ថ្ងៃ អាទិត្យ ទី ២៥ ខែ តុលា ឆ្នាំ ២០២០

មជ្ឈដ្ឋាន​អ្នក​ច្បាប់​ចាប់អារម្មណ៍​នឹង​ព្រះរាជ​សារ​របស់​ព្រះមហាក្សត្រ​ដែល​កំពុង​គង់នៅ​ប្រទេស​ចិន

​កាលពី​ថ្ងៃ​ទី​៣០​ ខែសីហា​ ឆ្នាំ​២០១៣​កន្លង​មក​ថ្មី្ៗ​នេះ​ ព្រះករុណា​ព្រះបាទ​សម្តេចព្រះ​បរមនាថ​ នរោត្តម​ សីហ​មុនី​ ព្រះមហាក្សត្រ​នៃ​ព្រះរាជាណាចក្រ​កម្ពុជា​ ខណៈ​ដែល​ទ្រង់​កំពុង​គង់នៅ​ប្រទេស​ចិន​នៅឡើយ​នោះ​ បាន​ចេញ​ព្រះរាជ​សារ​មួយ​ផ្ញើ​ជូន​ជនរួមជាតិ​ជាទី​ស្នេហា​របស់​ព្រះ​អង្គ​ ទាក់ទង​ទៅ​នឹង​លទ្ធផល​នៃ​ការ​បោះ​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៥​ កាលពី​ថ្ងៃ​ទី​២៨​ ខែកក្កដា​ ឆ្នាំ​២០១៣​ ។

​ការ​ចេញ​ព្រះរាជ​សារ​រហូត​ដល់​ទៅ​បី​ដង​របស់​ព្រះមហាក្សត្រ​ ទាក់ទង​នឹង​ដំណើរការ​បោះ​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៥​នេះ​ "​លើក​ទី​១​ថ្ងៃ​ទី​០៦​ ខែមីនា​ ឆ្នាំ​២០១៣​ លើក​ទី​ពីរ​ ថ្ងៃ​ទី​០៧​ ខែសីហា​ ឆ្នាំ​២០១៣​ និង​លើក​ទី​បី​ ថ្ងៃ​ទី​៣០​ ខែសីហា​ ឆ្នាំ​២០១៣"​ ធ្វើ​ឲ្យ​មជ្ឈដ្ឋាន​បញ្ញវន្ត​ និង​មជ្ឈដ្ឋាន​អ្នក​ច្បាប់​មានការ​ចាប់អារម្មណ៍​យ៉ាង​ខ្លាំង​ បើ​ប្រៀបធៀប​ទៅ​នឹង​ដំណើរការ​បោះ​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៤​ "២០០៨-២០១៣"​កន្លង​មក​ ។​ ​

ព្រះរាជ​សារ​ចុះ​ថ្ងៃ​ទី​៣០​ ខែសីហា​ ឆ្នាំ​២០១៣​ របស់​ព្រះករុណា​ព្រះមហាក្សត្រ​ ខណៈ​ដែល​អង្គ​ព្រះមហាក្សត្រ​មិន​បាន​គង់នៅ​ភ្នំពេញ​ជា​រាជធានី​នៃ​ព្រះរាជាណាចក្រ​កម្ពុជា​នោះ​ ត្រូវ​បាន​គណបក្ស​ប្រជាជន​កម្ពុជា​ដែល​ជា​គណបក្ស​នយោបាយ​កាន់កាប់​អំណាច​ផ្តាច់មុខ​នៅ​កម្ពុជា​ ចេញ​សេចក្តីថ្លែងការណ៍​កាលពី​ថ្ងៃ​ទី​៣១​ ខែសីហា​ ឆ្នាំ​២០១៣​ម្សិលមិញ​ប្រកាស​គាំទ្រ​ និង​ដង្ហែ​យ៉ាង​ពេញទំហឹង​ ព្រមទាំង​មាន​មន្ត្រី​មួយ​ចំនួន​ដែល​កំពុង​សោយសុខ​ពឹងផ្អែក​លើ​គណបក្ស​ប្រជាជន​កម្ពុជា​ បាន​ផ្តល់​មតិយោបល់​ឲ្យ​ថ្នាក់ដឹកនាំ​គណបក្ស​សង្គ្រោះ​ជាតិ​ពិចារណា​ទៅ​លើ​ព្រះរាជ​សារ​នេះ​ទៀត​ផង​ ។​ ​

បច្ចុប្បន្ន​ អង្គ​ព្រះមហាក្សត្រ​កំពុង​គង់នៅ​ប្រទេស​ចិន​ ដោយ​ព្រះ​អង្គ​បាន​យាង​ចាក​ចេញពី​កម្ពុជា​ទៅ​ពិនិត្យ​ព្រះ​សុខភាព​ កាលពី​ថ្ងៃ​ទី​១២​ ខែសីហា​ ឆ្នាំ​២០១៣​មក​ម្ល៉េះ​ ហើយ​បើ​តាម​ប្រភព​ពី​ក្រសួងព្រះបរមរាជវាំង​ បាន​ឲ្យ​ដឹង​ថា​ ព្រះ​អង្គ​នឹង​យាង​មាតុភូមិនិវត្តន៍​វិញ​នៅ​ក្នុង​ស​ប្តា​ហ៍​ក្រោយ​នេះ​ ។

​មាត្រា​១​ វាក្យខណ្ឌ​ទី​១​ មាត្រា​៧​ វាក្យខណ្ឌ​ទី​២​ និង​មាត្រា​៣០​ថ្មី​នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​ បាន​ចែង​ថា​ "​ប្រទេស​កម្ពុជា​ជា​ព្រះរាជាណាចក្រ​ដែល​ព្រះមហាក្សត្រ​ទ្រង់​ប្រតិបត្តិ​តាម​រដ្ឋធម្មនុញ្ញ​…​។​ ព្រះមហាក្សត្រ​ទ្រង់​ជា​ព្រះ​ប្រមុខរដ្ឋ​មួយ​ជីវិត​ ។​ ក្នុង​រយៈពេល​ព្រះមហាក្សត្រ​ទ្រង់​អវត្តមាន​ ប្រធាន​ព្រឹទ្ធសភា​ទទួល​ភារកិច្ច​ជា​ប្រមុខរដ្ឋ​ស្តីទី​ ។​ "​ ។​ ដូច្នេះ​ អនុលោម​តាម​រដ្ឋធម្មនុញ្ញ​ដែល​ជា​ច្បាប់​កំពូល​នៃ​ព្រះរាជាណាចក្រ​កម្ពុជា​ គឺ​ព្រះមហាក្សត្រ​ខ្មែរ​ដែល​កំពុង​គង់នៅ​ឯ​បរទេស​ដើម្បី​ពិនិត្យ​ព្រះ​សុខភាព​នោះ​ ត្រូវ​អស់​ព្រះរាជ​សិទ្ធិ​អំណាច​ជា​ព្រះ​ប្រមុខរដ្ឋ​ហើយ​ ទោះបី​ព្រះ​អង្គ​នៅ​តែ​ជា​ព្រះមហាក្សត្រ​ក៏​ដោយ​ ។​ ​

ក្នុង​ស្ថានភាព​បច្ចុប្បន្ន​នេះ​ ក្រុម​អ្នក​ច្បាប់​បាន​សម្តែង​នូវ​ការ​ភ្ញាក់ផ្អើល​នៅ​ពេល​បានឃើញ​ព្រះមហាក្សត្រ​កំពុង​គង់​ពិនិត្យ​ព្រះ​សុខភាព​នៅ​បរទេស​ បែរជា​ព្រះ​អង្គ​ឡាយព្រះហស្តលេខា​ចេញ​ព្រះរាជ​សារ​កាលពី​ថ្ងៃ​ទី​៣០​ ខែសីហា​ ឆ្នាំ​២០១៣​ ធ្វើ​ព្រះរាជ​អន្តរាគមន៍​ ឬ​បញ្ចេញ​ព្រះរាជ​តម្រិះ​ពាក់ព័ន្ធ​នឹង​រឿង​បោះ​ឆ្នោត​ទៅ​វិញ​ ។​

​ក្រុម​អ្នក​ច្បាប់​បាន​លើក​ឡើង​ថា​ ការ​ចេញ​ព្រះរាជ​សារ​ព្រះរាជ​អន្តរាគមន៍​ ឬ​ផ្តល់​ព្រះ​តម្រិះ​ផ្សេងៗ​ដោយ​អង្គ​ព្រះមហាក្សត្រ​ គឺជា​ការ​ល្អ​ប្រសើរ​ហើយ​ ប៉ុន្តែ​មិន​ត្រូវធ្វើ​ពេល​ព្រះ​អង្គ​គង់​បរទេស​ទេ​ អាច​រង់ចាំ​ព្រះ​អង្គ​យាង​មាតុភូមិនិវត្តន៍​មក​ដល់​កម្ពុជា​វិញ​ សឹម​ចេញ​ព្រះរាជ​សារ​ក៏​មិនយឺត​ពេល​ដែរ​ និង​ធ្វើ​ឲ្យ​ព្រះរាជ​សារ​មាន​តម្លៃ​ថែម​ទៀត​ផង​ ដើម្បី​បង្ហាញ​ឲ្យ​ឃើញ​ថា​ ព្រះមហាក្សត្រ​ប្រព្រឹត្ត​តាម​រដ្ឋធម្មនុញ្ញ​ និង​ច្បាប់​ទាំងឡាយ​នៃ​ព្រះរាជាណាចក្រ​កម្ពុជា​មុនគេ​បង្អស់​ទុកជា​គំរូ​ ។​ ​

មជ្ឈដ្ឋាន​អ្នក​តាមដាន​ព្រឹត្តិការណ៍​នយោបាយ​នៅ​កម្ពុជា​ បាន​លើក​ឡើង​ថា​ មាន​ចំណុច​គួរ​ឲ្យ​មន្ទិល​សង្ស័យ​ទៅ​លើ​រូបភាព​នៃ​ការ​ចេញ​ព្រះរាជ​សារ​ ចុះ​ថ្ងៃ​ទី​៣០​ ខែសីហា​ ឆ្នាំ​២០១៣​ របស់​អង្គ​ព្រះមហាក្សត្រ​ទាំង​តក់ក្រហល់​នេះ​ ខណៈ​ព្រះ​អង្គ​កំពុង​គង់នៅ​ឯបរ​ទេ​សេ​នៅឡើយ​ ហើយ​ព្រះរាជ​សារ​នេះ​ហាក់​បង្ហាញ​អំពី​ព្រះរាជ​តម្រិះ​របស់​ព្រះមហាក្សត្រ​ ដោយ​ដាក់​សម្ពាធ​ខ្លាំង​ ឬ​ចាប់បង្ខំ​ឲ្យ​គណបក្ស​នយោបាយ​ប្រឆាំង​គោរព​ ឬ​ដើរ​តាម​ផ្លូវ​នៃ​ការ​យល់​ឃើញ​របស់​គណបក្សកាន់អំណាច​ គឺ​លទ្ធផល​ឆ្នោត​ត្រូវ​តែ​ផ្អែក​លើ​ការ​ដោះស្រាយ​របស់​ គ​.​ជ​.​ប​ និង​ក្រុមប្រឹក្សាធម្មនុញ្ញ​ ស្រប​ពេល​ដែល​គណបក្ស​នយោបាយ​ប្រឆាំង​កំពុង​ទាមទារ​ឲ្យ​មានការ​ស៊ើបអង្កេត​ភាព​មិន​ប្រក្រតី​នៃ​ការ​បោះ​ឆ្នោត​ តាម​រយៈ​គណៈកម្មការ​ចម្រុះ​ឯករាជ្យ​មួយ​នោះ​ ។​

​ក្រុម​អ្នកវិភាគ​នយោបាយ​ឯករាជ្យ​នៅ​កម្ពុជា​ បាន​លើក​ឡើង​ថា​ ក្នុង​ករណី​អ្នកនយោបាយ​មានការ​មិន​ចុះសម្រុង​គ្នា​ នាំ​ទៅ​ដល់​បង្ក​ភាព​ជាប់​គាំង​ផ្នែក​នយោបាយ​ធ្ងន់ធ្ងរ​នៅ​ គឺ​អង្គ​ព្រះមហាក្សត្រ​ដែល​ទ្រង់​ជា​និមិត្តរូប​នៃ​ឯកភាព​ជាតិ​ និង​និរន្តរភាព​ជាតិ​ គួរតែ​គង់នៅ​ក្នុង​ប្រទេស​ ធ្វើការ​កោះ​អញ្ជើញ​អ្នកនយោបាយ​ទាំងនោះ​ឲ្យ​មក​ចូល​តុ​ចរចា​រក​ដំណោះស្រាយ​ដោយ​ផ្ទាល់​ ប្រសើរ​ជាង​ចេញ​ព្រះរាជ​សារ​ចំនួន​ពីរ​ឬ​បី​ដងដោយ​ប្រយោល​ ដែល​នាំ​ឲ្យ​បាត់បង់​តម្លៃ​ ឥទ្ធិពល​នៃ​អង្គ​ព្រះមហាក្សត្រ​ដែល​ទ្រង់​ជា​ព្រះ​ប្រមុខរដ្ឋ​នៃ​ព្រះរាជាណាចក្រ​កម្ពុជា​ ៕​

5307511_n30-08-2013 30-08-2013-CPP

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.