ថ្ងៃ ព្រហស្បតិ៍ ទី ២៣ ខែ កញ្ញា ឆ្នាំ ២០២១

វិភាគ​ ​៖ ជឿ​ដែរឬទេ​ថា គណបក្ស​ប្រជាជន​កម្ពុជា​ឈ្នះឆ្នោត​ដោយ​យុត្តិធម៌ និង​តម្លាភាព​?

​សេចក្តីក្លាហាន និង​ឆន្ទៈ​របស់​ប្រជាពលរដ្ឋ​ជា​ម្ចាស់ឆ្នោត និង​អ្នកគាំទ្រ​គណបក្ស​សង្គ្រោះ​ជាតិ​មាន​កម្លាំង​ខ្លាំងក្លា និង​ពុះកញ្ជ្រោល​ចង់​ឲ្យ​មានការ​ផ្លាស់ប្តូរ​ថ្នាក់ដឹកនាំ​ប្រទេស និង​ប្រព័ន្ធគ្រប់គ្រង​ប្រទេស​សព្វថ្ងៃ ចាប់តាំងពី​ថ្ងៃ​បើក​យុទ្ធនាការ​ឃោសនាបោះឆ្នោត​រហូតដល់​ថ្ងៃ​ទម្លាក់​សន្លឹកឆ្នោត​ចូលទៅក្នុង​ហិប​ឆ្នោត​។

ជា​លទ្ធផល​គណបក្ស​ស​ង្គ្រោះ​ជាតិ​ទទួលបាន​ការគាំទ្រ​ពី​ប្រជាពលរដ្ឋ​ម្ចាស់ឆ្នោត​មានការ​កើនឡើង​យ៉ាងគំហុក​រហូត​ទទួលបាន​សំឡេងឆ្នោត​គាំទ្រ​បណ្តោះអាសន្ន​ចំនួន​២.៩៤៦.១៧៦​សំឡេង ខណៈដែល​លទ្ធផល​ឆ្នោត​ដែល​ប្រកាស​ដោយ​គណៈកម្មាធិការ​ជាតិ​រៀបចំ​ការបោះឆ្នោត «​គ​.​ជ​.​ប​» កាលពី​ថ្ងៃទី​១២ ខែសីហា ឆ្នាំ​២០១៣ មិនបាន​ធ្វើ​ឲ្យ​អ្នកគាំទ្រ​គណបក្ស​សង្គ្រោះ​ជាតិ​អស់ចិត្ត និង​ទទួលយក​បានឡើយ ពីព្រោះ​ចាញ់​សំឡេងឆ្នោត​គាំ​ទ្ររបស់​គណបក្ស​ប្រជាជន​កម្ពុជា​ដែល​ទទួលបាន​ចំនួន​៣.២៣៥.៩៦៩​សំឡេង «​គណបក្ស​សង្គ្រោះ​ជាតិ​ចាញ់​គណបក្ស​ប្រជាជន​កម្ពុជា​ចំនួន​២៨៩.៧៩៣​សំឡេង​»​។​ ​

ទាំង​អ្នកគាំទ្រ ទាំង​គណបក្ស​សង្គ្រោះ​ជាតិ​មាន​អារម្មណ៍​មន្ទិលសង្ស័យ​ទៅលើ​លទ្ធផល​នៃ​ការបោះឆ្នោត ដែល​ធ្វើ​ឲ្យ​គណបក្ស​ប្រជាជន​កម្ពុជា​ទទួលបាន​ការ​ឈ្នះឆ្នោត ហើយ​គណបក្សប្រឆាំង​នេះ​ក៏បាន​ដាក់ពាក្យ​បណ្តឹងតវ៉ា​ជា​បន្តបន្ទាប់​ទៅ គ​.​ជ​.​ប ឲ្យ​ដោះស្រាយ​ភាពមិនប្រក្រតី​នៃ​ការបោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៥ ដោយ​គណបក្ស​សង្គ្រោះ​ជាតិ​អះអាងថា ត្រូវ​ទទួលបាន​អាសនៈ​នៅក្នុង​រដ្ឋសភា​នីតិកាល​ទី​៥ យ៉ាងតិចណាស់​ចំនួន​៦៣​អាសនៈ​ដែរ​។​ ​

ទោះយ៉ាងណា​ក៏ដោយ​បណ្តឹងតវ៉ា​របស់​គណបក្ស​សង្គ្រោះ​ជាតិ​ត្រូវបាន គ​.​ជ​.​ប ច្រានចោល​ទាំងអស់ ដោយ គ​.​ជ​.​ប ទទួលស្គាល់ថា ការបោះឆ្នោត​មាន​ភាពត្រឹមត្រូវ និង​សន្និដ្ឋានថា​បណ្តឹង​របស់​គណបក្ស​សង្គ្រោះ​ជាតិ​ជា​បណ្តឹង​ដែល​ខុសឆ្គង និង​មិន​ពិត ជាហេតុ​ធ្វើ​ឲ្យ​គណបក្សប្រឆាំង​សម្រេច​ប្តឹងតវ៉ា​ទៅ​ក្រុមប្រឹក្សាធម្មនុញ្ញ​បន្តទៀត​ទាក់ទង​នឹង​ភាពមិនប្រក្រតី​នៃ​ការបោះឆ្នោត​នេះ​។

​ក្រៅពី​បានដាក់​ពាក្យបណ្តឹង​តវ៉ា​នឹង​លទ្ធផល​ឆ្នោត​បណ្តោះអាសន្ន​ដែល​មិន​ប្រក្រតី​នោះ គណបក្ស​សង្គ្រោះ​ជាតិ​ក៏​ធ្លាប់បាន​ស្នើសុំ​ឲ្យ គ​.​ជ​.​ប បង្កើត​គណៈកម្មការ​ចម្រុះ​ឯករាជ្យ​មួយ ដើម្បី​ធ្វើការ​ស៊ើបអង្កេត​ភាពមិនប្រក្រតី​នៃ​ការបោះឆ្នោត​ផងដែរ ប៉ុន្តែ​ត្រូវ​ទទួលរង​បរាជ័យ​ទល់​បច្ចុប្បន្ន ពីព្រោះ​គណបក្សកាន់អំណាច​មាន​ជំហរ​ចង់​ឲ្យ​ការដោះស្រាយ​ភាពមិនប្រក្រតី​នៃ​ការបោះឆ្នោត​ឋិត​នៅក្នុង​រង្វង់​សមត្ថកិច្ច​របស់ គ​.​ជ​.​ប និង​ក្រុមប្រឹក្សាធម្មនុញ្ញ​។​ ​

តាម​ការសម្រេច​របស់​ក្រុមប្រឹក្សាធម្មនុញ្ញ​កាលពី​ថ្ងៃទី​២៣ ខែសីហា ឆ្នាំ​២០១៣ កន្លងមក គ​.​ជ​.​ប បានធ្វើ​ការបើក​កញ្ចប់​សុវត្ថិភាព «​ក​» ក្នុង​ការិយាល័យ​បោះឆ្នោត​ចំនួន​១៣ នៅ​មណ្ឌល​ខេត្តក្រចេះ​នា​ថ្ងៃទី​២៥ ខែសីហា ឆ្នាំ​២០១៣ ម្សិលមិញ​នេះ​ដែលជា​លទ្ធផល​ធ្វើ​ឲ្យ​គណបក្ស​សង្គ្រោះ​ជាតិ​ខកចិត្ត​ដដែល ដោយ​គណបក្ស​សង្គ្រោះ​ជាតិ​ចាត់ទុកថា មាន​ភាពមិនប្រក្រតី​ទាំងអស់ និង​ធ្ងន់ធ្ងរ​ថែមទៀត​។​

​សំណួរ​មួយ​ដែល​ត្រូវបាន​ចោទសួរ​គឺ តើ​ជឿ​ដែរឬទេ​ថា គណបក្ស​ប្រជាជន​កម្ពុជា ទទួល​បានការ​ឈ្នះឆ្នោត​ដោយ​យុត្តិធម៌​និង​តម្លាភាព​? ​

មជ្ឈដ្ឋាន​អ្នកវិភាគ​នយោបាយ​ឯករាជ្យ​នៅ​កម្ពុជា​បានបង្ហាញ​នូវ​ជំហរ​យ៉ាង​ជាក់លាក់​ឆ្លើយតប​ទៅនឹង​សំណួរ​ខាងលើនេះ​ថា «​មិន​ជឿ​» ដោយ​ក្រុមអ្នកវិភាគ​ទាំង​នោះបាន​សំអាង​ទៅលើ​ហេតុផល​ដូចខាងក្រោម​៖

១- បន្ទាប់ពី​ទទួលបាន​ទិន្នន័យ​លទ្ធផល​ឆ្នោត​បឋម​តាម​មណ្ឌលបោះឆ្នោត​នានា​ហើយ​ភ្លាម​តាមរយៈ​តំណាង​គណបក្សនយោបាយ​របស់ខ្លួន​នោះ ឯកឧត្តម សម រង្ស៊ី ប្រធាន​គណបក្ស​សង្គ្រោះ​ជាតិ​បានចេញ​សេចក្តីថ្លែងការណ៍​ចុះ​ថ្ងៃទី​២៨ ខែកក្កដា ឆ្នាំ​២០១៣ ថា «​គណបក្ស​សង្គ្រោះ​ជាតិ​បានឈ្នះ​ការបោះឆ្នោត​ជ្រើសតាំង​តំណាងរាស្ត្រ​អាណត្តិ​ទី​៥​ឆ្នាំ​២០១៣»​។ ប៉ុន្តែ ប្រហែល​មិន​ដល់​មួយ​ម៉ោង​ក្រោយមក ឯកឧត្តម សម រង្ស៊ី បាន​ផ្លាស់ប្តូរ​សេចក្តីថ្លែងការណ៍​ចាស់​មក​ចេញ​ជា​សេចក្តីថ្លែងការណ៍​ថ្មី​វិញ ដោយ​គ្រាន់តែ​ធ្វើការ​ថ្លែងអំណរគុណ​ចំពោះ​បងប្អូន ជនរួមជាតិ​ដែល​បាន​អញ្ជើញ​ទៅ​បោះឆ្នោត​។ ស្របពេល​ជាមួយគ្នានេះ គណបក្ស​ប្រជាជន​កម្ពុជា​ឯណោះ​វិញ​បានចេញ​សេចក្តីថ្លែងការណ៍​របស់​ខ្លួន​ចុះ​ថ្ងៃទី​២៨ ខែកក្កដា ឆ្នាំ​២០១៣​ថា «​គណបក្ស​ប្រជាជន​កម្ពុជា​បាន​ជ័យជម្នះ​រហូត​ទទួលបាន​អាសនៈ​ភាគច្រើន​ដាច់ខាត​ក្នុង​រដ្ឋសភា​នីតិកាល​ថ្មី ដែលមាន​បរិមាណ​គ្រប់គ្រាន់​ក្នុងការ​រៀបចំ​រាជរដ្ឋាភិបាល​សម្រាប់​នីតិកាល​ថ្មី​នេះ​»​។​ ​

ការផ្លាស់ប្តូរ​ខ្លឹមសារ​នៃ​សេចក្តីថ្លែងការណ៍​របស់​ឯកឧត្តម សម រង្ស៊ី ពីមុនមក​ក្រោយ​យ៉ាង​តក់ក្រហល់​ពី​ការ​ប្រកាសថា ទទួល​បានការ​ឈ្នះឆ្នោត​មក​មិន​និយាយថា​ឈ្នះ​វិញ​នោះ គឺ​ធ្វើ​ឲ្យ​មជ្ឈដ្ឋាន​នានា​គិត​យល់ថា ទំនង​ជាមាន​ឥទ្ធិពល​សម្ពាធ​អ្វីមួយ​ពី​គណបក្សនយោបាយ​កាន់អំណាច​ទើប​ធ្វើ​ឲ្យ​គណបក្ស​សង្គ្រោះ​ជាតិ ផ្លាស់ប្តូរ​ជំហរ​ភ្លាមៗ​ដូច្នេះ ខណៈដែល​អាជ្ញាធរ​បាន​សម្ញែង​នូវ​សកម្មភាព​ចល័ត​កងទ័ព​រួចជាស្រេច​ទៅហើយ​ក្នុង​ថ្ងៃ​រាប់​សន្លឹកឆ្នោត​។​

២- ថ្វី​ដ្បិត​គណបក្ស​ប្រជាជន​កម្ពុជា​ទទួលបាន​សំឡេងឆ្នោត​គាំទ្រ​ពី​មណ្ឌលបោះឆ្នោត​នៃ​បណ្តា​ខេត្ត​ចំនួន​៩ ដែលមាន​អាសនៈ​សរុប​ចំនួន​៩​អាសនៈ​រួចជាស្រេច​ក៏ដោយ ក៏​នៅ​មណ្ឌលបោះឆ្នោត​រាជធានី​ភ្នំពេញ និង​ខេត្ត​ធំៗ​ចំនួន​៣​ផ្សេងទៀត​គឺ​ខេត្តកំពង់ចាម ខេត្តកណ្តាល និង​ខេត្តព្រៃវែង ដែលជា​មណ្ឌល​របស់​ថ្នាក់ដឹកនាំ​កំពូល​គណបក្ស​ប្រជាជន​កម្ពុជា «​សម្តេច​ទាំងបី​» ឈរឈ្មោះ​ជា​បេក្ខជន​តំណាងរាស្ត្រ​លំដាប់​លេខ​រៀង​ទី​១ ត្រូវបាន​គណបក្ស​សង្គ្រោះ​ជាតិ «​វាយ​បែក​បន្ទាយ​» និង​ដណ្តើមបាន​ជ័យជម្នះ​យ៉ាង​ត្រចះត្រចង់​រហូត​ធ្វើ​ឲ្យ «​សម្តេច​ទាំងបី​» លែង​ហ៊ាន​ក្អក​។​ ​ដូច្នេះ តើ​មាន​ហេតុផល​អ្វី​ផ្សេងទៀត​ដែលថា គណបក្ស​សង្គ្រោះ​ជាតិ​មិនអាច​ឈ្នះឆ្នោត​ទៅលើ​គណបក្ស​ប្រជាជន​កម្ពុជា​នោះ​?

៣- គណបក្ស​ប្រជាជន​កម្ពុជា​គ្មាន​សេចក្តីក្លាហាន​ទាល់តែសោះ​ក្នុងការ​បង្កើត​ឲ្យ​មាន​គណៈកម្មការ​ចម្រុះ​ឯករាជ្យ​មួយ ដើម្បី​ស៊ើបអង្កេត​ភាពមិនប្រក្រតី​នៃ​ការបោះឆ្នោត​តាម​សំណើ​របស់​គណបក្ស​សង្គ្រោះ​ជាតិ​។ មានន័យថា គណបក្ស​ប្រជាជន​កម្ពុជា​អាច​ដឹង​ជាមុន​រួចទៅហើយ​ថា មាន​ភាពមិនប្រក្រតី​ធ្ងន់ធ្ងរ​ទាក់ទង​នឹង​លទ្ធផល​ឆ្នោត ដែល​ធ្វើ​ឲ្យ​គណបក្សនយោបាយ​កាន់អំណាច​នេះ​ទទួល​បានការ​ឈ្នះឆ្នោត​។​

៤- លទ្ធផល​នៃ​ការបើក​កញ្ចប់​សុវត្ថិភាព «​ក​» របស់ គ​.​ជ​.​ប ត្រឹម​ការិយាល័យ​មួយចំនួន​នៃ​មណ្ឌលបោះឆ្នោត​ខេត្តក្រចេះ​មួយ​ប៉ុណ្ណោះ​នៅ​ព្រឹក​មិញ​នេះ​បានបង្ហាញ​ឲ្យ​ឃើញ​អំពី​ភាពមិនប្រក្រតី​ធ្ងន់ធ្ងរ​ទៅហើយ ចុះ​ទម្រាំ​មាន​ការបើក​កញ្ចប់​សុវត្ថិភាព «​ក​» នៅតាម​មណ្ឌលបោះឆ្នោត​គ្រប់​ការិយាល័យ​បោះឆ្នោត​នោះ តើ​វា​នឹង​ក្លាយទៅជា​យ៉ាងណា​? តើ​នឹងមិន​អាចធ្វើ​គណបក្ស​ប្រជាជន​កម្ពុជា​ចាញ់ឆ្នោត​ទៅហើយ​ឬ​? ​

រួម​សេចក្តី​មក ហេតុផល​ទាំងនេះហើយ​ដែល​ធ្វើ​ឲ្យ​មជ្ឈដ្ឋាន​អ្នកវិភាគ​នយោបាយ​នៅ​កម្ពុជា មិន​ជឿ​ទាល់តែសោះ​ថា គណបក្ស​ប្រជាជន​កម្ពុជា​ឈ្នះឆ្នោត​ដោយ​យុត្តិធម៌ និង​តម្លាភាព​ទៅលើ​គណបក្ស​សង្គ្រោះ​ជាតិ​នោះ​៕​

samdachtang3

Filed in: Feature, ទស្សនៈនយោបាយ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.