ថ្ងៃ សុក្រ ទី ៣០ ខែ តុលា ឆ្នាំ ២០២០

សមាសភាព​របស់​បក្ស​ឈ្នះឆ្នោត​ទាំងពីរ​ដែល​ត្រូវ​ចូលរួម​ប្រជុំ​ថ្ងៃស្អែក​ចំពោះ​ព្រះភ័ក្ត្រ​ព្រះមហាក្សត្រ​ក្នុង​ព្រះបរមរាជវាំង​

​នៅវេលា​ម៉ោង​០៩​ព្រឹក ថ្ងៃស្អែក​នេះ ថ្នាក់ដឹកនាំ​កំពូល​របស់​គណបក្សនយោបាយ​ឈ្នះឆ្នោត​នៅក្នុង​រដ្ឋសភា​នីតិកាល​ទី​៥ ទាំងពីរ​គឺ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ នឹងត្រូវ​ចូលរួម​ប្រជុំ​ដោះស្រាយ​បញ្ហា​ប្រទេសជាតិ​ក្រោម​ព្រះរាជា​ធិបតីនៃ​អង្គ​ព្រះមហាក្សត្រ​ក្នុង​ព្រះបរមរាជវាំង ខណៈដែល​គណបក្ស​សង្គ្រោះ​ជាតិ​នៅ​ប្រកាន់​ជំហរ​យ៉ាង​មុតមាំ​ថា នឹងធ្វើ​មហា​បាតុកម្មអហិង្សា​នៅ​ថ្ងៃទី​១៥ ខែកញ្ញា នៅ​ទីលាន​ប្រជាធិបតេយ្យ​ដដែល ដើម្បី​ទាមទារ​ឲ្យ​មានការ​បង្កើត​គណៈកម្មកា​រ​ចម្រុះ​ឯករាជ្យ​មួយ​ស៊ើបអង្កេត​ភាពមិនប្រក្រតី​នៃ​ការបោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៥ និង​បើទោះបី​មាន​រូបភាព​បំភិតបំភ័យ​ជាមុន ដោយ​សកម្មភាព​ដាក់​បង្កៃគ្រាប់​ផ្ទុះ នៅក្បែរ​ទីលាន​ប្រជាធិបតេយ្យ​វត្តភ្នំ​នា​ព្រឹក​នេះ​ក៏ដោយ​។​

សមាសភាព​របស់​គណ​បក្សនយោបាយ​ឈ្នះឆ្នោត​ទាំងពីរ ដែល​នឹងត្រូវ​ទៅ​ចូលរួម​ប្រជុំ នៅ​ចំពោះ​ព្រះភ័ក្ត្រ​ព្រះមហាក្សត្រ​ថ្ងៃស្អែក​នេះ គឺ​ខាង​គណបក្ស​ប្រជាជន​កម្ពុជា រួមមាន​៖ ១- សម្តេច​អគ្គមហាសេនាបតី​តេ​ជោ ហ៊ុន សែន អនុប្រធាន​គណបក្ស និង​ជា​បេក្ខជន​ជាប់ឆ្នោត​តំណាងរាស្ត្រ​នៅ​មណ្ឌល​ខេត្តកណ្តាល​, ២- ឯកឧត្តម សាយ ឈុំ អនុប្រធាន​ទី​១ ព្រឹទ្ធសភា និង ៣- ឯកឧត្តម ស ខេង បេក្ខជន​ជាប់ឆ្នោត​តំណាងរាស្ត្រ​នៅ​មណ្ឌល​ខេត្តបាត់ដំបង​។ រីឯ​ខាង​គណបក្ស​សង្គ្រោះ​ជាតិ រួមមាន​៖ ១- ឯកឧត្តម សម រង្ស៊ី ជា​ប្រធាន​គណបក្ស​, ២- ឯកឧត្តម កឹម សុខា អនុប្រធាន​គណបក្ស និង​ជា​បេក្ខជន​ជាប់ឆ្នោត​តំណាងរាស្ត្រ​នៅ​មណ្ឌល​ខេត្តកំពង់ចាម និង ៣- លោកជំទាវ ជូ​ឡុង សូ​មូរ៉ា បេក្ខជន​ជាប់ឆ្នោត​តំណាងរាស្ត្រ​នៅ​មណ្ឌល​រាជធានី​ភ្នំពេញ «​ជា​ភរិយា​របស់​ឯកឧត្តម សម រង្ស៊ី​» ។​

ឯកឧត្តម កឹម សុខា អនុប្រធាន​គណបក្ស​ស​ង្គ្រោះ​ជាតិ ដែលមាន​ឈ្មោះ​ត្រូវ​ចូលរួម​ប្រជុំ​ថ្ងៃស្អែក​ដែរនោះ បាន​មានប្រសាសន៍ប្រាប់​បណ្តាញ​ព័ត៌មាន​ថា កិច្ចប្រជុំ​ពិភាក្សា​នេះ គណបក្ស​សង្គ្រោះ​ជាតិ​នឹង​លើកឡើង​អំពី​ការមិន​ទទួលយក​លទ្ធផល​នៃ​ការបោះឆ្នោត និង​ទាមទារ​ឲ្យ​មានការ​បង្កើត​គណៈកម្មកា​រ​ចម្រុះ​ឯករាជ្យ ស៊ើបអង្កេត​ភាពមិនប្រក្រតី​នៃ​ការបោះឆ្នោត ពោលគឺ​មិន​ចរចា​គ្នា ក្នុងការ​បែងចែក​អំណាច​ឡើយ​។​

សូមបញ្ជាក់​ជូន​ថា ភាពចម្រូងចម្រាស ឬ​ខ្វែងគំនិត​គ្នា​ដែលជា​ចំណុច​វិវាទ​រវាង​គណបក្សនយោបាយ​ធំៗ​ទាំងពីរ​នេះ គឺ​គណបក្ស​សង្គ្រោះ​ជាតិ​ដែល​បានទទួល​អាសនៈ​នៅក្នុង​រដ្ឋសភា​ចំនួន​៥៥ អាសនៈ តាម​ការប្រកាស និង​សម្រេច​ជា​ផ្លូវការ​របស់​គណៈកម្មាធិកា​រ​ជាតិ​រៀបចំ​ការបោះឆ្នោត «​គ​.​ជ​.​ប​» នោះ ទាមទារ​ឲ្យ​មានការ​បង្កើត​គណៈកម្មកា​រ​ចម្រុះ​ឯករាជ្យ​ស៊ើបអង្កេត​ភាពមិនប្រក្រតី​នៃ​ការបោះឆ្នោត ដើម្បី​បង្ហាញ​ឲ្យ​ឃើញថា គណបក្ស​ឈ្នះឆ្នោត ឈ្នះ​ដោយ​ថ្លៃថ្នូរ និង​គណបក្ស​ចាញ់ឆ្នោត ចាញ់​ដោយ​អស់ចិត្ត និង​ដើម្បី​ផ្តល់​យុត្តិធម៌​ពិតប្រាកដ​ជូន​ប្រជាពលរដ្ឋ​ជា​ម្ចាស់ឆ្នោត​ផង​។ ដោយឡែក​គណបក្ស​ប្រជាជន​កម្ពុជា ដែល​ទទួលបាន​អាសនៈ​នៅក្នុង​រដ្ឋសភា​ចំនួន​៦៨​អាសនៈ​នោះ អះអាងថា ការទាមទារ​របស់​គ​ណ​បក្ស​សង្គ្រោះ​ជាតិ​គឺជា​ការរំលោភបំពាន​ទៅលើ​ច្បាប់​របស់​ជាតិ ពីព្រោះ​ការដោះស្រាយ​ទាក់ទង​នឹង​រឿង​បោះឆ្នោត​ជា​សមត្ថកិច្ច​របស់ គ​.​ជ​.​ប និង​ក្រុមប្រឹក្សាធម្មនុញ្ញ​។​

​ចំណុច​វិវាទ​ដែល​មិនទាន់​ដោះស្រាយ​ឲ្យ​បាន​ចប់​ស្រេចបាច់​នេះហើយ​ជាហេតុ​ធ្វើ​ឲ្យ​គណបក្ស​សង្គ្រោះ​ជាតិ​ប្រើប្រាស់​ជម្រើស​ចុងក្រោយ​គឺ​ការដឹកនាំ​ធ្វើ​មហា​បាតុកម្ម​ទាមទារ​ឲ្យ​មានការ​បង្កើត​គណៈកម្មកា​រ​ចម្រុះ​ឯករាជ្យ​ស៊ើបអង្កេត​ភាពមិនប្រក្រតី​នៃ​ការបោះឆ្នោត​កាលពី​ថ្ងៃទី​០៧ ខែកញ្ញា រួច​ម្តងមកហើយៗ​គ្រោង​នឹងធ្វើ​សាជាថ្មី​ទៀត​នៅ​ថ្ងៃទី​១៥​ខែកញ្ញា ខាងមុខនេះ​៕​

800px-Le_Palais_Royal_

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 72 84 71 / 015 86 87 53.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.