ថ្ងៃ សៅរ៏ ទី ១៦ ខែ មករា ឆ្នាំ ២០២១

ឧ​ត្ត​ម​ក្រុមប្រឹក្សា​កំណែទម្រង់​រដ្ឋ និង​ក្រុមប្រឹក្សា​កំណែទម្រង់​ចំណុះ​ពាក់ព័ន្ធ​ត្រូវបាន​រំសាយ​និង​កែសម្រួល​ការងារ​កំណែទម្រង់​មួយចំនួន​

​យោងតាម​សេចក្តីក្រាបបង្គំទូលថ្វាយ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​រាជរដ្ឋាភិបាល​គណបក្ស​ប្រជាជន​កម្ពុជា ព្រះមហាក្សត្រ​នៃ​ព្រះរាជាណាចក្រ​កម្ពុជា ទ្រង់​បានចេញ​ព្រះរាជក្រឹត្យ​មួយ​លេខ នស​/​រកត​/១០១៣/៩៥៦ ចុះ​ថ្ងៃទី​០១ ខែតុលា ឆ្នាំ​២០១៣ ត្រាស់បង្គាប់​រំសាយ​ឧ​ត្ត​ម​ក្រុមប្រឹក្សា​កំណែទម្រង់​រដ្ឋ ដែលមាន​សម្តេចនាយក​រដ្ឋមន្ត្រី​ជា​ប្រធាន និង​ក្រុមប្រឹក្សា​កំណែទម្រង់​ពាក់ព័ន្ធ​ផ្សេងទៀត​ចំណុះ​ឲ្យ​ឧ​ត្ត​ម​ក្រុមប្រឹក្សា​កំណែទម្រង់​រដ្ឋ ។​

​ព្រះរាជក្រឹត្យ​លេខ នស​/​រកត​/០៦០២/១៥៨ ចុះ​ថ្ងៃទី​១៩ ខែមិថុនា ឆ្នាំ​២០០២ ស្តីពី​ការបង្កើត​ក្រុមប្រឹក្សា​កំណែទម្រង់​ច្បាប់ និង​ប្រព័ន្ធយុត្តិធម៌ ដែលមាន​ឯកឧត្តម​បណ្ឌិតសភា​ចា​រ្យ សុខ អាន ឧបនាយករដ្ឋមន្ត្រី រដ្ឋមន្ត្រី​ទទួលបន្ទុក​ទីស្តីការគណៈរដ្ឋមន្ត្រី និង ឯកឧត្តម ឌិ​ត មុន្ទី ប្រធាន​តុលាការ​កំពូល​ជា​សហប្រធាន និង​ព្រះរាជក្រឹត្យ​លេខ នស​/​រកត​/០៩០៤/២៨៤ ចុះ​ថ្ងៃទី​២៧ ខែកញ្ញា ឆ្នាំ​២០០៤ ស្តីពី​ឧ​ត្ត​ម​ក្រុមប្រឹក្សា​កំណែទម្រង់​រដ្ឋ ព្រមទាំង​លិខិតបទដ្ឋាន​គតិយុត្ត​ពាក់ព័ន្ធ​នឹង​ការបង្កើត​ក្រុមប្រឹក្សា​ចំណុះ​ឧ​ត្ត​ម​ក្រុមប្រឹក្សា​កំណែទម្រង់​រដ្ឋ​ផ្សេងទៀត  ត្រូវ​ទុកជា​និរាករណ៍ ។​

​ស្មារតី​នៃ​ព្រះរាជក្រឹត្យ​លេខ នស​/​រកត​/១០១៣/៩៥៦ ចុះ​ថ្ងៃទី​០១ ខែតុលា ឆ្នាំ​២០១៣ បានសម្រេច​កែសម្រួល​កា​រងារ​កំណែទម្រង់​មួយចំនួន​ដូចខាងក្រោម ៖

១-​ការងារ​កំណែទម្រង់រ​ដ្ឋ​បាល ដែល​ពីមុន​មាន​ឯកឧត្តម​បណ្ឌិត​សភាចា​រ្យ សុខ អាន ជា​ប្រធាន ត្រូវបាន​ដាក់​ឲ្យ​ឋិត​នៅក្រោម​ការទទួលខុសត្រូវ​របស់​ក្រសួង​មុខងារសាធារណៈ ។​

២-​ការងារ​កំណែទម្រង់​ច្បាប់ និង​ប្រព័ន្ធយុត្តិធម៌ ដែល​ពីមុន​មាន​ឯកឧត្តម​បណ្ឌិត​សភាចា​រ្យ សុខ អាន និង ឯកឧត្តម ឌិ​ត មុន្ទី ជា​សហប្រធាន ត្រូវបាន​ដាក់​ឲ្យ​ឋិត​នៅក្រោម​ការទទួលខុសត្រូវ​របស់​ក្រសួងយុត្តិធម៌ ។​

៣-​ការងារ​កំណែទម្រង់​ក​ង​យោធពលខេមរភូមិន្ទ ត្រូវបាន​ដាក់​ឲ្យ​ឋិត​នៅក្រោម​ការទទួលខុសត្រូវ​របស់​ក្រសួងការពារជាតិ ។​

៤-​ការងារ​គោលនយោបាយ​ដីធ្លី ត្រូវបាន​ដាក់​ឲ្យ​ឋិត​នៅក្រោម​ការទទួលខុសត្រូវ​របស់​ក្រសួង​រៀបចំ​ដែនដី នគរូបនីយកម្ម និង​សំណង់ ។​

 ទន្ទឹមនឹងនេះ អគ្គលេខាធិការដ្ឋាន​នៃ​ក្រុមប្រឹក្សា​កំណែទម្រង់រដ្ឋបាល ត្រូវបាន​ផ្ទេរ និង​ធ្វើ​សមាហរណកម្ម ទៅក្នុង​ក្រសួង​មុខងារសាធារណៈ និង​អគ្គលេខាធិការដ្ឋាន​នៃ​ក្រុមប្រឹក្សា​កំណែទម្រង់​ច្បាប់​និង​ប្រព័ន្ធយុត្តិធម៌ ត្រូវបាន​ផ្ទេរ និង​ធ្វើ​សមាហរណកម្ម​ទៅក្នុង​ក្រសួងយុត្តិធម៌ ។​

​រដ្ឋាភិបាល​គណបក្ស​ប្រជាជន​កម្ពុជា ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ​បានចេញ​បទបញ្ជា​មួយ​លេខ ០៤ បប ចុះ​ថ្ងៃទី​០២ ខែតុលា ឆ្នាំ​២០១៣ បញ្ជា​ឲ្យ​មានការ​អនុវត្ត​នូវ​ព្រះរាជក្រឹត្យ​ខាងលើ​ឲ្យ​មាន​ប្រសិទ្ធភាព និង​ឆាប់រហ័ស ៕​

h34

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.