ថ្ងៃ សុក្រ ទី ៣០ ខែ តុលា ឆ្នាំ ២០២០

បាតុករ​មួយក្រុម​តូច​បាន​ប៉ះទង្គិច​ជាមួយ​សមត្ថកិច្ច​បង្ក​ឲ្យ​មាន​អំពើហិង្សា និងរងរបួសនៅមុខ​វត្ត​ឧណ្ណាលោម​

ព្រឹត្តិការណ៍​ថ្មីៗ​ចុងក្រោយ​ទាក់ទង​នឹង​ដំណើរការ​មហា​បាតុកម្ម​របស់​គណបក្ស​សង្គ្រោះ​ជាតិ​នៅវេលា​ម៉ោង​ប្រមាណ​១៧ ល្ងាច​នេះ គឺមាន​បាតុករ​មួយក្រុម​តូច​បាន​រុល​ធ្វើដំណើរ​ទៅមុខ​នៅ​ភូមិសាស្ត្រ​សង្កាត់​ជ័យជំនះ ខណ្ឌដូនពេញ មុខ​វត្ត​ឧណ្ណាលោម ធ្វើ​ឲ្យ​មានការ​ប៉ះទង្គិច​ជាមួយនឹង​សមត្ថកិច្ច​យាមកាម​នៅ​ទីនោះ ហើយ​ត្រូវបាន​សមត្ថកិច្ច​ប្រើប្រាស់​ទឹកសាប៊ូ និង​ឧស្ម័ន​បង្ហូរទឹកភ្នែក ព្រមទាំង​បាញ់​គ្រាប់កាំភ្លើង​ឡើងលើ​បំបែក​ក្រុមបាតុករ​ផងដែរ​។​

​ក្រុមបាតុករ​ដែល​ប្រឈមមុខ​ជាមួយនឹង​សមត្ថកិច្ច​នៅ​ទីនោះ បានបញ្ជាក់​ប្រាប់​ឲ្យ​ដឹងថា សមត្ថកិច្ច​និង​បាតុករ​បាន​ផ្ទុះ​កើតឡើង​នូវ​អំពើហិង្សា ដែល​នាំ​ឲ្យ​មាន​របួស​ដល់​ក្រុមបាតុករ​ទៀតផង និង​ប៉ុន្មាន​នាទី​ក្រោយមក​ឃើញ​មាន​វត្តមាន​អង្គការសិទ្ធិមនុស្ស អង្គការសហប្រជាជាតិ​ព្រមទាំង​លោក​ឧ​ត្ត​ម​សេនីយ៍​ឯក​ជួន សុវណ្ណ អគ្គ​ស្នងការរង​នគរបាលជាតិ និង​ជា​ស្នងការ​នគរបាល​រាជធានី​ភ្នំពេញ អញ្ជើញ​មក​ធ្វើ​អន្តរាគមន៍​ផងដែរ​។​

អំពើហិង្សា​ដែល​បានកើត​ឡើង​រវាង​សមត្ថកិច្ច និង​បាតុករ​មួយក្រុម​តូច​នេះ គឺ​ស្រប​ពេលដែល​ថ្នាក់ដឹកនាំ​គណបក្ស​សង្គ្រោះ​ជាតិ​បានប្រកាស​នៅ​ទីលាន​ប្រជាធិបតេយ្យ​ដែលជា​ទីតាំង​ជួបប្រជុំ​នៃ​មហា​បាតុកម្ម​នោះ​ថា មិន​ឲ្យ​មានការ​ដើរ​ហែ​ក្បួន​នៅ​ល្ងាច​នេះ​ទៀត​ទេ​។ 

មជ្ឈដ្ឋាន​ប្រជាពលរដ្ឋ​ដែល​គាំទ្រ​គណបក្ស​សង្គ្រោះ​ជាតិ​បាន​បញ្ចេញ​ទស្សនៈ​ថា សូម​ឲ្យ​ថ្នាក់ដឹកនាំ​គណបក្ស​សង្គ្រោះ​ជាតិ​មេត្តា​ត្រួតពិនិត្យ និង​មាន​វិធានការ​គ្រប់គ្រង​ឲ្យ​បាន​ល្អិតល្អន់​ផង​ទៅលើ​ក្រុមបាតុករ ចៀសវាង​មាន​ការលួចបន្លំ​បង្កប់កម្លាំង​បញ្ចូល​ពី​អ្នកដទៃ​បង្ក​ឲ្យ​មាន​អំពើហិង្សា​ផ្សេងៗ​កើតឡើង​ជាមួយ​សមត្ថ​កិច្ច និង​នាំ​ឲ្យ​ប៉ះពាល់​ដល់​ដំណើរការ​មហា​បាតុកម្ម​របស់​គណបក្ស​ទាំងមូល​៕​

 

 

 

BUMoBRoCMAA2_oE

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 72 84 71 / 015 86 87 53.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.