ថ្ងៃ អង្គារ ទី ២០ ខែ តុលា ឆ្នាំ ២០២០

អ្នក​ណា​ដែល​គេ​ចាប់អារម្មណ៍​ខ្លាំង​ពេល​បង្ហាញ​វត្តមាន​ក្នុង​កិច្ចប្រជុំ​ដំបូង​នៃ​រដ្ឋសភា​នីតិកាល​ទី​៥​របស់​គណបក្ស​ប្រជាជន​កម្ពុជា​ ?

​កិច្ចប្រជុំ​ដំបូង​នៃ​រដ្ឋសភា​នីតិកាល​ទី​៥​បាន​ជម្នះ​ដំណើរការ​រួច​ហើយ​ កាលពី​ថ្ងៃ​ម្សិលមិញ​ទី​២៣​ ខែកញ្ញា​ នៅ​វិមាន​រដ្ឋ​សភាជាតិ​ ដោយ​បេក្ខជន​តំណាងរាស្ត្រ​ជាប់​ឆ្នោត​គណបក្ស​ប្រជាជន​កម្ពុជា​ចំនួន​៦៨​រូប​ ក្រោម​អធិបតីភាព​ដ៏​ខ្ពង់ខ្ពស់​របស់​ព្រះករុណា​ព្រះបាទ​សម្តេចព្រះ​បរមនាថ​ នរោត្តម​ សីហ​មុនី​ ព្រះមហាក្សត្រ​នៃ​ព្រះរាជាណាចក្រ​កម្ពុជា​ ព្រមទាំង​វត្តមាន​ភ្ញៀវ​កិត្តិយស​ជាតិ​ និង​អន្តរជាតិ​មួយ​ចំនួន​ផង​ដែរ​ ។

​ក្រៅ​អំពី​អង្គ​ព្រះមហាក្សត្រ​ដែល​ទាយ​ទុកជា​មុន​ថា​ ទ្រង់​នឹង​យាង​ទៅ​បើក​កិច្ចប្រជុំ​ដំបូង​នៃ​រដ្ឋសភា​ ទោះបី​មាន​សំណើ​ទូល​ថ្វាយ​ពី​បេក្ខជន​ជាប់​ឆ្នោត​តំណាងរាស្ត្រ​នីតិកាល​ទី​៥​របស់​គណបក្ស​សង្គ្រោះ​ជាតិ​ទាំង​៥៥​រូប​ ពី​អង្គការ​សង្គម​ស៊ី​វិល​ និង​ពី​ប្រជាពលរដ្ឋ​ជា​ម្ចាស់​ឆ្នោត​គាំទ្រ​គណបក្ស​សង្គ្រោះ​ជាតិ​ ស្នើ​ឲ្យ​មានការ​ពន្យារពេល​កិច្ចប្រជុំ​រដ្ឋសភា​មួយ​រយៈ​ក៏​ដោយ​ និង​វត្តមាន​របស់​សម្តេច​អគ្គ​មហា​ធម្ម​ពោធិ​សាល​ ជា​ ស៊ី​ម​ ប្រធាន​គណបក្ស​ប្រជាជន​កម្ពុជា​ និង​ជា​ប្រជា​ព្រឹទ្ធសភា​នោះ​ មាន​អ្នក​ដែល​គេ​ចាប់អារម្មណ៍​ខ្លាំង​បំផុត​ចំនួន​២​រូប​ គឺ​ ៖

១-​ឯកឧត្តម​ អ៊ឹម​ សួស្តី​ ប្រធាន​គណៈកម្មាធិការ​ជាតិ​រៀបចំ​ការ​បោះ​ឆ្នោត​ "​គ​.​ជ​.​ប​"​ ដែល​ជា​មុខសញ្ញា​ធំ​បំផុត​ក្នុង​ការ​រិះគន់​ពី​អ្នកគាំទ្រ​គណបក្ស​សង្គ្រោះ​ជាតិ​ថា​ជា​មេចោរ​លួច​បន្លំ​សន្លឹក​ឆ្នោត​ឲ្យ​គណបក្ស​ប្រជាជន​កម្ពុជា​ ទទួល​បានការ​ឈ្នះ​ឆ្នោត​លើ​គណបក្ស​សង្គ្រោះ​ជាតិ​ដោយ​ឥត​អៀនខ្មាស​ ។​

២-​ឯកឧត្តម​ William​ E.Todd​ ឯកអគ្គរដ្ឋទូត​សហរដ្ឋអាមេរិក​ប្រចាំ​ព្រះរាជាណាចក្រ​កម្ពុជា​ ដោយ​ឯកឧត្តម​បាន​ប្រើ​សញ្ញា​លើកដៃ​ទាំង​ពីរ​ឡើង​លើ​ ដែល​ដៃ​ម្ខាងៗ​បង្ហាញ​ម្រាម​២​ ។​ អ្នកគាំទ្រ​គណបក្ស​ប្រជាជន​កម្ពុជា​បាន​វាយតម្លៃ​ថា​ ឯកឧត្តម​ឯកអគ្គរដ្ឋទូត​សហរដ្ឋអាមេរិក​គាំទ្រ​គណបក្ស​ប្រជាជន​កម្ពុជា​"​លេខ​៤"​ ទើប​ឯកឧត្តម​ចូលរួម​កិច្ចប្រជុំ​លើក​ដំបូង​នៃ​រដ្ឋសភា​នីតិកាល​ទី​៥​ ព្រមទាំង​លើក​ម្រាមដៃ​២​ទាំង​សងខាង​ រីឯ​អ្នកគាំទ្រ​គណបក្ស​សង្គ្រោះ​ជាតិ​ បាន​វាយតម្លៃ​ថា​ ឯកឧត្តម​ឯកអគ្គរដ្ឋទូត​សហរដ្ឋអាមេរិក​ចង់​ឃើញ​គណបក្ស​នយោបាយ​ធំៗ​ទាំង​ពីរ​ចូលរួម​ប្រជុំ​រដ្ឋសភា​ ។​ ​

បន្ទាប់​មក​ អ្វី​ដែល​ធ្វើ​ឲ្យ​មជ្ឈដ្ឋាន​នានា​ចាប់អារម្មណ៍​ខ្លាំង​ថែម​ទៀត​នោះ​ គឺ​ស្ថានទូត​សហរដ្ឋអាមេរិក​ប្រចាំ​ព្រះរាជាណាចក្រ​កម្ពុជា​ បាន​ចេញ​សេចក្តីថ្លែងការណ៍​របស់​ខ្លួន​នៅ​ថ្ងៃ​ដដែល​នោះ​ថា​ ការ​ចូលរួម​របស់​លោក​ឯកអគ្គរដ្ឋទូត​សហរដ្ឋអាមេរិក​ មិនមែន​ជា​ការ​យល់ព្រម​ទទួលស្គាល់​លទ្ធផល​នៃ​ការ​បោះ​ឆ្នោត​ ឬ​គណបក្ស​នយោបាយ​ណាមួយ​នោះ​ទេ​ ។​ ​

សេចក្តី​ថែ្ល​ង​ការណ៍​បាន​បញ្ជាក់​ថា​ សហរដ្ឋអាមេរិក​សូម​ស្នើ​ឲ្យ​មានការ​ត្រួតពិនិត្យ​ឡើង​វិញ​ដោយ​តម្លាភាព​ នូវ​ភាព​មិន​ប្រក្រតី​នានា​ទាក់ទង​នឹង​ការ​បោះ​ឆ្នោតជាតិ​កាលពី​ថ្ងៃ​ទី​២៨​ កក្កដា​ ដែល​នឹង​ជួយ​ដល់​កិច្ច​ប្រឹងប្រែង​ក្នុង​ការ​វាយតម្លៃ​ និង​ដោះស្រាយ​នូវ​រាល់​កំហុសឆ្គង​ផ្សេងៗ​នៅ​ក្នុង​ដំណើរការ​នៃ​ការ​បោះ​ឆ្នោត​ ហើយនឹង​ផ្តល់​ឲ្យ​ប្រជាពលរដ្ឋ​កម្ពុជា​នូវ​ទំនុកចិត្ត​កាន់តែ​ច្រើន​ថែម​ទៀត​ទៅ​លើ​ប្រព័ន្ធ​បោះ​ឆ្នោត​ ។​ ​

ស្ថានទូត​សហរដ្ឋអាមេរិក​បាន​បញ្ជាក់​នៅ​ក្នុង​សេចក្តី​ថែ្ល​ង​ការណ៍​របស់​ខ្លួន​ទៀត​ថា​ "​យើង​ជឿ​ថា​ សភាជាតិ​ដែល​មានដំណើរ​ការ​ត្រឹមត្រូវ​ ទាមទារ​ឲ្យ​មានការ​ចូលរួម​នៃ​គណបក្ស​នយោបាយ​សំខាន់ៗ​ទាំង​ពីរ​ ។​ យើង​សូម​អំពាវនាវ​គណបក្ស​ទាំង​ពីរ​អនុវត្តន៍​នូវ​សេចក្តីថ្លែងការណ៍​រួម​របស់​គេ​កាលពី​ថ្ងៃ​ទី​១៦​ ខែកញ្ញា​ ដែល​ប្រឆាំង​នឹង​អំពើ​ហិង្សា​ គាំទ្រ​ឲ្យ​មានការ​ពិភាក្សា​ស្តី​ពី​កំណែទម្រង់​ការ​បោះ​ឆ្នោត​ និង​យល់ព្រម​ដោះស្រាយ​បញ្ហា​ជាតិ​នានា​តាម​រយៈ​ការ​ពិភាក្សា​គ្នា​ ។​ គណបក្ស​ទាំងអស់​គួរ​ចាប់​យក​ឱកាស​នេះ​ ដើម្បី​លើកកម្ពស់​ដំណើរការ​លទ្ធិប្រជាធិបតេយ្យ​ និង​អនុវត្តន៍​នូវ​កំណែទម្រង់​ដ៏​មាន​ន័យ​ដែល​ពង្រឹង​នីតិរដ្ឋ​ និង​បង្កើន​ការ​គោរព​សិទ្ធិ​មនុស្ស​ ។​ សហរដ្ឋអាមេរិក​សូម​ស្នើ​ឲ្យ​ថ្នាក់ដឹកនាំ​គណបក្ស​ធ្វើការ​ជាមួយ​គ្នា​ ដើម្បី​សម្រេច​បាន​នូវ​លទ្ធផល​មួយ​ដែល​ធ្វើ​ឲ្យ​ប្រទេស​មាន​ឯកភាព​គ្នា​ និង​បម្រើ​ផលប្រយោជន៍​ប្រជាពលរដ្ឋ​កម្ពុជា​ជា​ធំ​ ។​"​ ៕​ Im-Suosdey04William-E.Todd-2

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.