ថ្ងៃ អង្គារ ទី ២០ ខែ តុលា ឆ្នាំ ២០២០

មន្ត្រី​ក្រោម​ឱវាទ​សំណូមពរ​រដ្ឋមន្ត្រីក្រសួង​អប់រំ​ឲ្យ​ត្រួតពិនិត្យ​មើល​អំពើ​ពុក​រលួយ​របស់​មន្ត្រី​នាយកដ្ឋាន​មធ្យមសិក្សា​ចំណេះ​ទូទៅ

​មន្ត្រី​ក្រោម​ឱវាទ​ក្រសួង​អប់រំ​ យុវជន​ និង​កីឡា​ បាន​កត់សំគាល់​ឃើញ​ថា​ មាន​អំពើ​ពុក​រលួយ​កើតឡើង​នៅ​ក្នុង​នាយកដ្ឋាន​មធ្យមសិក្សា​ចំណេះ​ទូទៅ​ ក្នុង​ការ​រៀបចំ​គណៈកម្មការ​មេ​ប្រយោគ​ប្រឡង​សញ្ញាបត្រ​មធ្យមសិក្សា​ទុតិយភូមិ​នា​ពេល​កន្លង​មក​ ។​

​ក្រុម​មន្ត្រី​ទាំងនោះ​បាន​សំណូមពរ​ឲ្យ​ឯកឧត្តម​ អ៊ឹម​ សិ​ទ្ធី​ រដ្ឋមន្ត្រីក្រសួង​អប់រំ​ យុវជន​ និង​កីឡា​ ធ្វើការ​ត្រួតពិនិត្យ​និង​មាន​វិធានការ​ទៅ​លើ​មន្ត្រី​ពុក​រលួយ​នៅ​ក្នុង​នាយកដ្ឋាន​មធ្យមសិក្សា​ចំណេះ​ទូទៅ​ ដែល​ល្បីល្បាញ​ខាង​ប្រព្រឹត្ត​អំពើ​ពុក​រលួយ​នូវ​ចំណុច​ដូច​ខាងក្រោម​ ៖

១-​ស្រាវជ្រាវ​ឲ្យ​ឃើញ​នូវ​អ្នក​បង្ក​អំពើ​ពុក​រលួយ​ និង​បក្ខពួក​និយម​ ដើម្បី​ឲ្យ​មានការ​ទទួលខុសត្រូវ​ចំពោះ​មុខ​ច្បាប់​ ។​

២-​អ្នក​ពាក់ព័ន្ធ​នឹង​អំពើ​ពុក​រលួយ​គួរតែ​ដក​តួនាទី​ ដោយ​មិន​ត្រូវ​ស្តីបន្ទោស​ផ្ទាល់មាត់​ ឬ​ជា​លាយលក្ខណ៍អក្សរ​នោះ​ទេ​ ។​

៣-​ត្រូវ​រឹត​បន្តឹង​ទៅ​លើ​ប្រធាន​ អនុប្រធាន​នាយកដ្ឋាន​ ឬ​ការិយាល័យ​គ្រប់​អង្គភាព​ កុំ​ឲ្យ​មានការ​ប្រព្រឹត្ត​អំពើ​ពុក​រលួយ​ ប្រកាន់​បក្ខពួក​និយម​ និង​បង្ក​អំពើ​អយុត្តិធម៌​តាមតែ​អំពើ​ចិត្ត​តទៅ​ទៀត​ ។​

៤-​ចាត់វិធានការ​ឲ្យ​ប្រធាន​អង្គភាព​ថ្នាក់​កណ្តាល​ទាំងអស់​យកចិត្តទុកដាក់​ចំពោះ​មន្ត្រី​ក្រោម​ឱវាទ​ឲ្យ​មាន​ភាព​កក់ក្តៅ​ផង​ ។​

៥-​ជួយ​សម្រួល​ចរន្ត​ការងារ​ទាំង​ថ្នាក់​ជាតិ​ ទាំង​ថ្នាក់​ក្រោម​ជាតិ​ឲ្យ​មាន​តម្លាភាព​ និង​ស្មើភាព​ ។​ ​

ពាក់ព័ន្ធ​នឹង​ការ​ប្រឡង​សញ្ញាបត្រ​មធ្យមសិក្សា​ទុតិយភូមិ​"​បាក់​ឌុ​ប​"​ កាលពី​ថ្ងៃ​ទី​០៥​ ខែសីហា​ ដល់​ថ្ងៃ​ទី​០៧​ ខែសីហា​ ឆ្នាំ​២០១៣​កន្លង​ទៅ​ថ្មីៗ​នេះ​ មាន​បេក្ខជន​ប្រឡង​សរុប​ទូ​ទាំង​ប្រទេស​ចំនួន​១០៥.២៩៧​នាក់​ និង​ទទួល​បានការ​ប្រឡង​ជាប់​ចំនួន​៩១.៣៧០​នាក់​ ស្មើនឹង​ប្រមាណ​៨៧​ភាគរយ​ ។​

​តាម​ការ​ឲ្យ​ដឹង​របស់​អង្គការ​កម្មវិធី​អភិវឌ្ឍន៍​ធនធាន​យុវជន​ "YRDP"​ ថា​ បេក្ខជន​ប្រឡង​សញ្ញាបត្រ​មធ្យមសិក្សា​ទុតិយភូមិ​នៅ​រាជធានី​ភ្នំពេញ​ មាន​ចំនួន​១៩.០៧៩​នាក់​ ហើយ​បាន​ចំណាយ​ប្រាក់​ជា​មធ្យម​ចំនួន​៣៧​ដុល្លារ​អា​មេ​រិ​ក​ក្នុង​ម្នាក់ៗ​ ដើម្បី​ធ្វើការ​សូកប៉ាន់​មន្ត្រី​អនុរក្ស​ក្នុង​រយៈពេល​ប្រឡង​ ។​ ដូច្នេះ​ បេក្ខជន​ប្រឡង​ទាំងនោះ​បាន​ចំណាយ​ប្រាក់​សរុប​ប្រមាណ​ជាង​៧០​ម៉ឺន​ដុល្លារ​អា​មេ​រិ​ក​ សម្រាប់​សូកប៉ាន់​ទៅ​ឲ្យ​មន្ត្រី​អនុរក្ស​ប្រឡង​ ដោយ​មិន​ទាន់​រាប់​បញ្ចូល​ទឹកប្រាក់​ចំណាយ​លើ​ការ​លួច​ចម្លង​ និង​ទិញ​វិញ្ញាសា​ប្រឡង​ខាងក្រៅ​នោះ​ផង​ទេ​ ។​

​មជ្ឈដ្ឋាន​អ្នកវិភាគ​កិច្ចការ​សង្គម​នៅ​កម្ពុជា​ បាន​លើក​ឡើង​ថា​ អំពើ​ពុក​រលួយ​នៅ​ក្នុង​វិស័យ​អប់រំ​ធ្វើ​ឲ្យ​ការ​បណ្តុះបណ្តាល​ធនធានមនុស្ស​គ្មាន​គុណភាព​ និង​ប​ន្ទុ​ច​បង្អាក់​ដល់​ការ​អភិវឌ្ឍ​ប្រទេស​ជាតិ​ទាំងមូល​ ៕​

Im-Sithy1

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.