ថ្ងៃ អាទិត្យ ទី ២៥ ខែ តុលា ឆ្នាំ ២០២០

ការព្រមាន​ និង​ការអំពាវនាវ​របស់​នា​យក​រដ្ឋមន្ត្រី​មិនអាច​នាំ​ឲ្យ​មាន​អភិបាលកិច្ច​ល្អ​ពិតប្រាកដ​ក្នុងសង្គម​ខ្មែរ​ឡើយ​

​មិនមែនជា​រឿង​ថ្មី​ទេ ដែល​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​ប្រើពាក្យ​អំពាវនាវ​ឬ​ពាក្យ​ព្រមាន​តាម​ក្បាល​មេក្រូ​សឹង​គ្រប់​ទីកន្លែង​ទៅលើ​មន្ត្រីក្រោមឱវាទ ទាំង​ស៊ីវិល ទាំង​ប្រដាប់អាវុធ ទាំង​តុលាការ គឺ​បាន​ប្រើប្រាស់​ពាក្យ​ដូច្នេះ​អស់​រយៈពេល​១៥​ឆ្នាំ​មកហើយ ខណៈដែល​បុរស​ខ្លាំង​បាន​ឡើងកាន់​មុខតំណែង​ជា​នាយករដ្ឋមន្ត្រី​ម្នាក់ឯង​នា​ឆ្នាំ​១៩៩៨​មកម្ល៉េះ​។​

​នៅក្នុង​កិច្ចប្រជុំ​គណៈរដ្ឋមន្ត្រី​នីតិកាល​ទី​៥​នៃ​រដ្ឋសភា ដែលជា​រាជរដ្ឋាភិបាល​អាណត្តិ​ថ្មី​នាយករដ្ឋមន្ត្រី​ចាស់​លើកដំបូង​នៅ​វិមាន​សន្តិភាព នាពេល​ព្រឹក​មិញ​នេះ​«​សម្តេច​តេ​ជោ​សែន​»​បាន​ដំឡើង​សំឡេង​ខ្លាំងៗ​តាមរយៈ​ការប្រើ​ពាក្យ​ព្រមាន​ដើម្បី​ឲ្យ​មន្ត្រី​សមាជិក​រាជរដ្ឋាភិបាល​ក្រោម​ឱវាទ​ធ្វើការ​ផ្លាស់ប្តូរ​ឥរិយាបទ ដែល​ធ្លាប់​ខុសឆ្គង​ចោល ទោះបី​មន្ត្រី​ចាស់​ក៏ដោយ ក៏ត្រូវ​មានគំនិត​ថ្មី​និង​របៀបរបប​ដឹកនាំ​ថ្មី​ដែរ​។​

​តាមពិតទៅ រលក​ជន់​ជោរ​នៃ​អំពើពុករលួយ​និង​អភិបាលកិច្ច​អាក្រក់​ក្នុង​ជួរ​មន្ត្រីរាជការ​គ្រប់ផ្នែក គ្រប់​ថ្នាក់​និង​ក្រុម​ឈ្មួញ​ក្នុង​វិស័យ​ឯកជន​ជា​បក្ខពួក​សែស្រឡាយ​មួយចំនួន បាន​រុំ​ព័ទ្ធ​រាជរដ្ឋាភិបាល​នៃ​ព្រះរាជាណាចក្រ​កម្ពុ​ជាទី​២​ក្រោម​ការដឹកនាំ​របស់​«​សម្តេច​តេ​ជោ​សែន​»​ជា​នាយករដ្ឋមន្ត្រី​យ៉ាង​ក្រាស់ឃ្មឹក នៅក្រោម​ដំបូល​នៃ​សិល្បៈ​ចែករំលែក​ដែលជា​វប្បធម៌​ដ៏​ពេញនិយម​។​

​ការព្រមាន​និង​ការអំពាវនាវ​រប​ស់បុ​រស​ខ្លាំង​នៃ​កម្ពុជា​នាពេល​កន្លងមក បានត្រឹមតែ​ដំឡើង​សំឡេង​កុំ​ឲ្យ​មន្ត្រីក្រោមឱវាទ​ភ្លេច​វប្បធម៌​សិល្បៈ​នៃ​ការចែករំលែក​របស់​នា​យក​រដ្ឋមន្ត្រី​ប៉ុណ្ណោះ ពោល​គឺ ថ្នាក់ក្រោម​ប្រឹង​រកលុយ​តាម​គ្រប់​វិធី​ជូន​ថ្នាក់លើ ផ្គាប់ចិត្ត​ថ្នាក់លើ​និង​ជួយ​ការងារ​បក្ស ហើយ​ថ្នាក់លើ​និង​បក្ស​ជួយ​ការពារ​បីបាច់​ថែរក្សា​ថ្នាក់ក្រោម​វិញ​។ ម្យ៉ាងទៀត ការព្រមាន​និង​ការអំពាវនាវ​រប​ស់បុ​រស​ខ្លាំង គឺ​បាន​ត្រឹម​ឲ្យ​មន្ត្រីក្រោមឱវាទ​ចងចាំ​នូវ​អនុសាសន៍​របស់​នាយក​រដ្ឋមន្ត្រី​ជាង​ការគោរព​និង​អនុវត្តន៍​ច្បាប់​ប៉ុណ្ណោះ​។​

​លើសពីនេះ «​សម្តេច​តេ​ជោ​សែន​»​បាន​ដាស់តឿន​ក្រើនរំលឹក​ឲ្យ​មន្ត្រីក្រោមឱវាទ​តាមដាន​មើល​ការចុះផ្សាយ​របស់​បណ្តាញ​ព័ត៌មាន ដើម្បី​បានដឹង​រឿងរ៉ាវ​ផ្សេងៗ​ពី​ស្រទាប់​ប្រជាពលរដ្ឋ​និង​មហាជន​នានា​ដែល​សារព័ត៌មាន​ចុះផ្សាយ​។ ប៉ុន្តែ​គេ​ចោទ​ជា​សំណួរ​ថា តើ​សារព័ត៌មាន​ភាគច្រើន​ស​ព្វ​ថ្ងៃនេះ​ជា​កម្មសិទ្ធិ​និង​មាន​និន្នាការ​នយោបាយ​គាំទ្រ​ខាង​គណបក្ស​ណា​? ចម្លើយ គឺ​ភាគច្រើន​ជា​កម្មសិទ្ធិ​របស់​គណបក្ស​ប្រជាជន​កម្ពុជា​និង​ជា​របស់​កូនស្រី​បង្កើត​បុរស​ខ្លាំង​តែម្តង ដែល​សារព័ត៌មាន​ទាំងនោះ​អាច​ចុះផ្សាយ​ពី​ខ្មៅ​ទៅ​ស ឬ​ពីស​ទៅ​ខ្មៅ និង​អាច​បិទបាំង​អំពើអាក្រក់​របស់​មន្ត្រី​ថ្នាក់ក្រោម​ដើម្បី​ទទួលបាន​ផលប្រយោជន៍​ជា​ថ្នូរ​មកវិញ ដ្បិត​សារព័ត៌មាន​ទាំងនោះ​មិន​ហ៊ាន​សរសេរ​និង​ផ្សាយ​ប៉ះពាល់​ដល់​មន្ត្រី​ថ្នាក់​ធំៗ​របស់​គណបក្ស​ប្រជាជន​កម្ពុជា ដូចជា សម្តេចនាយក​រដ្ឋមន្ត្រី​នោះទេ​។​

​ដូចនេះ ដើម្បី​លុបបំបាត់​ឬ​កាត់បន្ថយ​អំពើពុករលួយ​និង​ដឹកនាំ​ឲ្យ​មាន​អភិបាលកិច្ច​ល្អ​ពិតប្រាកដ​ក្នុងន័យ​បម្រើ​ផលប្រយោជន៍​ជាតិ​និង​ប្រជាពលរដ្ឋ​ជា​ម្ចាស់ឆ្នោត ត្រូវតែ​ពង្រឹង​ការអនុវត្ត​ច្បាប់​នៅ​គ្រប់​ស្ថាប័ន​របស់​ជាតិ ទាំង​នីតិប្បញ្ញត្តិ ទាំង​នីតិប្រតិបត្តិ ទាំង​តុលាការ មិនមែន​ពង្រឹង​ការអនុវត្ត​អនុសាសន៍​របស់​«​សម្តេច​តេ​ជោ​សែន​»​តែ​ម្នាក់ ហើយ​ធ្វើការ​ព្រមាន​ឬ​អំពាវនាវ​ដល់​មន្ត្រី​ថ្នាក់ក្រោម ឱប​ស្ទប​និង​ការពារ​ថ្នាក់លើ​នោះទេ​។​

​មជ្ឈដ្ឋាន​អ្នកច្បាប់​ឯករាជ្យ និង​អ្នកតាមដាន​កិច្ចការ​សង្គម​នៅ​កម្ពុជា​បានលើកឡើង​ថា មាន​ផ្លូវ​ជា​ជម្រើស​តែមួយគត់​ដើម្បី​ពង្រឹង​ការអនុវត្ត​ច្បាប់​ឲ្យ​មាន​នីតិរដ្ឋ​នៅ​កម្ពុជា មិនមែន​ពឹងផ្អែក​ទៅលើ​ការព្រមាន​និង​ការអំពាវនាវ​ដដែលៗ​អស់​រយៈពេល​ជិត​២០​ឆ្នាំ​របស់​«​សម្តេច​តេ​ជោ​សែន​»​នោះឡើយ គឺ​ត្រូវតម្រូវ​ឲ្យ​«​សម្តេច​តេ​ជោ​សែន​»​ខ្លួនឯង​កែលម្អ​ខ្លួន​មុនគេ​ធ្វើជា​គំរូ​ក្នុង​ការឈប់​ទទួលផល​ប្រយោជន៍​គ្រប់​សព្វសារពើ​ក្នុងន័យ​ការ​សូកប៉ាន់​និង​ការទិញ​ទឹកចិត្ត​ដើម្បី​ទទួលបាន​សេវាសាធារណៈ​ផ្សេងៗ​ពី​មន្ត្រីក្រោមឱវាទ​និង​ពី​ក្រុម​ឈ្មួញ​ជា​បក្ខពួក ពីព្រោះ​បើ​«​សម្តេច​តេ​ជោ​សែន​»​នៅតែ​ទទួល​លុយកាក់​ឬ​ផលប្រយោជន៍​ពី​ឈ្មួញ​បក្ខពួក​និង​មន្ត្រីក្រោមឱវាទ​ដដែល​ទេ មានន័យថា ការសន្យា​លុបបំបាត់​ឬ​កាត់បន្ថយ​អំពើពុករលួយ​និង​បក្ខពួកនិយម នឹង​ក្លាយ​ជាស​ន្យាខ្យល់​ឬ​សូន្យ​៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.