ថ្ងៃ អង្គារ ទី ២០ ខែ តុលា ឆ្នាំ ២០២០

ព្រះសង្ឃ​ប្រមាណ​២០០​អង្គ​ និង ​រាស្ត្រ​ម្ចាស់ឆ្នោត ​គ្រោង​ជួបជុំ​នៅមុខ​វាំង​ ស្នើ​ព្រះមហាក្សត្រ​ព្រះតម្រិះ​ឡើងវិញ​អំពី​ការកោះប្រជុំ​សភា​

ព្រះសង្ឃ​ចំនួន​ប្រមាណ​២០០​អង្គ​និង​ប្រជាពលរដ្ឋ​ជា​ម្ចាស់ឆ្នោត​គ្រោង​នឹង​ជួបជុំគ្នា​នៅមុខ​ព្រះបរមរាជវាំង​ដើម្បី​ស្នើសុំ​ព្រះមហាក្សត្រ​ទ្រង់​ព្រះតម្រិះ​ឡើងវិញ​អំពី​ការកោះប្រជុំ​រដ្ឋសភា​នីតិកាល​ទី​៥​លើកដំបូង​ថ្ងៃទី​២៣​ខែ កញ្ញា ឆ្នាំ​២០១៣​ខាងមុខ​។​

ការជួបជុំ​នឹង​ប្រព្រឹត្តទៅ​នា​វេលា​ម៉ោង​១៦​ល្ងាច​នៅ​ថ្ងៃទី​១៩​ខែ កញ្ញា ឆ្នាំ​២០១៣​នេះ បើតាម​ការ​ប្រកាសជូន​ដំណឹង​របស់ Page ដ៏​ល្បី​មួយ​ក្នុង​បណ្តាញ​សង្គម Facebook ឈ្មោះ I Love Cambodia Hot News II កាលពី​កន្លះ​ម៉ោង​មុន​ហើយ​ត្រូវបាន​បង្ហោះ​ពេញ Facebook​។​

ដំណើរការ​ជួបជុំគ្នា​នេះ ក្រៅពី​ស្នើសុំ​អង្គ​ព្រះមហាក្សត្រ​ព្រះតម្រិះ​ឡើងវិញ​ទាក់ទង​នឹង​ការកោះប្រជុំ​រដ្ឋសភា​នីតិកាល​ទី​៥​លើកដំបូង​នៅ​ថ្ងៃទី​២៣​ខែ កញ្ញា ឆ្នាំ​២០១៣​ខាងមុខ​នោះ ក៏មាន​បំណង​ដាក់​សម្ពាធ​ទៅលើ​អ្នកតំណាងរាស្ត្រ​ដែល​ទើប​ជាប់ឆ្នោត​ថ្មីៗ​មិន​ឲ្យ​ចូលរួម​ប្រជុំ​រដ្ឋសភា​ផងដែរ​។​

គួរ​រម្លឹក​ជូន​ដែរ​ថា អ្នកតំណាងរាស្ត្រ​ទើប​ជាប់ឆ្នោត​របស់​គណបក្ស​សង្គ្រោះ​ជាតិ​ចំនួន​៥៥​រូប កាលពី​ថ្ងៃទី​១៤​ខែកញ្ញា ឆ្នាំ​២០១៣​កន្លងមក​ធ្លាប់​បានទូល​ស្នើសុំ​ព្រះមហាក្សត្រ​ពន្យារពេល​កិច្ចប្រជុំ​រដ្ឋសភា​លើកដំបូង​ដែល​គ្រោង​ធ្វើ​នៅ​ថ្ងៃទី​២៣​ខែកញ្ញា ឆ្នាំ​២០១៣​ខាងមុខ​មួយរយៈ ដើម្បី​ទុក​ឳ​កាស​ឲ្យ​គណបក្ស​សង្គ្រោះ​ជាតិ​នឹង​គណបក្ស​ប្រជាជន​កម្ពុជា​បាន​ជួបពិភាក្សា​ចរចា​គ្នា​ដោះស្រាយ​បញ្ហា​ប្រទេសជាតិ​មួយចំនួន ប៉ុន្តែ​ត្រូវបាន​ច្រានចោល​ដោយ​អង្គ​ព្រះមហាក្សត្រ​តាម​ព្រះរាជា​សារ​ចុះ​ថ្ងៃទី​១៨​ខែកញ្ញា ឆ្នាំ​២០១៣ ហើយ​ព្រះមហាក្សត្រ​ទ្រង់​បានសម្រេច​ព្រះទ័យ​នឹង​យាង​ទៅ​បើក​កិច្ចប្រជុំ​រដ្ឋសភា​លើកដំបូង​តាម​កាល​វេលា​កំណត់​ថ្ងៃទី​២៣​ខែកញ្ញា ឆ្នាំ​២០១៣​ខាងមុខ​ដដែល​៕​

ilovecambodiahotnews2

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.