ថ្ងៃ ពុធ ទី ២៩ ខែ មិថុនា ឆ្នាំ ២០២២

បើ​ពិភាក្សា​រឿង​ជាតិ​«​លើកលែង​ការងារ​សន្តិសុខ​»​មិនគួរ​លាក់លៀម​ទេ ប៉ុន្តែ​បើ​ចង់​លាក់បាំង​មានតែ​ចរចា​រឿង​ផលប្រយោជន៍​

​នៅ​ថ្ងៃ​អង្គារ​ទី​០៥ ខែវិច្ឆិកា ឆ្នាំ​២០១៣ វេលា​ម៉ោង​០៩​ព្រឹក​ខាងមុខ ក្រុមការងារ​បច្ចេកទេស​របស់​គណបក្សនយោបាយ​ទទួលបាន​អាសនៈ​នៅក្នុង​រដ្ឋសភា​នីតិកាល​ទី​៥​ទាំងពីរ គឺ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ នឹង​ជូ​ប​ប្រជុំគ្នា​សាជាថ្មី​នៅ​វិមាន​រដ្ឋសភា ដើម្បី​ពិភាក្សា​រក​ដំណោះស្រាយ​ចំពោះ​វិបត្តិ​នយោបាយ​បច្ចុប្បន្ន នៅ​ប្រទេស​កម្ពុជា ។​

​តាម​ការប្រកាស​របស់​គណបក្ស​សង្គ្រោះ​ជាតិ​បាន​ឲ្យ​ដឹងថា ក្រុមការងារ​បច្ចេកទេស​របស់​គណបក្ស​សង្គ្រោះ​ជាតិ​មាន​សមាសភាព​ចំនួន៥​រូប គឺ ឯកឧត្តម យឹម សុវណ្ណ អ្នកតំណាងរាស្ត្រជាប់ឆ្នោតនៅមណ្ឌលរាជធានីភ្នំពេញ, ឯកឧត្តម សុន ឆ័យ អ្នកតំណាងរាស្ត្រ​ជាប់ឆ្នោត​នៅ​មណ្ឌល​រាជធានី​ភ្នំពេញ​,​ឯកឧត្តម អេង ឆៃអ៊ាង អ្នកតំណាងរាស្ត្រ​ជាប់ឆ្នោត​នៅ​មណ្ឌល​ខេត្តកណ្តាល​,​ឯកឧត្តម យ៉ែម បុញ្ញឫទ្ធិ អ្នកតំណាងរាស្ត្រ​ជាប់ឆ្នោត​នៅ​មណ្ឌល​ខេត្តព្រៃវែង និង ឯកឧត្តម គួ​យ ប៊ុន​រឿន អ្នកតំណាងរាស្ត្រ​ជាប់ឆ្នោត​នៅ​មណ្ឌល​ខេត្តកំពង់ចាម ។​

​រីឯ​សមាសភាព​ក្រុមការងារ​បច្ចេកទេសរ​បស់​គណបក្ស​ប្រជាជន​កម្ពុជា មិន​ត្រូវបាន​គណបក្ស​នយោបាយ​ដែល​ចូលចិត្ត​ធ្វើការ​លាក់លៀម​មួយ​នេះ បង្ហើប​ប្រាប់​ឲ្យ​ដឹង​ជាក់លាក់​ជាមុន​នៅឡើយ ។​

​ប្រភពព័ត៌មាន​មួយចំនួន​បាន​ឲ្យ​ដឹងថា ខាង​ភាគី​គណបក្ស​សង្គ្រោះ​ជាតិ​ចង់​ឲ្យ​មានការ​ផ្សព្វផ្សាយ​ទូលំទូលាយ ទាក់ទង​នឹង​កិច្ចប្រជុំ​ពិភាក្សា​រវាង​ក្រុមការងារ​បច្ចេកទេសរ​បស់​គណបក្សនយោបាយ​ទាំងពីរ​នេះ ដើម្បី​បង្ហាញ​នូវ​តម្លាភាព​ជូន​ដល់​ប្រជាពលរដ្ឋ​ជា​ម្ចាស់ឆ្នោត ប៉ុន្តែ​ខាង​ភាគី​គណបក្ស​ប្រជាជន​កម្ពុ​ជាមាន​ជំហរ​មិន​ចង់​ឲ្យ​មានការ​ផ្សព្វផ្សាយ​បើកចំហ​ទូលំទូលាយ​អ្វី​នោះទេ  គឺ​ត្រឹមតែ​រៀបចំ​ឲ្យ​តំណាង​គណបក្សនយោបាយ​នីមួយៗ​ធ្វើ​ស​និ្ន​សីទ​សារព័ត៌មាន​នៅក្រោយ​កិច្ចប្រជុំ​ប៉ុណ្ណោះ ។​

​មជ្ឈដ្ឋាន​អ្នកវិភាគ​កិច្ចការ​សង្គម​នៅ​កម្ពុជា​បានលើកឡើង​ថា ការបើក​កិច្ចប្រជុំ​លាក់លៀម រវាង​គណបក្សនយោបាយ​ទាំងពីរ​នាពេល​កន្លងមក​បាន​នាំ​ឲ្យ​មានការ​គំរាម​ពី​ថ្នាក់ដឹកនាំ​គណបក្ស​ប្រជាជន​កម្ពុជា គឺ​សម្តេច​អគ្គមហាសេនាបតី​តេ​ជោ ហ៊ុន សែន រួច​ម្តងមកហើយ​ថា នឹង​យក​ខ្សែអាត់​ថត​សំឡេង​នៃ​កិច្ចប្រជុំ​មកចាក់​ផ្សាយ​ជា​សាធារណៈ ប៉ុន្តែ​ការ​គំរាម​នេះ​ត្រូវ​ទទួលរង​ការ​វាយបក​វិញ​យ៉ាង​ចាស់ដៃ​ពី​សំណាក់​ថ្នាក់ដឹកនាំ​គណបក្ស​សង្គ្រោះ​ជាតិ​ដែល​ស្នើសុំ​ឲ្យ​មានការ​ចាក់ផ្សាយ​ខ្សែអាត់​ថត​សំឡេង​នោះ​ទាំងស្រុង​តែម្តងទៅ  ។​

​ក្រុមអ្នកវិភាគ​ឯករាជ្យ​បានលើកឡើង​ទៀតថា បើ​ជជែក​ពិភាក្សាគ្នា​អំពី​រឿង​ជាតិ​«​លើកលែងតែ​ការងារ​ទាក់ទង​នឹង​សន្តិសុខ​សង្គម ដូចជា​វិស័យ​យោធា​ជាដើម​» មិនគួរ​មានការ​លាក់លៀម​ដូច​របៀបរបប​ធ្វើការ​របស់​គណបក្ស​ប្រជាជន​កម្ពុជា​នោះទេ ប៉ុន្តែ​បើ​ព្យាយាម​លាក់បាំង គឺ​ធ្វើ​ឲ្យ​សាធារណជន​សង្ស័យថា នាំគ្នា​ចរចា​អំពី​រឿង​ផលប្រយោជន៍​របស់​អ្នកនយោបាយ​ទៅវិញ​ទេ ។​

​ដូច្នេះ គណបក្ស​ប្រជាជន​កម្ពុជា គប្បី​បង្ហាញ​នូវ​សេចក្តីក្លាហាន​ធ្វើការ​ផ្សព្វផ្សាយ​ឲ្យ​បាន​ទូលំទូលាយ​អំពី​កិច្ចប្រជុំ​រវាង​គណបក្ស​នយោបាយ​ទាំងពីរ ហ​ហើយ​បើ​មានការ​ចាក់ផ្សាយ​ផ្ទាល់​ទៀត​រឹតតែ​ប្រសើរ ពីព្រោះ​នាំ​ឲ្យ​ប្រជាពលរដ្ឋ​ជា​ម្ចាស់ឆ្នោត​ទទួលបាន​នូវ​ព័ត៌មាន​ពិត​និង​ដោយផ្ទាល់​អំពី​កិច្ចប្រជុំ​នានា របស់​អ្នកនយោបាយ​ដែល​ខ្លួន​បាន​បោះឆ្នោត​ជូន ៕​

013-crop

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.