ថ្ងៃ ពុធ ទី ២១ ខែ តុលា ឆ្នាំ ២០២០

ក្រុមប្រឹក្សាធម្មនុញ្ញ​បានសម្រេច​អនុញ្ញាត​ឲ្យ គ​.​ជ​.​ប បើក​កញ្ចប់​សុវត្ថិភាព «​ក​» នៅ​ការិយាល័យ​ចំនួន​១២ នៅ​មណ្ឌលបោះឆ្នោត​ខេត្តសៀមរាប​បន្តទៀត​

​នៅ​ថ្ងៃទី​២៨ ខែសីហា ឆ្នាំ​២០១៣ នេះ ក្រុមប្រឹក្សាធម្មនុញ្ញ​ដែលមាន​ឯកឧត្តម ឯក សំអុល ជា​ប្រធាន​បានសម្រេច​អនុញ្ញាត​ឲ្យ​គណៈកម្មាធិការ​ជាតិ​រៀបចំ​ការបោះឆ្នោត «​គ​.​ជ​.​ប​» បើក​កញ្ចប់​សុវត្ថិភាព «​ក​» នៅ​ការិយាល័យ​មួយចំនួន​នៃ​មណ្ឌលបោះឆ្នោត​ខេត្តសៀមរាប បន្តទៀត តាម​បណ្តឹង​របស់​គណបក្ស​ស​ង្គ្រោះ​ជាតិ​។​

​ការិយាល័យ​ឋិត​នៅក្នុង​ក្រុង​សៀមរាប និង​ស្រុក​ពួក នៃ​មណ្ឌលបោះឆ្នោត​ខេត្តសៀមរាប ដែល​នឹងត្រូវ​បើក​កញ្ចប់​សុវត្ថិភាព «​ក​» ដើម្បី​ផ្ទៀងផ្ទាត់​សំឡេងឆ្នោត​ក្នុង​ទម្រង់​១១០២ និង​១១០៨ ព្រមទាំង​ក្រដាស​កត់ត្រា​សំឡេងឆ្នោត​នោះ រួមមាន​៖ ការិយាល័យ​លេខ ០២៨៣ ០២៨៥ ឋិត​នៅ​សង្កាត់​ក្របី​រៀល​, ការិយាល័យ​លេខ ០៤២៥ ០៤៤២ ឋិត​នៅ​សង្កាត់​ស្វាយដង្គុំ​, កា​រិ​ល័យ​លេខ​០៨១៧ ឋិត​នៅ​សង្កាត់​ស្លក្រាម​, ការិយាល័យ​លេខ ០៣២៣ ០៣២៤ និង​លេខ ០៣២៦ ឋិត​នៅ​ឃុំ​រើ​ល ស្រុក​ពួក​, កា​រិ​យ​ល័យ​លេខ​០២៩៤, ០៦៧៣ និង​លេខ​០៧១៨ ឋិត​នៅ​ឃុំ​ល្វា ស្រុក​ពួក និង ការិយាល័យ​លេខ ០៣៤៦ ឋិត​នៅ​ឃុំ​ត្រី​ញ័រ ស្រុក​ពួក​។ ​ការបើក​កញ្ចប់​សុវត្ថិភាព «​ក​» ខាងលើនេះ​នឹងត្រូវ​ធ្វើ​នៅ​ទីស្តីការ គ​.​ជ​.​ប នា​ថ្ងៃ​សុក្រ ទី​៣០ ខែសីហា ឆ្នាំ​២០១៣ វេលា​ម៉ោង ០៨​ព្រឹក​។​ ​

នេះ​គឺជា​ការសម្រេច​លើក​ទី​៣​ហើយ​របស់​ក្រុមប្រឹក្សាធម្មនុញ្ញ​ដែល​បានអនុញ្ញាត​ឲ្យ គ​.​ជ​.​ប បើក​កញ្ចប់​សុវត្ថិភាព «​ក​» ដើម្បី​ផ្ទៀងផ្ទាត់​សំឡេងឆ្នោត​តាម​ពាក្យបណ្តឹង​របស់​គណបក្ស​សង្គ្រោះ​ជាតិ ដែល​លើក​ទី​១ នៅ​មណ្ឌលបោះឆ្នោត​ខេត្តក្រចេះ កាលពី​ថ្ងៃទី​២៥ ខែសីហា លើក​ទី​២ នៅ​មណ្ឌលបោះឆ្នោត ខេត្តបាត់ដំបង នា​ថ្ងៃទី​២៨ ខែសីហា និង​លើក​ទី​៣​នេះ​នៅ​មណ្ឌលបោះឆ្នោត​ខេត្តសៀមរាប ដែល​នឹង​ត្រូវធ្វើ​នៅ​ថ្ងៃទី​៣០ ខែសីហា ឆ្នាំ​២០១៣ ខាងមុខ​។​

​សូមបញ្ជាក់​ជូន​ដែរ​ថា យោងតាម​លទ្ធផល​ឆ្នោត​បណ្តោះអាសន្ន​នៃ​ការបោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៥ ដែល​បានប្រកាស​ដោយ «​គ​.​ជ​.​ប​» កាលពី​ថ្ងៃទី​១២ ខែសីហា ឆ្នាំ​២០១៣ កន្លងមក បាន​បង្ហាញថា នៅ​មណ្ឌលបោះឆ្នោត​ទាំង​៣​ខាងលើនេះ​គឺ​គណបក្ស​សង្គ្រោះ​ជាតិ​បាន​ចាញ់ឆ្នោត​គណបក្ស​ប្រជាជន​កម្ពុជា​ជាហេតុ​ធ្វើ​ឲ្យ​គណបក្ស​សង្គ្រោះ​ជាតិ​ប្តឹងតវ៉ា​អំពី​ភាពមិនប្រក្រតី​នៃ​ការបោះឆ្នោត ដើម្បី​ទាមទារ​រក​យុត្តិធម៌​ឡើងវិញ​៕​

dec_30

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.