ថ្ងៃ ពុធ ទី ២១ ខែ តុលា ឆ្នាំ ២០២០

មេគណបក្ស​កាន់អំណាច​ឆ្លើយតប​មក​មេគណបក្ស​ប្រឆាំង​វិញ​មិន​និយាយ​អំពី​ការបង្កើត​គណៈកម្មការ​ឯករាជ្យ​ដោះស្រាយ​ភាពមិនប្រក្រតី​នៃ​ការបោះឆ្នោត​ទេ​

​សម្តេច​អគ្គ​មហា​ធម្ម​ពោធិ​សាល ជា ស៊ីម ប្រធាន​គណបក្ស​ប្រជាជន​កម្ពុជា បានធ្វើ​លិខិតផ្លូវការ​តប​មក​ឯកឧត្តម សម រង្ស៊ី ប្រធាន​គណបក្ស​សង្គ្រោះ​ជាតិ​វិញ​ហើយ នៅ​ថ្ងៃទី​២៩ ខែសីហា ឆ្នាំ​២០១៣​នេះ បន្ទាប់ពី​មេគណបក្ស​កាន់អំណាច​បា​ន​ទទួល​លិខិត​ចុះ​ថ្ងៃទី​២៨ ខែសីហា ឆ្នាំ​២០១៣ របស់​មេគណបក្ស​ប្រឆាំង​រួចមក​។​ ​

ខ្លឹមសារ​លិខិត​របស់​មេគណបក្ស​កាន់អំណាច​ដែល​បាន​ឆ្លើយតប​មក​មេគណបក្ស​ប្រឆាំង​នោះ មិនបាន​លើកឡើង​អំពី​ជំហរ​របស់​គណបក្ស​ប្រជាជន​កម្ពុជា​ក្នុង​ការបង្កើត​គណៈកម្មកា​រ​ឯករាជ្យ​ដោះស្រាយ​ភាពមិនប្រក្រតី​ពាក់ព័ន្ធ​នឹង​ការបោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៥ តាម​សំណើ​របស់​គណបក្ស​សង្គ្រោះ​ជាតិ​ឡើយ ដោយ​មេគណបក្ស​កាន់អំណាច​បា​ន​បញ្ជាក់ថា «​នៅក្នុង​ស្ថានការណ៍​នេះ គណៈកម្មាធិការ​ជាតិ​រៀបចំ​ការបោះឆ្នោត​បា​នប​ន្ត​អនុវត្តន៍​ការងារ​តាម​ប្រតិទិន​របស់ខ្លួន ដោយបាន​ដោះស្រាយ​រាល់​បណ្តឹងតវ៉ា​ស្របតាម​ច្បាប់ បទបញ្ជា និង​នីតិវិធី​នៃ​ការបោះឆ្នោត​។ មកដល់ពេលនេះ ក្រុមប្រឹក្សាធម្មនុញ្ញ​បាននិងកំពុង​ដោះស្រាយ​រាល់​បណ្តឹងតវ៉ា​ទាំងឡាយ​របស់​គណបក្ស​សង្គ្រោះ​ជាតិ ដែល​បាន​ប្តឹងទៅ​ក្រុមប្រឹក្សាធម្មនុញ្ញ​ជា​សាធារណៈ ស្របតាម​រដ្ឋធម្មនុញ្ញ និង​ច្បាប់​ប្រកបដោយ​តម្លាភាព និង​យុត្តិធម៌​។​»​។​ ​

នៅ​ទីបញ្ចប់​នៃ​លិខិត​របស់​មេគណបក្ស​កាន់អំណាច​បានលើកឡើង​ផងដែរ​ថា «​ប៉ុន្តែ ទោះបី​យ៉ាងនេះ​ក្តី​ក៏​គណបក្ស​ប្រជាជន​កម្ពុជា​នៅតែមាន​សុច្ឆន្ទៈ​ដ៏​ពិតប្រាកដ ដើម្បី​បន្ត​ការចរចា​ដោះស្រាយ​បញ្ហា​នានា​ដែល​នៅ​សេសសល់ ដោយ​ឈរលើ​លទ្ធផល​នៃ​ការបោះឆ្នោត និង​ស្មារតី​ផ្សះផ្សា បង្រួបបង្រួម​ជាតិ ដែលជា​ផ្លូវ​ដ៏​ល្អ​បំផុត ដើម្បី​ធានាបាន​នូវ​ភាពសុខសាន្ត​របស់​ប្រជាជន​យើង​។​»​។​ ​

សូម​រំលឹក​ជូន​ថា កាលពី​ថ្ងៃទី​២៨ ខែសីហា ឆ្នាំ​២០១៣ ម្សិលមិញ​នេះ ឯកឧត្តម សម រង្ស៊ី ប្រធាន​គណបក្ស​សង្គ្រោះ​ជាតិ​បានធ្វើ​លិខិតផ្លូវការ​មួយច្បាប់​គោរព​ជូន​សម្តេច​អគ្គ​មហា​ធម្ម​ពោធិ​សាល ជា ស៊ីម ប្រធាន​គណបក្ស​ប្រជាជន​កម្ពុជា ស្នើសុំ​ឲ្យ​មាន​កិច្ចប្រជុំ​បន្ត​រវាង​ក្រុមការងារ​នៃ​គណបក្ស​សង្គ្រោះ​ជាតិ និង​គណបក្ស​ប្រជាជន​កម្ពុជា​ជាបន្ទាន់ ដើម្បី​បង្កើត​គណៈកម្មការ​ឯក​រាជ្យ​មួយ​ដោះស្រាយ​ភាពមិនប្រក្រតី​ពាក់ព័ន្ធ​នឹង​ការបោះឆ្នោត​ជ្រើ​តាំង​តំណាងរាស្ត្រ​នីតិកាល​ទី​៥ ថ្ងៃទី​២៨ ខែកក្កដា ឆ្នាំ​២០១៣ ប្រកបដោយ​តម្លាភាព និង​យុត្តិធម៌​ជូន​ដល់​ប្រជាពលរដ្ឋ​ម្ចាស់ឆ្នោត​។​ ​

ដោយឡែក នៅវេលា​ព្រឹក​ថ្ងៃទី​២៩ ខែសីហា ឆ្នាំ​២០១៣​នេះដែរ ឯកឧត្តម សម រង្ស៊ី ប្រធាន​គណបក្ស​សង្គ្រោះ​ជាតិ បាន​ថ្លែង​នៅក្នុង​សន្និសីទ​សារព័ត៌​មាននៅ​ទីស្នាក់ការ​កណ្តាល​គណបក្ស​ថា គណបក្ស​សង្គ្រោះ​ជាតិ​នឹង​ដឹកនាំ​ធ្វើ​មហា​បាតុកម្មអហិង្សា​នៅ​ថ្ងៃទី​០៧ ខែកញ្ញា ឆ្នាំ​២០១៣ ខាងមុខ​ដែលជា​ជម្រើស​ចុងក្រោយបង្អស់​របស់​គណ​បក្ស ប្រសិនបើ​មិនមាន​ការដោះស្រាយ​សមស្រប​ណាមួយ​ពាក់ព័ន្ធ​នឹង​ការបោះឆ្នោត​៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.