ថ្ងៃ សុក្រ ទី ៣០ ខែ តុលា ឆ្នាំ ២០២០

គណបក្សប្រឆាំង​បាន និង​កំពុង​សាកល្បង​បណ្តុះ​គ្រាប់ពូជ​លទ្ធិប្រជាធិបតេយ្យ​ឲ្យ​ដុះដាល​នៅ​កម្ពុជា​

កាលពី​ថ្ងៃទី​១១ ខែកញ្ញា ឆ្នាំ​២០១៣ ម្សិលមិញ​នេះ គណបក្ស​សង្គ្រោះ​ជាតិ​បានសម្រេច​ប្តឹង​ឯកឧត្តម អ៊ឹម សួស្តី ប្រធាន​គណៈកម្មាធិការ​ជាតិ​រៀបចំ​ការបោះឆ្នោត «​គ​.​ជ​.​ប​» ទៅ​ស្ថាប័ន​អយ្យការ​អម​សាលាដំបូង​រាជធានី​ភ្នំពេញ ដោយ​ចោទប្រកាន់ថា ថ្នាក់ដឹកនាំ គ​.​ជ​.​ប រូបនេះ ក្លែងបន្លំ​ឯកសារ​សាធារណៈ និង​ប្រើប្រាស់​ឯកសារ​សាធារណៈ​ក្លែង បើទោះបី​គណបក្ស​សង្គ្រោះ​ជាតិ​តែង​បានលើកឡើង​ជារឿយៗ​ថា ស្ថាប័ន​តុលាការ​កម្ពុជា មិន​ឯករាជ្យ និង​អសមត្ថភាព​ក៏ដោយ​។​

​អាច​និយាយបានថា នេះ​គឺជា​លើកទីមួយ​ហើយ ដែល​គណបក្សនយោបាយ​ចូលរួម​បោះឆ្នោត​នៅ​កម្ពុជា ប្តឹង​ថ្នាក់ដឹកនាំ គ​.​ជ​.​ប ទៅ​ស្ថាប័ន​តុលាការ ខណៈដែល​មជ្ឈដ្ឋាន​នានា​បាន​សង្កេត​មើលឃើញថា ប្រព័ន្ធ​ការងារ​របស់ គ​.​ជ​.​ប មិន​ឯករាជ្យ និង​អសមត្ថភាព​អស់​រយៈពេល​ចំនួន​៤​អាណត្តិ​មកហើយ​។ 

​ក្រៅ​អំពី​ករណី​គណបក្ស​សង្គ្រោះ​ជាតិ​ប្តឹង​មេ គ​.​ជ​.​ប ទៅ​តុលាការ ដោយឡែក​សូម្បីតែ​យុវជន​របស់​គណបក្ស​សង្គ្រោះ​ជាតិ​អាយុ​២៦​ឆ្នាំ ម្នាក់​ឈ្មោះ សួង សុ​ភ័​ណ្ឌ ដែលជា​បេក្ខជន​តំណាងរាស្ត្រ​ពេញសិទ្ធិ​របស់​គណបក្ស​ស​ង្គ្រោះ​ជាតិ​នៅ​មណ្ឌល​ខេត្ត​ប៉ៃលិន «​មិនបាន​ជាប់ឆ្នោត​នៅ​អាណត្តិ​ទី​៥​នេះ​ទេ​» ក៏​ធ្លាប់បាន​ប្តឹង​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ជា​បុរស​ខ្លាំង​នៅ​កម្ពុជា ទៅ​តុលាការ​ចំនួន​២​លើក​រួចមកហើយ​ដែរ គឺ​លើក​ទី​១ ប្តឹង​នៅ​ថ្ងៃទី​៣០ ខែវិច្ឆិកា ឆ្នាំ​២០១២ ចោទប្រកាន់​ពីបទ ឃាតកម្ម​គិតទុក​ជាមុន ដែល​ធ្វើ​ឲ្យ​ពលរដ្ឋ​ខ្មែរ​ស្លាប់​ចំនួន​៣៥៣​នាក់ និង​រងរបួស​ជាង​៤០០​នាក់ នៅលើ​ស្ពាន​ពេជ្រ នៃ​មជ្ឈមណ្ឌល​កម្សាន្ត​កោះ​ពេជ្រ នា​រាត្រី​ថ្ងៃទី​២២ ខែវិច្ឆិកា ឆ្នាំ​២០១០ និង​លើក​ទី​២ ប្តឹង​នៅ​ថ្ងៃទី​២០ ខែមិថុនា ឆ្នាំ​២០១៣ ចោទប្រកាន់​ពីបទ​ក្លែងបន្លំ​ឯកសារ​សាធារណៈ បណ្តោយ​ឲ្យ​ជនជាតិ​វៀតណាម​ចូលមក​កម្ពុជា​ដោយ​ខុសច្បាប់​។​

​ទោះយ៉ាងណា​ក៏ដោយ​បណ្តឹង​ទាំងពីរ របស់​យុវជន សួង សុ​ភ័​ណ្ឌ ដែល​ប្តឹង​ប្រឆាំងនឹង «​សម្តេច​តេ​ជោ​សែន​» ត្រូវបាន​តុលាការ​សម្រេច​តម្កល់​រឿង​ទុក​ឥត​ចាត់ការ​ទាំងអស់។​

​នាពេល​ថ្មីៗ​កន្លងទៅនេះ គណបក្ស​សង្គ្រោះ​ជាតិ​បាន​ដឹកនាំ​ប្រជាពលរដ្ឋ​ជា​ម្ចាស់ឆ្នោត​រាប់ម៉ឺន​នាក់​ធ្វើ​មហា​បាតុកម្ម​មិន​ទទួលស្គាល់​លទ្ធផល​នៃ​ការបោះឆ្នោត និង​ទាមទារ​ឲ្យ​មានការ​បង្កើត​គណៈកម្មកា​រ​ចម្រុះ​ឯករាជ្យ ស៊ើបអង្កេត​ភាពមិនប្រក្រតី​នៃ​ការបោះឆ្នោត យ៉ាង​គគ្រឹកគគ្រេង នៅ​រាជធានី​ភ្នំពេញ ហើយ​ត្រៀម​នឹងធ្វើ​មហា​បាតុកម្ម​សាជាថ្មី​នៅ​ថ្ងៃទី​១៥-១៦-១៧ ខែកញ្ញា ឆ្នាំ​២០១៣ ខាងមុខនេះ​ទៀត​បើទោះបី​ញត្តិ​នៃ​ការធ្វើ​មហា​បាតុកម្ម​លើក​ទី​១ មិន​ត្រូវបាន​គណបក្ស​កាន់អំណាច និង គ​.​ជ​.​ប ពិចារណា និង​សម្រេច​ដោះស្រាយ​ក៏ដោយ​។​

​អនុលោម​តាម​ស្ថានភាព​ជាក់ស្តែង​ដែល​បាន​ជួបប្រទះ​នាពេល​កន្លងមក និង​តាម​របៀបរបប​ធ្វើការ​របស់​ស្ថាប័ន​តុលាការ​នៅ​កម្ពុជា គឺ​មជ្ឈដ្ឋាន​នានា​បាន​ទស្សន៍ទាយ​ទុកជាមុន​ថា តុលាការ​នឹង​សម្រេច​តម្កល់​រឿង​ទុក​ឥត​ចាត់ការ​ទៅលើ​បណ្តឹង​របស់​គណបក្ស​ស​ង្គ្រោះ​ជាតិ ដែល​ប្តឹង​មេ គ​.​ជ​.​ប ក្នុង​រឿង​ព្រហ្មទណ្ឌ​មិន​ខាន ដោយ​តុលាការ​អាច​នឹង​យោងតាម​សេចក្តីសម្រេច​របស់​ក្រុមប្រឹក្សាធម្មនុញ្ញ ដើម្បី​ដោះ​បន្ទុក​ឲ្យ​ជនសង្ស័យ​ជាម​ន្ត្រី​ធំៗ​របស់ គ​.​ជ​.​ប ទាក់ទង​នឹង​រឿង​បោះឆ្នោត​។​

​មជ្ឈដ្ឋាន​អ្នកតាមដាន​ព្រឹត្តិការណ៍​នយោបាយ​នៅ​កម្ពុជា​បានលើកឡើង​ថា ទោះបី​មហា​បាតុកម្ម​ក្តី និង​ពាក្យបណ្តឹង​ក្តី​របស់​គណបក្ស​សង្គ្រោះ​ជាតិ​មិន​ត្រូវបាន​គណបក្សកាន់អំណាច និង​តុលាការ​ដោះស្រាយ​ក៏ដោយ ក៏បាន​បង្ហាញ​ឲ្យ​ឃើញថា គណបក្សប្រឆាំង​បាននិងកំពុង​សាកល្បង​បណ្តុះ​គ្រាប់ពូជ​លទ្ធិប្រជាធិបតេយ្យ​នៅ​កម្ពុជា ឲ្យ​រីកដុះដាល​សម្រាប់​ទុក​ឲ្យ​ប្រជាពលរដ្ឋ​ខ្មែរ​បាន​ពិចារណា និង​ស្វែងយល់​អំពី​អត្ថប្រយោជន៍​នៃ​លទ្ធិប្រជាធិបតេយ្យ​ពិតប្រាកដ​៕​

DSC02494

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 72 84 71 / 015 86 87 53.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.