ថ្ងៃ អាទិត្យ ទី ២៥ ខែ តុលា ឆ្នាំ ២០២០

សម្រែក​ទាមទារ​រក​យុត្តិធម៌​នៅ​ក្នុង​សំណុំរឿង​ឃាតកម្ម​លោក​ ជា​ វិជ្ជា​ អតីត​ប្រធាន​សហជីព​សេរី​កម្មករ​ដ៏​ល្បីឈ្មោះ

​នៅ​វេលា​ព្រឹក​នេះ​ តុលាការ​កំពូល​នឹង​លើកយក​សំណុំរឿង​ក្តី​ឃាតកម្ម​លោក​ ជា​ វិជ្ជា​ អតីត​ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា​ មក​បើក​សវនាការ​ជំនុំជម្រះ​ជា​លើក​ទី​២​ ។​ ​

លោក​ ជា​ វិជ្ជា​ ត្រូវ​បាន​ឃាតក​បាញ់​សម្លាប់​យ៉ាង​ព្រៃផ្សៃ​កាលពី​ថ្ងៃ​ទី​២២​ ខែមករា​ ឆ្នាំ​២០០៤​ ខណៈ​ដែល​លោក​កំពុង​អាន​កាសែត​នៅ​តូប​លក់​កាសែត​មួយ​ក្បែរ​វត្ត​លង្កា​ ខណ្ឌចំការមន​ រាជធានី​ភ្នំពេញ​ ។​ ​

Chea-Mony4

ក្រោម​ការ​ទាមទារ​ស្វែងរក​យុត្តិធម៌​យ៉ាង​ស្វិតស្វាញ​របស់​ក្រុម​គ្រួសារ​លោក​ ជា​ វិជ្ជា​ ដែល​ជា​ជន​រង​គ្រោះ​នោះ​ សមត្ថកិច្ច​នគរបាល​រាជធានី​ភ្នំពេញ​ បាន​ចាប់ខ្លួន​បុរស​ជនសង្ស័យ​ចំនួន​២​នាក់​ គឺ​លោក​ ប៊​ន​ សំណាង​ និង​លោក​ សុខ​ សំ​អឿ​ន​ យក​មក​ឲ្យ​តុលាការ​ផ្តន្ទាទោស​ ។​ តុលាការ​សាលាដំបូង​រាជធានី​ភ្នំពេញ​ និង​សាលាឧទ្ធរណ៍​នា​ពេល​កន្លង​មក​ បាន​វិនិច្ឆ័យ​ផ្តន្ទាទោស​លើ​បុរស​ទាំង​២​នាក់​ ដោយ​ចោទ​សំដៅ​ថា​ ជា​ឃាតក​សម្លាប់​លោក​ ជា​ វិជ្ជា​ ។​ ក្រោយមក​ តុលាការ​កំពូល​បាន​សម្រេច​លើក​ទី​១​ច្រាន​ចោលការ​សម្រេច​របស់​សាលាឧទ្ធរណ៍​ ដោយ​ធ្វើការ​ដោះ​លែង​ជនជាប់ចោទ​ទាំង​២​នាក់​ឲ្យ​ឋិត​នៅ​ក្រៅ​ឃុំ​បណ្តោះអាសន្ន​ កាលពី​អំឡុង​ឆ្នាំ​២០០៨​ និង​បង្គាប់​ឲ្យ​សាលាឧទ្ធរណ៍​កាត់ក្តី​សា​ជា​ថ្មី​ឡើង​វិញ​ ។​ 

Chea-Mony-2

ការ​កាត់ក្តី​របស់​សាលាឧទ្ធរណ៍​តាម​សាលដីកា​បង្គាប់​របស់​តុលាការ​កំពូល​លើក​ទី​១​នោះ​ បាន​សម្រេច​ផ្តន្ទាទោស​លើ​លោក​ ប៊​ន​ សំណាង​ និង​លោក​ សុខ​ សំ​អឿ​ន​ ព្រមទាំង​ឃុំខ្លួន​បុរស​ជនជាប់ចោទ​ទាំង​២​នាក់​ដាក់​ពន្ធនាគារ​ម្តងទៀត​ ក្រោម​សម្រែក​ទួញ​យំ​ស្វែងរក​យុត្តិធម៌​របស់​អ្នក​ទាំង​២​ និង​ក្រុម​គ្រួសារ​របស់​ពួក​គេ​ ។​ ​ឥឡូវ​ នៅ​ថ្ងៃនេះ​វាសនា​របស់​លោក​ សុខ​ សំ​អឿ​ន​ និង​លោក​ ប៊​ន​ សំណាង​ និង​ព្រលឹង​លោក​ ជា​ វិជ្ជា​ ព្រមទាំង​ក្រុម​គ្រួសារ​លោក​ ជា​ វិជ្ជា​ ជា​ជន​រង​គ្រោះ​ ទទួល​បាន​យុត្តិធម៌​ពិតប្រាកដ​ ឬ​ក៏​អត់​ អាស្រ័យ​លើ​ការ​កាត់ក្តី​របស់​តុលាការ​កំពូល​ជា​លើក​ទី​២​ ។​

chea-vechea-die

​ពាក់ព័ន្ធ​នឹង​សំណុំរឿង​ឃាតកម្ម​លោក​ ជា​ វិជ្ជា​ នេះ​ ធ្លាប់​ត្រូវ​បាន​អង្គ​សម្តេចឪ​-​សម្តេច​តា​ កាល​ព្រះ​អង្គ​នៅ​មាន​ព្រះ​ជន្ម​ ទ្រង់​បាន​ចេញ​ព្រះរាជ​សារ​មួយ​ចុះ​ថ្ងៃ​ទី​០២​ ខែសីហា​ ឆ្នាំ​២០០៥​ ដោយ​ព្រះ​អង្គ​មាន​ព្រះ​តម្រិះ​ថា​ "​ខ្ញុំ​សូម​លោក​ សុខ​ សំ​អឿ​ន​ និង​លោក​ ប៊​ន​ សំណាង​ ព្រមទាំង​មាតា​ បិតា​នៃ​អ្នក​ទាំង​២​ជ្រាប​ថា​ លោក​ សុខ​ សំ​អឿ​ន​ និង​លោក​ ប៊​ន​ សំណាង​ មិនមែន​ជា​ឃាតក​ពិតប្រាកដ​ដែល​សម្លាប់​លោក​ ជា​ វិជ្ជា​ នោះ​ទេ​ តែ​ខ្ញុំ​ពុំ​មាន​សិទ្ធិ​អំណាច​អ្វី​ដើម្បី​ធ្វើ​អន្តរាគមន៍​ជួយ​អ្នក​ទាំង​២​ ។​ ខ្ញុំ​សង្ឃឹមថា​ នៅ​ថ្ងៃ​ណាមួយ​តុលាការ​នឹង​ទទួលស្គាល់​ការ​ប្រព្រឹត្ត​ខុស​របស់​ខ្លួន​ ហើយ​ដោះ​លែង​លោក​ សុខ​ សំ​អឿ​ន​ និង​លោក​ ប៊​ន​ សំណាង​ ឲ្យ​មាន​សេរីភាព​ឡើង​វិញ​ ។​ "​ ។​ ​

chea-vechea-die-1

បន្ទាប់​មក​ទៀត​ អង្គ​សម្តេចឪ​-​សម្តេច​តា​ធ្លាប់​បាន​មាន​ព្រះ​តម្រិះ​នៅ​ក្នុង​ព្រះរាជ​សារ​ចុះ​ថ្ងៃ​ទី​០៧​ ខែសីហា​ ឆ្នាំ​២០០៥​ របស់​ព្រះ​អង្គ​ដែល​បាន​ផ្ញើ​ជូន​លោក​ ជា​ មុនី​ ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា​បច្ចុប្បន្ន​ និង​ត្រូវជា​ប្អូនប្រុស​បង្កើត​របស់​លោក​ ជា​ វិជ្ជា​ ថា​ "​ខ្ញុំ​សូម​សម្តែង​នូវ​អំណរ​គុណ​ដ៏​ជ្រាលជ្រៅ​ និង​គាំទ្រ​មួយ​រយ​ភាគរយ​ សំណូមពរ​របស់​លោក​ចំពោះ​រាជរដ្ឋាភិបាល​ ឲ្យ​រក​ឃាតក​ពិតប្រាកដ​ដែល​សម្លាប់​លោក​ ជា​ វិជ្ជា​ ។​ នៅ​ក្នុង​ឱកាស​នេះ​ ខ្ញុំ​សូម​សម្តែង​នូវ​ការ​គោរព​ចំពោះ​វិញ្ញាណក្ខន្ធ​លោក​ ជា​ វិជ្ជា​ អ្នក​ស្នេហា​ជាតិ​ដ៏​ប្រសើរ​មួយ​រូប​ ។​ "​ ។​ ​

Chea-Vichea-02

ដោយឡែក​ លោក​ ជា​ មុនី​ ជា​តំណាង​ដើមបណ្តឹង​រដ្ឋប្បវេណី​ឲ្យ​ជន​រង​គ្រោះ​ ធ្លាប់​បាន​មាន​ប្រសាសន៍​ឲ្យ​ដឹង​ច្រើន​លើក​ច្រើន​សា​រួច​មក​ហើយ​ថា​ "​បើ​តាម​ដំណើរ​សាច់​រឿង​ឃាតកម្ម​នេះ​ តាំងពី​ដើម​ទី​មក​ គឺ​លោក​មិន​ប្រាកដ​ក្នុង​ចិត្ត​ទាល់តែ​សោះ​ដែល​ថា​ លោក​ ប៊​ន​ សំណាង​ និង​លោក​ សុខ​ សំ​អឿ​ន​ ជា​ឃាតក​សម្លាប់​លោក​ ជា​ វិជ្ជា​"​ ។​ ​

កាលពីដើម​ឆ្នាំ​២០១២​កន្លង​មក​ រាជរដ្ឋាភិបាល​បាន​សម្រេច​អនុញ្ញាត​ឲ្យ​មានការ​សាងសង់​រូបសំណាក​លោក​ ជា​ វិជ្ជា​ ដើម្បី​ទុក​គោរព​វិញ្ញាណក្ខន្ធ​ចង​ចាំ​នូវ​គុណូបការៈ​ដ៏​ថ្លៃថ្លា​របស់​លោក​ តាម​សំណើ​របស់​លោក​ ជា​ មុនី​ ។​ ទីបំផុត​ រូបសំណាក​លោក​ ជា​ វិជ្ជា​ ដែល​ឋិត​នៅ​ក្បែរ​វត្ត​លង្កា​ត្រូវ​បាន​សម្ពោធ​កាលពី​ថ្ងៃ​ទី​០៣​ ខែឧសភា​ ឆ្នាំ​២០១៣​ ខណៈ​ដែល​ក្រុម​គ្រួសារ​លោក​ ជា​ វិជ្ជា​ ជា​ជន​រង​គ្រោះ​នៅ​តែ​បន្ត​ទាមទារ​ឲ្យ​រាជរដ្ឋាភិបាល​ស្វែងរក​ឃាតក​ពិតប្រាកដ​ដែល​សម្លាប់​លោក​ ជា​ វិជ្ជា​ យក​មក​ផ្តន្ទាទោស​តាម​ច្បាប់​ ។​ ​

រួម​សេចក្តី​មក​ នៅ​ក្នុង​សំណុំរឿង​ឃាតកម្ម​របស់​លោក​ ជា​ វិជ្ជា​ ដែល​មាន​រយៈពេល​ជិត​១០​ឆ្នាំ​កន្លង​មកនេះ​ ទាំង​ខាង​ភាគី​ជនជាប់ចោទ​ ទាំង​ខាង​ភាគី​តំណាង​ជន​រង​គ្រោះ​ សុទ្ធតែ​ស្រែក​ទាមទារ​ស្វែងរក​យុត្តិធម៌​ដូច​គ្នា​ ៕

 

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.