លាំង​ចូលរួម​បេសកកម្ម​រក្សា​សន្តិភាព​របស់​អង្គការសហប្រជាជាតិ និង​ទទួល​សិទ្ធិ​ពី​នាយករដ្ឋមន្ត្រី​ក្នុង​ការបញ្ជា​អង្គភាព​ពិសេស​ប្រឆាំង​ភេរវកម្ម​ក្នុងពេល​នាយករដ្ឋមន្ត្រី​អវត្តមាន​។​

​ឃ​. ឯកឧត្តម គាត ឈន់​៖ ឧបនាយករដ្ឋមន្ត្រី ទទួលបន្ទុក​ប្រចាំការ​ដោះស្រាយ​ការងារ​ប្រចាំថ្ងៃ​ជំនួស​នាយករដ្ឋមន្ត្រី​, ទទួលបន្ទុក​ការងារ​សេដ្ឋកិច្ច និង​ហិរញ្ញវត្ថុ និង​ជា​អនុប្រធាន​ទី​១​នៃ​ក្រុមប្រឹក្សា​អភិវឌ្ឍន៍​កម្ពុជា​, ការងារ​អភិវឌ្ឍន៍​វិស័យ​ឯកជន​, ការងារ​ភាពជា​ដៃគូ​ក្នុង​កិច្ចអភិវឌ្ឍន៍​ជាមួយ​តួអង្គ​អភិវឌ្ឍន៍​ដែលមាន​ការពាក់ព័ន្ធ​, ទទួល​សិទ្ធិ​ពី​នាយករដ្ឋមន្ត្រី​ក្នុងការ​ពិនិត្យ និង​សម្រេច​លើ​ការងារ​របស់ «​ច្រកចេញ​-​ចូល​តែមួយ​» នៃ​ក្រុមប្រឹក្សា​អភិវឌ្ឍន៍​កម្ពុជា លើកលែងតែ​ការងារ​ដែលមាន​វេទយិតភាព​ខ្ពស់​ដែល​តម្រូវ​ឲ្យ​សុំ​ការណែនាំ​ឬ​ការសម្រេច​ពី​នាយករដ្ឋមន្ត្រី និង​ទទួល​សិទ្ធិ​ពី​នាយករដ្ឋមន្ត្រី​ក្នុងការ​ពិនិត្យ​និង​សម្រេច​លើ​សំណើ​ស្មុំ​កូន និង​ការសុំ​លា​សញ្ជាតិ​។​

​ង​. ឯកឧត្តម ហោ ណាំហុង​៖ ឧបនាយករដ្ឋមន្ត្រី ទទួលបន្ទុក​កិច្ចការបរទេស និង​សហប្រតិបត្តិការ​អន្តរជាតិ​ទូទៅ​។​

​ច​. លោកជំទាវ ម៉ែន សំអន​៖ ឧបនាយករដ្ឋមន្ត្រី ទទួលបន្ទុក​ជួយ​នាយករដ្ឋមន្ត្រី​លើ​ការងារ​អធិការកិច្ច​និង​សវនកម្ម ព្រមទាំង​ជួយ​នាយករដ្ឋមន្ត្រី​លើ​ការងារ​សង្គម​។​

​ឆ​. ឯកឧត្តម ប៊ិន ឈិន​៖ ឧបនាយករដ្ឋមន្ត្រី ទទួលបន្ទុក​ដឹកនាំ​ផ្ទាល់​អាជ្ញាធរ​ជាតិដោះស្រាយ​ទំនាស់​ដីធ្លី ព្រមទាំង​ជួយ​នាយករដ្ឋមន្ត្រី​លើ​ការងារ​បង្ការ ទប់ស្កាត់ និង​ប្រឆាំង​អំពើពុករលួយ​។​

​ជ​. ឯកឧត្តម យឹម ឆៃលី​៖ ឧបនាយករដ្ឋមន្ត្រី ទទួលបន្ទុក​ដឹកនាំ​ក្រុមប្រឹក្សា​ស្តារ អភិវឌ្ឍន៍​វិស័យ​កសិកម្ម និង​ជនបទ​។​

​ឈ​. ឯកឧត្តម កែ គឹមយ៉ាន​៖ ឧបនាយករដ្ឋមន្ត្រី ទទួលបន្ទុក​ដឹកនាំ​ផ្ទាល់​អាជ្ញាធរ​ជាតិ​ប្រយុទ្ធប្រឆាំង​គ្រឿងញៀន​។​

​នាយករដ្ឋមន្ត្រី និង​ឧបនាយករដ្ឋមន្ត្រី​ជា​គណៈអចិន្ត្រៃយ៍​នៃ​គណៈរដ្ឋមន្ត្រី​ដែល​ត្រូវ​ប្រជុំ​ពិគ្រោះ​ការងារ​តាម​ការកោះអញ្ជើញ​របស់​នាយករដ្ឋមន្ត្រី ឬ​នាយករដ្ឋមន្ត្រី​ស្តីទី​។​

​ឧបនាយករដ្ឋមន្ត្រី​ទទួលបន្ទុក​អនុវត្តន៍​ការងារ ឬ​បេសកកម្ម​ផ្សេងទៀត​ដែល​នាយករដ្ឋមន្ត្រី​ប្រគល់ជូន​ស្របតាម​មាត្រា​១៩ នៃ​ច្បាប់​ស្តីពី​ការរៀបចំ និង​ការប្រព្រឹត្តទៅ​នៃ​គណៈរដ្ឋមន្ត្រី​។​

​អនុលោម​តាម​ស្មារតី​នៃ​សេចក្តីសម្រេច​របស់​រាជ​រដ្ឋាភិបាល​លេខ​២៨​សសរ ចុះ​ថ្ងៃទី​២៥ ខែកញ្ញា ឆ្នាំ​២០១៣ ស្តីពី​ការកំណត់​របៀបរបប​ការងារ និង​ការបែងចែក​ភារកិច្ច​របស់​ថ្នាក់ដឹកនាំ​រាជរដ្ឋាភិបាល​គឺ​បានកំណត់​ឲ្យ​ឧបនាយករដ្ឋមន្ត្រី​១​រូបៗ​មាន​ទីប្រឹក្សា​ចំនួន​៤​រូប «​ក្នុងនោះ​២​រូប​មាន​ឋានៈ​ស្មើ​រដ្ឋលេខាធិការ និង​២​រូប​ទៀត​មាន​ឋានៈ​ស្មើ​អនុរដ្ឋលេខាធិការ​» និង​មាន​ជំនួយការ​ចំនួន​៥​រូប «​ក្នុងនោះ​១​រូប​មាន​ឋានៈ​ស្មើ​អគ្គនាយក​, ២​រូប​មាន​ឋានៈ​ស្មើ​អគ្គនាយករង និង​២​រូប​ទៀត​មាន​ឋានៈ​ស្មើ​ប្រធាន​នាយកដ្ឋាន​»​។ ដោយឡែក ទីប្រឹក្សា​ក្តី ជំនួយការ​ក្តី​… របស់​នាយករដ្ឋមន្ត្រី​មិនត្រូវ​បានកំណត់​ឡើយ​ទោះបី​អាចមាន​ចំនួន​ជិត​១​ពាន់​នាក់​ក៏ដោយ​៕​

top-ten-gov-leeder-of-cambodia

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.