ថ្ងៃ សុក្រ ទី ៣០ ខែ តុលា ឆ្នាំ ២០២០

កូនប្រុស​”​សម្តេច​តេ​ជោ​សែន​”​និង​ឯកឧត្តម​ស​ខេ​ង​ជាប់​ឆ្នោត​ជា​អ្នកតំណាង​រាស្ត្រ​នីតិកាល​ទី​៥​ដែល​មាន​អាយុ​ក្មេង​ជាងគេ​បង្អស់​

​សេចក្តីសម្រេច​របស់​គណៈកម្មាធិការ​ជាតិ​រៀបចំ​ការ​បោះ​ឆ្នោត​"​គ​.​ជ​.​ប​"​នៅ​ថ្ងៃ​ទី​០៨​ ខែកញ្ញា​ ឆ្នាំ​២០១៣​នេះ​ ដែល​បាន​ប្រកាស​លទ្ធផល​ឆ្នោត​ផ្លូវការ​នៃ​ការ​បោះ​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៥​ កាលពី​ថ្ងៃ​ទី​២៨​ ខែកក្កដា​ ឆ្នាំ​២០១៣​កន្លង​មក​ បាន​បង្ហាញ​ឲ្យ​ឃើញ​ថា​ កូនប្រុស​បង្កើត​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ អនុប្រធាន​គណបក្ស​ប្រជាជន​កម្ពុជា​ ដ៏​មាន​ឥទ្ធិពល​ និង​ជា​អ្នកតំណាង​រាស្ត្រ​ជាប់​ឆ្នោត​នៅ​មណ្ឌល​ខេត្តកណ្តាល​ របស់​គណបក្ស​ប្រជាជន​កម្ពុជា​ និង​កូនប្រុស​បង្កើត​របស់​ឯកឧត្តម​ ស​ ខេ​ង​ សមាជិក​គណៈ​អចិន្ត្រៃយ៍​នៃ​គណៈកម្មាធិការ​កណ្តាល​គណបក្ស​ប្រជាជន​កម្ពុជា​ និង​ជា​អ្នកតំណាង​រាស្ត្រ​ជាប់​ឆ្នោត​នៅ​មណ្ឌល​ខេត្តបាត់ដំបង​ បាន​ជាប់​ឆ្នោត​ជា​អ្នកតំណាង​រាស្ត្រ​នីតិកាល​ទី​៥​ ដែល​មាន​វ័យក្មេង​ជាងគេ​បង្អស់​នៅ​ក្នុង​ចំណោម​អ្នកតំណាង​រាស្ត្រ​ជាប់​ឆ្នោត​ចំនួន​១២៣​រូប​ ។​

​កូនប្រុស​របស់​"​សម្តេច​តេ​ជោ​សែន​"​ ដែល​ជា​បុរស​ខ្លាំង​នៃ​កម្ពុជា​ គឺ​ឯកឧត្តម​ ហ៊ុន​ ម៉ា​នី​ អាយុ​៣០​ឆ្នាំ​ បាន​ជាប់​ឆ្នោត​ជា​អ្នកតំណាង​រាស្ត្រ​នៅ​មណ្ឌល​ខេត្តកំពង់ស្ពឺ​ មក​ពី​គណបក្ស​ប្រជាជន​កម្ពុជា​ ។​ លោក​ ហ៊ុន​ ម៉ា​នី​ បាន​ឈរឈ្មោះ​ជា​បេក្ខជន​តំណាងរាស្ត្រ​ពេញ​សិទ្ធិ​លំដាប់​លេខ​រៀង​ទី​៤​ របស់​គណបក្ស​ប្រជាជន​កម្ពុជា​ នៅ​មណ្ឌល​ខេត្តកំពង់ស្ពឺ​ ខណៈ​ដែល​នៅ​មណ្ឌលបោះឆ្នោត​ខេត្តកំពង់ស្ពឺ​នេះ​ គណបក្ស​ប្រជាជន​កម្ពុជា​ទទួល​បាន​អាសនៈ​ចំនួន​៣​អាសនៈ​ ។​ ប៉ុន្តែ​ដោយសារ​ឯកឧត្តម​ សាយ​ ឈុំ​ ជា​អនុប្រធាន​ទី​១​ព្រឹទ្ធសភា​ និង​ឯកឧត្តម​ ឆាយ​ ថន​ ដែល​ជា​បេក្ខជន​តំណាងរាស្ត្រ​ពេញ​សិទ្ធិ​លំដាប់​លេខ​រៀង​ទី​១​ និង​លេខ​រៀង​ទី​២​ បាន​ដកខ្លួន​ថយ​ ទើប​លោក​ ហ៊ុន​ ម៉ា​នី​ មានឱកាស​បាន​ក្លាយជា​អ្នកតំណាង​រាស្ត្រ​ជាប់​ឆ្នោត​នៅ​មណ្ឌល​ខេត្តកំពង់ស្ពឺ​តែ​ម្តង​ ។​

​ដោយឡែក​កូនប្រុស​របស់​ឯកឧត្តម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ គឺ​ឯកឧត្តម​ ស​ សុខា​ អាយុ​៣២​ឆ្នាំ​ បាន​ជាប់​ឆ្នោត​ជា​អ្នកតំណាង​រាស្ត្រ​នៅ​មណ្ឌល​ខេត្តព្រៃវែង​ មក​ពី​គណបក្ស​ប្រជាជន​កម្ពុជា​ ។​ លោក​ ស​ សុខា​ បាន​ឈរឈ្មោះ​ជា​បេក្ខជន​តំណាងរាស្ត្រ​ពេញ​សិទ្ធិ​លំដាប់​លេខ​រៀង​ទី​៦​ របស់​គណបក្ស​ប្រជាជន​កម្ពុជា​ នៅ​មណ្ឌល​ខេត្តព្រៃវែង​ ខណៈ​ដែល​នៅ​មណ្ឌលបោះឆ្នោត​ខេត្តព្រៃវែង​នេះ​ គណបក្ស​ប្រជាជន​កម្ពុជា​ទទួល​បាន​អាសនៈ​ចំនួន​៥​អាសនៈ​ ។​ ប៉ុន្តែ​ដោយសារ​ឯកឧត្តម​ ព្រុំ​ សុខា​ និង​ឯកឧត្តម​ ញឹ​ម​ វណ្ណ​ដា​ ដែល​ជា​បេក្ខជន​តំណាងរាស្ត្រ​ពេញ​សិទ្ធិ​លំដាប់​លេខ​រៀង​ទី​៤​ និង​លេខ​រៀង​ទី​៥​ បាន​ដកខ្លួន​ថយ​ ទើប​លោក​ ស​ សុខា​ មានឱកាស​បាន​ក្លាយជា​អ្នកតំណាង​រាស្ត្រ​ជាប់​ឆ្នោត​នៅ​មណ្ឌល​ខេត្តព្រៃវែង​ ។​ ​

សរុបសេចក្តី​មក​ កូនបង្កើត​របស់​ថ្នាក់ដឹកនាំ​សំខាន់ៗ​នៃ​គណបក្ស​ប្រជាជន​កម្ពុជា​ ចាប់ផ្តើម​ចូល​ប្រឡូក​យ៉ាង​សកម្ម​ក្នុង​ឆាកនយោបាយ​ហើយ​ ដោយ​មានឈ្មោះ​ជា​អ្នកតំណាង​រាស្ត្រ​វ័យក្មេង​ជាងគេ​បង្អស់​ ក្នុង​ចំណោម​អ្នកតំណាង​រាស្ត្រ​ចំនួន​១២៣​រូប​នៅ​ក្នុង​រដ្ឋសភា​នីតិកាល​ទី​៥​ខាង​មុខ​ ៕​

 

Filed in: Uncategorized, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 72 84 71 / 015 86 87 53.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.