ថ្ងៃ អាទិត្យ ទី ២៥ ខែ តុលា ឆ្នាំ ២០២០

កម្តៅ​ក្នុង​Facebook​កើនឡើង​ក្រោយ​ព្រះមហាក្សត្រ​ចេញ​ព្រះរាជ​សារ​កោះ​ប្រជុំ​សភា​ថ្ងៃ​ទី​២៣​ កញ្ញា​ ខណៈ​គណបក្ស​សង្គ្រោះ​ជាតិ​ប្រកាស​ធ្វើ​បាតុកម្ម​ថ្ងៃ​ទី​១៥​កញ្ញា​

​កាលពី​ថ្ងៃ​ទី​០៩​ ខែកញ្ញា​ ឆ្នាំ​២០១៣​ម្សិលមិញ​នេះ​ បន្ទាប់​ពី​ទទួល​បាន​លិខិត​ចុះ​ថ្ងៃ​ទី​០៨​ ខែកញ្ញា​ ឆ្នាំ​២០១៣​របស់​ឯកឧត្តម​ អ៊ឹម​ សួស្តី​ ប្រធាន​គណៈកម្មាធិការ​ជាតិ​រៀបចំ​ការ​បោះ​ឆ្នោត​ "​គ​.​ជ​.​ប​"​ រួច​មក​ ព្រះករុណា​ព្រះបាទ​សម្តេចព្រះ​បរមនាថ​ នរោត្តម​ សីហ​មុនី​ ព្រះមហាក្សត្រ​នៃ​ព្រះរាជាណាចក្រ​កម្ពុជា​ ទ្រង់​បាន​ចេញ​ព្រះរាជ​សារ​មួយ​ពី​ទីក្រុង​ប៉េ​កាំ​ង​ ប្រទេស​ចិន​ នឹង​កោះ​អញ្ជើញ​បេក្ខជន​ជាប់​ឆ្នោត​ជា​តំណាងរាស្ត្រ​នីតិកាល​ទី​៥​ទាំងអស់​ ប្រជុំ​ដំបូង​នា​ថ្ងៃ​ទី​២៣​ ខែកញ្ញា​ ឆ្នាំ​២០១៣​ នៅ​វិមាន​រដ្ឋសភា​ ។​

​មជ្ឈដ្ឋាន​អ្នក​ច្បាប់​បាន​លើក​ឡើង​ថា​ ការ​កោះ​ប្រជុំ​សភា​លើក​ដំបូង​ដោយ​អង្គ​ព្រះមហាក្សត្រ​ គឺ​ធ្វើ​ឡើង​តាម​បញ្ញត្តិ​មាត្រា​៨២​ថ្មី​នៃ​ច្បាប់​ធម្មនុញ្ញ​ ស្តី​ពី​វិសោធនកម្ម​នៃ​ច្បាប់​ធម្មនុញ្ញ​បន្ថែម​ សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ​ ដែល​ប្រកាស​ឲ្យ​ប្រើ​ដោយ​ព្រះរាជក្រម​លេខ​ន​ស​/​រកម​/០៣០៦/០០៦​ ចុះ​ថ្ងៃ​ទី​០៩​ ខែមីនា​ ឆ្នាំ​២០០៦​ បាន​ចែង​ថា​ "​រដ្ឋសភា​បើក​សម័យប្រជុំ​ដំបូង​៦០​ថ្ងៃ​យ៉ាង​យូរ​ ក្រោយ​ពេល​បោះ​ឆ្នោត​តាម​ការ​កោះ​ប្រជុំ​របស់​ព្រះមហាក្សត្រ​ ។​"​ ។​

​ដោយឡែក​ គណបក្ស​សង្គ្រោះ​ជាតិ​ដែល​ទទួល​បាន​អាសនៈ​នៅ​ក្នុង​រដ្ឋសភា​នីតិកាល​ទី​៥​ ចំនួន​៥៥​អាសនៈ​ឯណោះ​វិញ​ បាន​ប្រកាស​កាលពី​ថ្ងៃ​ទី​០៨​ ខែកញ្ញា​ ឆ្នាំ​២០១៣​ ក្រោយ​ពេល​ គ​.​ជ​.​ប​ ប្រកាស​លទ្ធផល​ឆ្នោត​ផ្លូវការ​ថា​ នឹង​រៀបចំ​ធ្វើ​មហា​បាតុកម្ម​រយៈពេល​ចំនួន​៣​ថ្ងៃ​ជាប់ៗ​គ្នា​ ទាមទារ​ឲ្យ​មានការ​បង្កើត​គណៈកម្មការ​ចម្រុះ​ឯករាជ្យ​ស៊ើបអង្កេត​ភាព​មិន​ប្រក្រតី​នៃ​ការ​បោះ​ឆ្នោត​ ដើម្បី​ផ្តល់​យុត្តិធម៌​ជូន​ប្រជាពលរដ្ឋ​ជា​ម្ចាស់​ឆ្នោត​ ។​ ​

ឆ្លុះ​បញ្ចាំង​តាម​រយៈ​សកម្មភាព​នៅ​ក្នុង​បណ្តាញ​សង្គម​ Facebook​ ដ៏​ពេញ​និយម​នៅ​កម្ពុជា​ បាន​បង្ហាញ​ថា​ ការ​ប្រកាស​ធ្វើ​មហា​បាតុកម្ម​សា​ជា​ថ្មី​រយៈពេល​បី​ថ្ងៃ​ជាប់ៗ​គ្នា​ របស់​គណបក្ស​សង្គ្រោះ​ជាតិ​នោះ​ បាន​ញ៉ាំង​ឲ្យ​ទឹកចិត្ត​របស់​អ្នកគាំទ្រ​គណបក្ស​សង្គ្រោះ​ជាតិ​ពុះកញ្ជ្រោល​ក្នុង​ការ​ត្រៀមខ្លួន​ចូលរួម​ជាមួយ​គណបក្ស​សង្គ្រោះ​ជាតិ​ ជា​ពិសេស​ក្នុង​ស្រទាប់​យុវជន​សម័យ​ថ្មី​ រហូត​ពួក​គេ​ទាមទារ​ចង់​ឲ្យ​មាន​មហា​បាតុកម្ម​ហែ​ជា​ក្បួន​ទៀត​ផង​ ។​

​អ្នកលេង​ Facebook​ បាន​ Post​ នូវ​អត្ថបទ​មួយ​ក្នុង​ Page​ ឈ្មោះ​ I​ Love​ Cambodia​ Hot​ News​ កាលពី​ថ្ងៃ​ម្សិលមិញ​ថា​ "​ពាក្យពិត​ថ្វាយ​ជូន​ព្រះមហាក្សត្រ​ ៖​ ព្រះមហាក្សត្រ​នឹង​យាង​មក​កម្ពុជា​វិញ​នៅ​ថ្ងៃ​ទី​១៣​ ខែកញ្ញា​ ខាង​មុខ​ ។​ តាម​ទស្សនៈ​ទូលព្រះបង្គំជាខ្ញុំ​ផ្ទាល់​ ជា​ប្រជាពលរដ្ឋ​ម្នាក់​ ចង់​ទូល​ថ្វាយ​ព្រះ​អង្គ​ថា​ បើ​ទ្រង់​យាង​មក​ ហើយ​ចង់​ធ្វើ​ជា​អាជ្ញាកណ្តាល​ដោះស្រាយ​បញ្ហា​វិបត្តិ​នយោបាយ​ សូម​ទ្រង់​ផ្អែក​លើ​យុត្តិធម៌​ជា​ធំ​ និង​ក៏​ត្រូវ​មាន​វិធានការ​ចំពោះ​អ្នក​ប្រព្រឹត្ត​ការ​លួច​បន្លំ​សន្លឹក​ឆ្នោត​ ព្រមទាំង​អ្នក​នៅ​ពីក្រោយ​ផង​ដែរ​ ។​ តែបើ​ទ្រង់​ធ្វើ​មិន​បាន​ទេ​ ហើយ​គ្រាន់តែ​យាង​មក​ជួយ​បង្គ្រប់កិច្ច​ឲ្យ​ គ​.​ជ​.​ប​ និង​គណបក្ស​ប្រជាជន​កម្ពុជា​ទេ​ សូម​ទ្រង់​មេត្តា​គង់នៅ​ប៉េ​កាំ​ង​ចុះ​ល្អ​ជាង​ ឬ​កុំ​ពាក់ព័ន្ធ​នឹង​រឿង​នេះ​អី​ ដោយ​ទុក​ឲ្យ​ទូល​បង្គំ​យើងខ្ញុំ​ជា​ប្រជាជន​ ឬ​យុវជន​ជា​អ្នក​ដោះស្រាយ​ទៅ​ចុះ​ ។​"​ ។​

​ដោយសារ​គណបក្ស​សង្គ្រោះ​ជាតិ​ប្រកាស​ធ្វើ​មហា​បាតុកម្ម​ ដែល​រំពឹង​ថា​ នឹង​មាន​អ្នកចូលរួម​ច្រើន​ និង​អង្គ​ព្រះមហាក្សត្រ​ទ្រង់​សម្រេច​ព្រះ​ទ័យ​កោះ​ប្រជុំ​រដ្ឋសភា​លើក​ដំបូង​នៅ​ថ្ងៃ​ទី​២៣​ ខែកញ្ញា​ ឆ្នាំ​២០១៣​ខាង​មុខ​ ជា​ហេតុ​នាំ​ឲ្យ​កម្តៅ​ចេះ​តែ​កើនឡើង​ខ្លាំង​ទៅៗ​ក្នុង​បណ្តាញ​សង្គម​ Facebook​ ដ៏​ពេញ​និយម​នៅ​កម្ពុជា​ ។​

​គេ​មិន​ទាន់​ដឹង​ច្បាស់​ថា​ តើ​គណបក្ស​សង្គ្រោះ​ជាតិ​នឹង​ធ្វើការ​ផ្លាស់​ប្តូរ​ជំហរ​របស់​ខ្លួន​ឡើង​វិញ​ក្នុង​ការ​ធ្វើ​មហា​បាតុកម្ម​ឬ​យ៉ាងណា​នៅឡើយ​ទេ​ បន្ទាប់​ពី​មាន​ព្រះរាជ​សារ​របស់​ព្រះមហាក្សត្រ​នា​ថ្ងៃ​ម្សិលមិញ​ថា​ ទ្រង់​នឹង​កោះ​ប្រជុំ​រដ្ឋសភា​ដំបូង​នៅ​ថ្ងៃ​ទី​២៣​ ខែកញ្ញា​ ឆ្នាំ​២០១៣​ ខាង​មុខ​នោះ​ និង​បេក្ខជន​ជាប់​ឆ្នោត​ជា​តំណាងរាស្ត្រ​នីតិកាល​ទី​៥​របស់​គណបក្ស​សង្គ្រោះ​ជាតិ​ចំនួន​៥៥​រូប​នឹង​ចូលរួម​ប្រជុំ​សភា​លើក​ដំបូង​ដែរ​ឬ​ក៏​អត់​ ?​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.