ថ្ងៃ ចន្ទ ទី ១៩ ខែ តុលា ឆ្នាំ ២០២០

មហាជន​ប្រមាណ​៧​ម៉ឺន​នាក់ និង​ព្រះសង្ឃ​ប្រមាណ​១.៦០០​អង្គ​បាន​អញ្ជើញ និង​និមន្ត​ចូលរួម​មហា​បាតុកម្មអហិង្សា​ជាមួយ​គណបក្សប្រឆាំង​ព្រឹក​នេះ​

​ទោះបី​ទទួលរង​ការបំភិតបំភ័យ ការឆែកឆេរ ការហាមឃាត់ និង​ការ​បង្អាក់ដំណើរ​ពី​សំណាក់​អាជ្ញាធរ និង​ពី​សម្តេចព្រះ​អគ្គ​មហាសង្ឃរាជ​ក៏ដោយ ក៏​មហាជន​ពី​គ្រប់​មជ្ឈដ្ឋាន និង​ព្រះសង្ឃ​ជាច្រើន​នាក់ និង​ច្រើន​អង្គ បាន​អញ្ជើញ និង​និមន្ត​មក​ចូលរួម​មហា​បាតុកម្មអហិង្សា ដឹកនាំ​ដោយ​គណបក្ស​សង្គ្រោះ​ជាតិ មាន​ឯកឧត្តម សម រង្ស៊ី ជា​ប្រធាន​យ៉ាង​កុះករ​នៅ​ទីលាន​ប្រជាធិបតេយ្យ សង្កាត់​វត្តភ្នំ ខណ្ឌដូនពេញ រាជធានី​ភ្នំពេញ ចាប់តាំងពី​វេលា​ម៉ោង​០៧ ព្រឹក នា​ថ្ងៃទី​០៧ ខែកញ្ញា ឆ្នាំ​២០១៣​នេះ​។​

​តាម​ការសង្កេត​ជាក់ស្តែង​យ៉ាង​ម៉ត់ចត់​បំផុត​បាន​បង្ហាញថា មាន​មហាជន​ប្រមាណ​៧​ម៉ឺន​នាក់ និង​ព្រះសង្ឃ​ប្រមាណ​១៦០០​អង្គ បាន​អញ្ជើញ និង​និមន្ត ចូលរួម​ក្នុង​មហា​បាតុកម្មអហិង្សា​នា​វេលា​ព្រឹក​នេះ ដែល​ដឹកនាំ​ដោយ​គណបក្ស​សង្គ្រោះ​ជាតិ ដើម្បី​បង្ហាញ​អំពី​ឆន្ទៈ និង​សម្តែង​មតិ​សុំ​សេចក្តីសុខ​សន្តិភាព និង​យុត្តិធម៌​តាមរយៈ​ការទាមទារ​ឲ្យ​មានការ​បង្កើត​គណៈកម្មកា​រ​ពិសេស​ឯករាជ្យ​មួយ​ស៊ើបអង្កេត និង​ដោះស្រាយ​ភាពមិនប្រក្រតី​ទាក់ទង​នឹង​លទ្ធផល​នៃ​ការបោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៥ ថ្ងៃទី​២៨ ខែកក្កដា ឆ្នាំ​២០១៣​កន្លងមក​។​

​ថ្នាក់ដឹកនាំ​គណបក្ស​សង្គ្រោះ​ជាតិ គឺ​ឯកឧត្តម សម រង្ស៊ី ជា​ប្រធាន​ដ៏​មាន​ប្រជាប្រិយភាព​បាន​ថ្លែង​ទៅកាន់​ក្រុមបាតុករ​ដ៏​ច្រើន​កុះករ​ហៀរហូរ​ចេញពី​ទីតាំង​ទីលាន​ប្រជាធិបតេយ្យ​រហូតដល់​វត្តភ្នំ​ទៀត​នោះ​ថា គោលបំណង​នៃ​ការធ្វើ​មហា​បាតុកម្មអហិង្សា​នៅថ្ងៃនេះ​គឺ ចង់​ស្វែងរក​យុត្តិធម៌​ជូន​ម្ចាស់ឆ្នោត និង​ទាមទារ​ឲ្យ​មានការ​បង្កើត​គណៈកម្មកា​រ​ឯករាជ្យ​មួយ ដែលមាន​អង្គការ​ជាតិ និង​អង្គការសហប្រជាជាតិ ចូលរួម​ដោះស្រាយ​នូវ​ភាពមិនប្រក្រតី​ក្នុង​ដំណើរការ​បោះឆ្នោត កាលពី​ថ្ងៃទី​២៨ ខែកក្កដា ឆ្នាំ​២០១៣​កន្លងមក​។ គណៈកម្មការ​នេះ ត្រូវ​លាតត្រដាង​ការពិត​អំពី​លទ្ធផល​នៃ​ការបោះឆ្នោត ដើម្បី​ធានា​ការគោរព​ឆន្ទៈ​របស់​ប្រជាពលរដ្ឋ​ខ្មែរ​ពិ​ប្រាកដ​។​ ​យើងទាំងអស់គ្នា​សូម​ប្រកាន់​នូវ​គោលការណ៍​អហិង្សា​ទាំង​កាយ វាចារ ចិត្ត ដោយ​មិន​ចាត់ទុក​ខ្មែរ​ណាមួយ​ជាស​ត្រូវ​ឡើយ តែ​ចង់បាន​យុត្តិធម៌ និង​ការផ្សះផ្សា​ជាតិ​ជា​ស្ថាពរ​។

​ដោយឡែក ទិដ្ឋភាព​នៃ​ការ​បួងសួង​របស់​ក្រុមបាតុករ​បាន​ស្មឹង​ស្មាធិ៍​ក្នុង​ចិត្ត​របស់​ពួកគេ​ថា «​សូម​បារមី​ទាំងអស់​ជួយ​បីបាច់​ថែរក្សា​ដល់​យើងខ្ញុំ​ទាំងអស់គ្នា​ជា​បាតុករ​អហិង្សា​ឲ្យ​ជួបតែ​សេចក្តីសុខ សេចក្តីចម្រើន និង​សូមជួយ​តម្រែតម្រង់​ផ្លូវ​ដល់​ជន​ទាំងឡាយណា​ដែល​កំពុង​ដើរ​ផ្លូវ​ហិង្សា ដែលជា​ផ្លូវខុស​ឲ្យ​ងាក​មក​រួបរួម​ជានា​គ្នា​សំដៅ​ឯកភាព​ជាតិខ្មែរ​តែមួយ ដើម្បី​ចូលរួម​សង្គ្រោះ​ជាតិ​របស់​យើង​ឲ្យ​ទាន់ពេលវេលា​»​។​ ​

ដំណើរការ​នៃ​មហា​បាតុកម្មអហិង្សា​របស់​គ​ណ​បក្ស​សង្គ្រោះ​ជាតិ​នា​វេលា​ព្រឹក​នេះ​កំពុងតែបន្ត​មិនទាន់​ចប់សព្វគ្រប់​នៅឡើយ​ទេ ដោយ​មនុស្សម្នា​អ្នកចូលរួម​ចេះតែមាន​ការកើនឡើង​ជា​លំដាប់​។

តាម​គម្រោងការ​របស់​អ្នកដឹកនាំ​មហា​បាតុកម្ម​នេះ បាន​ឲ្យ​ដឹងថា មហា​បាតុកម្ម​នឹងត្រូវ​បញ្ចប់​នៅវេលា​ម៉ោង​១២​ថ្ងៃត្រង់ ខាងមុខ ដោយ​ជំហរ​ដែល​កើតចេញពី​ស្មារតី​នៃ​មហា​បាតុកម្ម​នេះ គឺ​នឹង​មានការ​បន្តធ្វើ​តទៅទៀត​នៅពេល​ខាងមុខ​ប្រសិនបើ​ការទាមទារ​របស់​បាតុករ​រាប់ម៉ឺន​នាក់​មិន​ត្រូវបាន​ដោះស្រាយ​ទេនោះ​៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.