ថ្ងៃ ពុធ ទី ២៥ ខែ ឧសភា ឆ្នាំ ២០២២

វត្ដមាន​នាវាចម្បាំង​របស់​ជប៉ុន​ដែល​មាន​តម្លៃ​១,២​ពាន់់​លាន​ដុល្លារ​បង្ក​ឱ្យ​ចិន​និង​រុ​ស្ស៊ី​ព្រួយបារម្ភ​

​ការ​ដាក់​ឱ្យ​ចុះ​ទឹក​នូវ​នាវាចម្បាំង​យក្ស​របស់​ជប៉ុន​ប្រភេទ​ BBH-183​ Izumo​ ចំណុះ​២៧​ពាន់​តោន​ បណ្ដោយ​ប្រវែង​២៤៨​ម៉ែត្រ​ និង​ទទឹង​ប្រវែង​៣៨​ម៉ែត្រ​ មាន​តម្លៃ​រហូត​ដល់​ ១,២​ពាន់​លាន​ដុល្លារ​ កាលពី​ថ្ងៃ​ទី​០៦​ ខែសីហា​ ឆ្នាំ​២០១៣​កន្លង​ទៅ​ថ្មីៗ​នេះ​ បាន​នាំ​ឱ្យ​មានការ​ព្រួយបារម្ភ​យ៉ាង​ខ្លាំង​ដល់​ប្រទេស​រុ​ស្ស៊ី​ និង​ប្រទេស​ចិន​ ជា​ពិសេស​ប្រទេស​ចិន​ ដែល​ កំពុង​មាន​ជម្លោះ​តានតឹង​ជាមួយ​ប្រទេស​ជប៉ុន​នៅ​ជុំវិញ​ប្រជុំ​កោះ​សេន​កា​គូ​ ។​ ​

នាវាចម្បាំង​ធុន​យក្ស​របស់​ជប៉ុន​ដែល​បាន​ដាក់​ឱ្យ​ចុះ​ទឹក​នៅ​ពេល​ថ្មីៗ​នេះ​ គឺ​ស្របគ្នា​ទៅ​នឹង​ឯកឧត្ដម​នាយក​រដ្ឋមន្ដ្រី​ជប៉ុន​ ស៊ី​ន​ហ្សូ​ អា​បេ​ ប្រកាស​ធ្វើការ​កែទម្រង់​រដ្ឋធម្មនុញ្ញ​របស់​ជប៉ុន​ ពី​រូបភាព​ការពារ​ប្រទេស​ មក​ជា​ការ​ធ្វើសង្គ្រាម​វិញ​ម្ដង​ ក្រោយ​ពេល​ជប៉ុន​ទទួល​រង​ការ​គំរាមកំហែង​អធិបតេយ្យភាព​ឥត​ឈប់​ឈរ​ ។​ ជាមួយ​គ្នា​នេះ​ ជប៉ុន​ក៏​បាន​គ្រោង​បង្កើត​ កងពល​ទាហាន​វាយលុក​ឡើងគោក​ ព្រមទាំង​គ្រោង​បញ្ជា​ទិញ​យន្ដហោះ​ល្បាត​គ្មាន​មនុស្ស​បើក​ពី​សហរដ្ឋអាមេរិក​ផង​ដែរ​ ដើម្បី​ការពារ​អធិបតេយ្យ​ដែន​កោះ​របស់​ខ្លួន​ដែល​ឋិត​នៅ​ទី​ឆ្ងាយៗ​ ។​ ​

ក្រសួងការពារជាតិ​ជប៉ុន​បាន​ប្រកាស​ឱ្យ​ដឹង​ថា​ នាវាចម្បាំង​របស់​ជប៉ុន​ដែល​ទើបនឹង​ដាក់​ឱ្យ​ចុះ​ទឹក​នេះ​ ជប៉ុន​បាន​បង្កើត​ដំឡើង​ និង​បំពាក់​បច្ចេកវិទ្យា​ដោយ​ខ្លួនឯង​ ដោយ​ប្រើប្រាស់​ អស់​រយៈពេល​ចំនួន​២​ឆ្នាំ​ ដើម្បី​បំពេញ​តួនាទី​សំខាន់​ក្នុង​ការ​ការពារ​ដែនអាកាស​និង​ដែនសមុទ្រ​របស់​ជប៉ុន​ ខណៈ​ដែល​ជប៉ុន​ក៏​មាន​គម្រោង​បំពាក់​ប្រព័ន្ធ​កាំជ្រួច​មី​ស៊ី​ល​ការពារ​នៅ​ លើ​នាវាចម្បាំង​នេះ​ថែម​ទៀត​ ។​

​ប្រព័ន្ធ​ផ្សព្វផ្សាយ​នានា​បានឱ្យ​ដឹង​ថា​ នាវាចម្បាំង​របស់​ជប៉ុន​ដែល​ទើបតែ​ដាក់​ឱ្យ​ចុះ​ទឹក​ក្រោម​វត្ដមាន​អ្នកចូលរួម​អបអរសាទរ​ប្រមាណ​៣.៦០០​នាក់​ រួម​ទាំង​ឯកឧត្ដម​នាយក​រដ្ឋ​មន្ដ្រី​ជប៉ុន​ផង​នា​ពេល​ថ្មីៗ​នេះ​ អាច​ផ្ទុក​យន្ដហោះ​ចម្បាំង​មិន​តិច​ជាង​២០​គ្រឿង​ឡើយ​ ហើយ​មាន​បំពាក់​ប្រព័ន្ធ​ការពារ​កាំជ្រួច​ផ្លោង​ និង​ប្រព័ន្ធ​មី​ស៊ី​ល​ការពារ​ដែនអាកាស​ថែម​ទៀត​។​

​លោក​ឧត្ដមសេនីយ៍​ Feliks​ Gromov​ អតីត​មេបញ្ជាការ​កងទ័ពជើងទឹក​រុ​ស្ស៊ី​ បាន​មាន​ប្រសាសន៍​ឱ្យ​ដឹង​ថា​ រុ​ស្ស៊ី​ចាំបាច់​ត្រូវ​ដាក់​ពង្រាយ​នាវាចម្បាំង​ផ្ទុក​យន្ដហោះ​យ៉ាងតិច​ណាស់​ ចំនួន​២​គ្រឿង​ ទើប​អាច​ទប់ទល់​ទៅ​នឹង​នាវាចម្បាំង​របស់​ជប៉ុន​ប្រភេទ​ BBH-183​ Izumo​ បាន​ ។​

​រីឯ​លោក​ Li​ Daguang​ សាស្ដ្រាចារ្យ​នៅ​សាកលវិទ្យាល័យ​ការពារ​ជាតិ​ក្រុង​ប៉េ​កាំ​ង​ បាន​មាន​ប្រសាសន៍​ឱ្យ​ដឹង​ដែរ​ថា​ ការ​ប្រកួតប្រជែង​នាវាចម្បាំង​កំពុង​តែ​កើត​មាន​ឡើង​នៅ​ក្នុង​ តំបន់​ ដូច្នេះ​ ចិន​ចាំបាច់​ត្រូវ​តែ​ត្រៀមលក្ខណៈ​បង្ការ​ការពារ​នូវ​ឧបសគ្គ​ដែល​អាច​កើត​មាន​ឡើង​នៅ​ពេល​អនាគត​ ។​ ​

សូម​បញ្ជាក់​ជូន​ថា​ ចាប់តាំងពី​ចុងឆ្នាំ​២០១២​មក​ ទាំង​ចិន​ ទាំង​ឥណ្ឌា​ ទាំង​រុ​ស្ស៊ី​ បាន​ខិតខំ​ប្រឹងប្រែង​ពង្រឹង​យ៉ាង​ខ្លាំង​លើ​វិស័យ​កងទ័ពជើងទឹក​ និង​នាវាចម្បាំង​ ដែល​សូ​ម្បី​តែប្រទេស​រុ​ស្ស៊ី​ក៏​បាន​ចុះ​កិច្ចព្រមព្រៀង​ទិញ​នាវាចម្បាំង​វាយលុក​ឡើងគោក​ប្រភេទ​ Mistral​ ពី​ប្រទេស​បារាំង​សម្រាប់​បំពាក់​ដល់​ទាហានជើងទឹក​របស់​ខ្លួន​ផង​ដែរ​ ។​

​ដោយឡែក​ កាលពី​ពេល​កន្លង​ទៅ​ថ្មីៗ​នេះ​ដែរ​ ប្រទេស​ចិន​បាន​ចុះ​កិច្ចព្រមព្រៀង​ទិញ​កាំជ្រួច​មី​ស៊ី​ល​ប្រឆាំង​នាវាចម្បាំង​វាយប្រហារ​ពី​ដែនអាកាស​ប្រភេទ​ KH-31A​ មាន​តម្លៃ​ ប្រមាណ​៥០​លាន​ដុល្លារ​អា​មេ​រិ​ក​ និង​មី​ស៊ី​ល​ប្រភេទ​ KH-59MK​ ព្រមទាំង​កាំជ្រួច​មី​ស៊ី​ល​ប្រឆាំង​ប្រព័ន្ធ​រ៉ា​ដា​ប្រភេទ​ KH-58USHKE​ ពី​ប្រទេស​រុ​ស្ស៊ី​ ដែល​គេ​ប៉ាន់ស្មាន​ទុក​ថា​ ដើម្បី​ ត្រៀម​ទប់ទល់​នឹង​ការ​ពង្រឹង​វិស័យ​យោធា​របស់​ប្រទេស​ជប៉ុន​ ក្រោម​ការ​ជួយ​គាំពារ​ពី​សហរដ្ឋអាមេរិក​ ៕

Japan-War-Ship1

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.