ថ្ងៃ អង្គារ ទី ២០ ខែ តុលា ឆ្នាំ ២០២០

អាជ្ញាធរ​ទប់ស្កាត់​ដំណើរ​និមន្ត​របស់​ព្រះសង្ឃ​ជាង​៤០០​អង្គ​នៅ​ផ្លូវជាតិ​លេខ​៥​ចំណុច​ព្រែក​ព្នៅ ខណ្ឌឫស្សីកែវ រាជធានី​ភ្នំពេញ មិន​ឲ្យ​ចូលរួម​មហា​បាតុកម្ម​ ​

ប្រភពព័ត៌មាន​ទាន់​ហេតុការណ៍​ពី​ខណ្ឌឫស្សីកែវ រាជធានី​ភ្នំពេញ បាន​ឲ្យ​ដឹងថា នៅវេលា​ម៉ោង​ជិត​០៧ ព្រឹក នា​ថ្ងៃទី​០៧ ខែកញ្ញា ឆ្នាំ​២០១៣​នេះ ក្រុម​អាជ្ញា​ធរមាន​សមត្ថកិច្ច​បាន​ទប់ស្កាត់​បង្អាក់ដំណើរ​និមន្ត​របស់​ព្រះសង្ឃ​ចំនួន​ប្រមាណ​ជាង​៤០០​អង្គ មិន​ឲ្យ​ចូលរួម​ធ្វើ​មហា​បាតុកម្ម​ដឹកនាំ​ដោយ​គណបក្ស​សង្គ្រោះ​ជាតិ​នៅ​ទីលាន​ប្រជាធិបតេយ្យ​។​

​ព័ត៌មាន​ជាបឋម​បាន​ឲ្យ​ដឹង​ទៀតថា ព្រះសង្ឃ​ចំនួន​ប្រមាណ​ជាង​៤០០​អង្គ ដែល​ត្រូវ​សមត្ថកិច្ច​បង្អាក់ដំណើរ​និមន្ត​នៅ​ចំណុច​ព្រែក​ព្នៅ ផ្លូវជាតិ​លេខ​៥ ខណ្ឌឫស្សីកែវ រាជធានី​ភ្នំពេញ​នោះ គឺ​បាន​និមន្ត​មកពី​បណ្តា​វត្ត​អារាម​នៅក្នុង​ភូមិសាស្ត្រ​ខណ្ឌឫស្សីកែវ រាជធានី​ភ្នំពេញ​ផង និង​និមន្ត​មកពី​វត្ត​នៃ​បណ្តា​ខេត្ត​ផ្សេងៗ​ទៀតផង ដើម្បី​និមន្ត​ចូលរួម​ធ្វើ​មហា​បាតុកម្មអហិង្សា​នៅ​ទីលាន​ប្រជាធិបតេយ្យ ដឹកនាំ​ដោយ​គណបក្ស​សង្គ្រោះ​ជាតិ នៅវេលា​ព្រឹក​នេះ​។​ ​

សូមបញ្ជាក់​ជូន​ថា មហា​បាតុកម្មអហិង្សា​របស់​គ​ណ​បក្ស​សង្គ្រោះ​ជាតិ​នៅវេលា​ព្រឹក​នេះ​បានទទួល​ការអនុញ្ញាត​យ៉ាង​ត្រឹមត្រូវ​ពី​អាជ្ញាធរ​រាជធានី​ភ្នំពេញ កាលពី​ថ្ងៃទី​០៥ ខែកញ្ញា ឆ្នាំ​២០១៣ កន្លងមក ប៉ុន្តែ​សកម្មភាព​គ្រប់យ៉ាង​ត្រូវបាន​សមត្ថកិច្ច​ធ្វើការ​បំភិតបំភ័យ ឆែកឆេរ និង​ព្យាយាម​ទប់ស្កាត់​បណ្តា​មនុស្សម្នា​ដែល​ធ្វើដំណើរ​មកពី​ខេត្ត​ផ្សេងៗ ដើម្បី​ចូលរួម​ធ្វើ​មហា​បាតុកម្ម​នេះ​។

ដោយឡែក សម្តេចព្រះ​មហាសង្ឃរាជ​ទាំង​២​គណៈ​ក៏​ធ្លាប់​បានចេញ​ព្រះរាជ​សង្ឃប្រកាស​កាលពី​ថ្ងៃទី​០៥ ខែកញ្ញា ឆ្នាំ​២០១៣ ហាមឃាត់​មិន​ឲ្យ​ព្រះសង្ឃ​គ្រប់​អង្គ​ចូលរួម​សកម្មភាព​ក្នុង​មហា​បាតុកម្មអហិង្សា​របស់​គ​ណ​បក្ស​សង្គ្រោះ​ជាតិ​ផងដែរ​។​

​មជ្ឈដ្ឋាន​អ្នកច្បាប់​បាន​និយាយថា ប្រសិនបើ​អាជ្ញាធរ​ព្យាយាម​ទប់ស្កាត់​មនុស្ស​មិន​ឲ្យ​ចូលរួម​មហា​បាតុកម្ម​របស់​គណបក្ស​សង្គ្រោះ​ជាតិ​នា​វេលា​ព្រឹក​នេះ​គឺជា​ការរំលោភបំពាន​សិទ្ធិសេរីភាព​របស់​ប្រជាពលរដ្ឋ និង​ប្រព្រឹត្ត​ខុសច្បាប់​យ៉ាងធ្ងន់ធ្ងរ​បំផុត​៕ ​

1690859463_n

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.