ថ្ងៃ ពុធ ទី ២១ ខែ តុលា ឆ្នាំ ២០២០

ទាំង​រដ្ឋាករទឹក ទាំង​អគ្គិសនី បាននិងកំពុង​រំលោភ​លើ​ទំនុកចិត្ត​របស់​ប្រជាពលរដ្ឋ​ជា​អតិថិជន​

​កាលពី​ថ្ងៃទី​២០ ខែមិថុនា ឆ្នាំ​២០១៣ កន្លងមក​អង្គភាព​រដ្ឋាករទឹក​ស្វ័យ​ត​រាជធានី​ភ្នំពេញ ដែល​គេ​ហៅ​សាមញ្ញ​អង្គភាព​ទឹកស្អាត​នោះ បាន​ផ្គត់ផ្គង់​ទឹក​ចេញពី​ក្បាល​រ៉ូ​ប៊ី​ណេ​លាយ​ជាត​ដី​សុទ្ធ ពណ៌​ខ្មៅ​ដូច​ទឹក​ត្រាំ​ស្លឹកត្នោត ដែល​កុំថាឡើយ​យកមក​ទទួលទាន និង​ងូត​សម្អាត​កាយ​មិនបាន សូម្បីតែ​យកមក​លាង​ជើង និង​លាងចាន​ក៏​មិនបាន​ផង​។​ ​

លុះ​នៅ​ថ្ងៃទី​២៦ ខែសីហា ឆ្នាំ​២០១៣ វេលា​ម៉ោង​១៩ និង​៣០​នាទី​ល្ងាច​កន្លងទៅ​ថ្មីៗ​នេះ ការផ្គត់ផ្គង់​ទឹក​របស់​អង្គភាព​រដ្ឋាករទឹក​ស្វ័យ​ត​រាជធានី​ភ្នំពេញ ដែល​អួតថា​ជា «​ទឹកស្អាត​ផឹក​បាន​ផ្ទាល់​ពី​រ៉ូ​ប៊ី​ណេ​» នោះ បាន​បញ្ចេញ​ទឹក​ពី​ក្បាល​រ៉ូ​ប៊ី​ណេ​ឲ្យ​ប្រជាពលរដ្ឋ​ប្រើប្រាស់​នៅ​តំបន់​មួយចំនួន​ក្នុង​រាជធានី​ភ្នំពេញ គឺជា​ទឹក​មហា​កខ្វក់ ដូច​កាលពី​ថ្ងៃទី​២០ ខែមិថុនា ឆ្នាំ​២០១៣ អ៊ីចឹង​ដែរ ដែលជា​ប្រភេទ​ទឹក​យកមកប្រើ​ប្រាស់​មិនកើត​តែម្តង​។​

​រូបភាព​នៃ​ការផ្គត់ផ្គង់​ទឹក​មហា​កខ្វក់​របស់​អង្គភាព​រដ្ឋាករទឹក​ស្វ័យ​ត​រាជធានី​ភ្នំពេញ ម្តង​ជា​ពីរដង ឬ​អាច​ច្រើនដង ដោយ​មិនបាន​ធ្វើការ​ជូនដំណឹង​ដល់​ប្រជាពលរដ្ឋ​ឲ្យ​បានច្បាស់លាស់ និង​ទូលំទូលាយ​ជាមុន​នោះបាន​បង្ហាញ​ឲ្យ​ឃើញថា ជា​អំពើ​រំលោភ​លើ​ទំនុកចិត្ត​យ៉ាងធ្ងន់ធ្ងរ​ទៅលើ​ប្រជាពលរដ្ឋ​អ្នកប្រើប្រាស់ និង​ជា​អតិថិជន​របស់​អង្គភាព​រដ្ឋាករទឹក ពីព្រោះ​អតិថិជន បាន​បង់លុយ​គ្រប់គ្រាន់​លើ​កា​រត​បណ្តាញ និង​ប្រើប្រាស់​ជូន​រដ្ឋាករទឹក បែរជា​រដ្ឋាករទឹក​មិន​ផ្គត់ផ្គង់​ទឹកស្អាត​តាម​ការ​អួតអាង​ឲ្យ​អតិថិជន​របស់ខ្លួន ពោលគឺ​ផ្គត់ផ្គង់​ទឹក​មហា​កខ្វក់​ប្រើប្រាស់​មិនកើត​ទៅវិញ​។

​ឥឡូវ ងាក​មក​និយាយ​អំពី​ក្រុមហ៊ុន​អគ្គិសនី​កម្ពុជា «EDC» វិញ​ម្តង គឺ​មិន​ខុសពី​អង្គភាព​រដ្ឋាករទឹក​ស្វ័យ​ត​រាជធានី​ភ្នំពេញ​ឡើយ ពីព្រោះ ១- ឋិត​នៅក្រោម​ឱវាទ​របស់​ក្រសួង​ឧ​ស្សហកម្ម រ៉ែ និង​ថាមពល ដែលមាន​ឯកឧត្តម ស៊ុយ សែម ជា​រដ្ឋមន្ត្រី​ដូចគ្នា និង ២- ផ្គត់ផ្គង់​សេវា​មហា​យ៉ាប់យ៉ឺន​ដូចគ្នា​។​ ​ឈាន​មក​ដ​ល៊​ពាក់កណ្តាល​ឆ្នាំ​២០១៣​នេះ ក្រុមហ៊ុន​អគ្គិសនី​កម្ពុជា ដែលមាន​ឯកឧត្តម កែវ រតនៈ ជា​ប្រតិភូ​រាជរដ្ឋាភិបាល​កម្ពុ​ជាទ​ទួល​បន្ទុក​ជា​អគ្គនាយក មាន​ឋានៈ​ស្មើ​រដ្ឋលេខាធិការ និង​ត្រូវជា​សាច់ញាតិ​របស់​ឯកឧត្តម ស៊ុយ សែម នោះ បាន​អះអាងថា «​អគ្គិសនី​មាន​គ្រប់គ្រាន់​ហើយ​នៅ​រាជធានី​ភ្នំពេញ​»​។​ ​

ផ្ទុយទៅវិញ មិន​ដូចជា​ការអះអាង​របស់​ឯកឧត្តម កែវ រតនៈ ទីប្រឹក្សា​ផ្ទាល់​សម្តេចនាយក​រដ្ឋមន្ត្រី និង​ជា​អគ្គនាយក «EDC» ព្រមទាំង​ជា​បេក្ខជន​តំណាងរាស្ត្រ​ពេញសិទ្ធិ​លំដាប់​លេខ​រៀង​ទី​២ របស់​គណបក្ស​ប្រជាជន​កម្ពុជា​នៅ​មណ្ឌល​ខេត្តពោធិ៍សាត់​នោះទេ គឺ​នៅ​ថ្ងៃទី​២៨ ខែសីហា ឆ្នាំ​២០១៣​នេះ អគ្គិសនី​ត្រូវបាន​ផ្តាច់​ចរន​ចាប់តាំងពី​ម៉ោង​១១ និង​២៥​នាទី​ព្រឹក​រហូតដល់​ម៉ោង​១៤ និង​៥២​នាទី​រសៀល នៅ​តំបន់​មួយចំនួន​ក្នុង​រាជធានី​ភ្នំពេញ «​ជាពិសេស​ទីតាំង​ចរន្ត​លេខ​៣៧៨ ឋិត​នៅ​សង្កាត់​បឹងទំពុន ខណ្ឌមានជ័យ​» ទើបមាន​ចរន្តអគ្គិសនី​ប្រើប្រាស់ឡើងវិញ ហើយ​គ្មាន​ការជូន​ដំ​ណឺង​ជាមុន​ឲ្យ​បានច្បាស់លាស់​និង​ទូលំទូលាយ​ថែមទៀត​។​ ​

តាម​ការកត់សម្គាល់​ជាក់ស្តែង​បានបង្ហាញ​ថា ទោះបី​ក្រុមហ៊ុន «EDC» បាន​អួត​ក្តែ​ងៗ​ថា ថាមពល​អគ្គិសនី​មាន​គ្រប់គ្រាន់​ហើយក៏​ដោយ ក៏​អគ្គិសនី​ទទួលរង​ការ​ដាច់​ចរន្ត​ជា​ញឹកញាប់ ពោលគឺ​ដាច់​ចរន្ត​តាមតែ «​ក្បាល​ចិត្ត​» របស់​ក្រុមហ៊ុន «EDC» ដែល​ការ​ដាច់​ចរន្ត​ញឹកញាប់​នេះ​ត្រូវបាន​ប្រជាពលរដ្ឋ​ជា​អតិថិជន​របស់​ក្រុមហ៊ុន «EDC» រអ៊ូរ​រទាំ​ថា ធ្វើ​ឲ្យ​ចំនួន​គីឡូវ៉ាត់ម៉ោង​ប្រើប្រាស់​កើនឡើង និង​បង្ក​ការខូចខាត​ដល់​គ្រឿងអគ្គិសនី​ជា​បណ្តើរៗ​ថែមទៀត​។

​ ​សរុបសេចក្តី​មក ទាំង​ក្រុមហ៊ុន​អគ្គិសនី​កម្ពុជា ទាំង​អង្គភាព​រដ្ឋាករទឹក​ស្វ័យ​ត​រាជធានី​ភ្នំពេញ គឺជា​ស្ថាប័ន​មួយ​ដែល​ប្រព្រឹត្ត​អំពើ​រំលោភ​លើ​ទំនុកចិត្ត​របស់​ប្រជាពលរដ្ឋ​ជា​អតិថិជន​យ៉ាងធ្ងន់ធ្ងរ​បំផុត ដែល​ស័ក្តិ​សមតែ​នឹង​ប្រជាពលរដ្ឋ​កម្ពុជា ជាពិសេស​ប្រជាពលរដ្ឋ​រស់នៅ​រាជធានី​ភ្នំពេញ ដែល​ធ្លាប់​ទទួលរង​គ្រោះ​ព្រោះ​អំពើ​អយុត្តិធម៌​នេះ នាំគ្នា​ថ្កោលទោស​ទៅលើ​ក្រុមហ៊ុន​អគ្គិសនី​កម្ពុជា និង​អង្គភាព​រដ្ឋាករទឹក​ស្វ័យ​ត​រាជធានី​ភ្នំពេញ តាម​នីតិវិធី​នៃ​ច្បាប់ ដើម្បី​ពង្រឹង​ប្រព័ន្ធយុត្តិធម៌ និង​នីតិរដ្ឋ​នៅ​កម្ពុជា​៕​

edc-water

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.