ថ្ងៃ ពុធ ទី ២៩ ខែ មិថុនា ឆ្នាំ ២០២២

គណៈមេធាវី​ចាប់ផ្ដើម​ប្រមូល​លុយ​ពី​ការ​ចេញ​ប័ណ្ណ​សំគាល់​ជំនួយ​ការ​មេធាវី​​

​អនុលោម​តាម​ច្បាប់​ស្ដី​ពី​លក្ខន្ដិកៈ​មេធាវី​នៃ​ព្រះរាជាណាចក្រ​កម្ពុជា​ មិន​បាន​ចែង​បញ្ញត្ដិ​ហាមឃាត់​សហ​ភាតា​មេធាវី​កំពុង​ប្រកប​វិជ្ជា​ជីវៈ​មាន​ជំនួយការ​របស់​ខ្លួន​នោះ​ឡើយ​ ហើយ​ក៏​មិន​បាន​កំណត់​នូវ​ចំនួន​នៃ​ជំនួយការ​មេធាវី​នោះ​ដែរ​​ ។

​កាលពី​ថ្ងៃ​ទី​១៥​ខែកក្កដា​ឆ្នាំ​២០១៣​កន្លង​ទៅ​ថ្មីៗ​នេះ​ គណៈ​មេធាវី​នៃ​ព្រះរាជាណាចក្រ​កម្ពុជា​ ដែល​មាន​ឯកឧត្ដម​ ប៊ុ​ន​ ហុ​ន​ ជា​ប្រធាន​ បាន​ចេញ​សេចក្ដី​ជូន​ដំណឹង​មួយ​ជម្រាប​ដល់​សមាជិក​ សមាជិកា​គណៈមេធាវី​ទាំងអស់​​ ឱ្យ​ធ្វើការ​ទំនាក់ទំនង​ទៅ​គណៈមេធាវី​ ដើម្បី​ធ្វើ​ប័ណ្ណ​សំគាល់​ជំនួយការ​មេធាវី​ក្រោម​ឱវាទ​របស់​សហ​ភាតា​នីមួយៗ​ដែល​មាន​តម្លៃ​ចំនួន​១៥​ ដុល្លារ​អា​មេ​រិ​ក​ក្នុង​១​ប័ណ្ណ​ និង​មាន​សុពលភាព​រយៈពេល​១​ឆ្នាំ​ ។​

​សេចក្ដីជូនដំណឹង​របស់​គណៈ​មេធាវី​លេខ​៧៣៤/​គម​/១៣​ ចុះ​ថ្ងៃ​ទី​១៥​ខែកក្កដា​ឆ្នាំ​២០១៣​ ដែល​បាន​ជម្រាប​ជូន​សមាជិក​ សមា​ ជិ​កា​គណៈមេធាវី​ឱ្យធ្វើ​ប័ណ្ណ​សំ​គាល់​ខ្លួន​ជំនួយការ​មេធាវី​បែប​នេះ​ គឺ​បាន​បញ្ជាក់​ថា​“​ដើម្បី​អនុវត្ដន៍​ឱ្យ​បាន​ត្រឹមត្រូវ​តាម​ខ្លឹមសារ​នៃ​វិធាន​វិជ្ជាជីវៈ​អ្នកគ្រប់គ្រង​កា​រិ​យា​ល័យ​មេធាវី​ទាំងអស់​​ ត្រូវ​ធ្វើការ​ត្រួតពិនិត្យ​ការងារ​របស់​ជំនួយការ​មេធាវី​នៅ​ក្នុង​ការិយាល័យ​របស់​ខ្លួន​ឱ្យ​បាន​ដិត​ដល់​ ។​ ម្យ៉ាង​វិញ​ទៀត​ ដើម្បី​រក្សា​ឱ្យ​បាន​នូវ​តម្លៃ​វិជ្ជា​ជីវៈ​មេធាវី​ រាល់​ជំនួយការ​មេធាវី​ទាំងអស់​ត្រូវ​មាន​ប័ណ្ណ​សំគាល់​ខ្លួន​ដើម្បី​បញ្ជាក់​អំពី​មុខងារ​របស់​ខ្លួន​ និង​ងាយស្រួល​ក្នុង​ការ​ធ្វើការ​ទំនាក់ទំនង​ជាមួយ​ស្ថាប័ន​មាន​សមត្ថកិច្ច​ផ្សេងៗ​ ។​”​ ។​

​ការ​ចេញ​សេចក្ដីជូនដំណឹង​របស់​គណៈមេធាវី​នេះ​ ធ្វើ​ឱ្យ​សហ​ភាតា​មេធាវី​កំពុង​ប្រកប​វិជ្ជាជីវៈ​មេធាវី​មួយ​ចំនួន​មានការ​ភ្ញាក់ផ្អើល​ និង​ចាប់អារម្មណ៍​ថា​ តម្លៃ​នៃ​ការ​ធ្វើ​ប័ណ្ណសំគាល់ខ្លួន​ជំនួយការ​មេធាវី​ចំនួន​១៥​ដុល្លារ​អា​មេ​រិ​ក​ក្នុង​១​ប័ណ្ណ​ ដោយ​មាន​សុពលភាព​រយៈពេល​១​ឆ្នាំ​ គឺ​មាន​តម្លៃ​ខ្ពស់​ជាង​ការ​ធ្វើ​ប័ណ្ណសំគាល់ខ្លួន​មេធាវី​ទៅ​ទៀត​ ដែល​មាន​តម្លៃ​ត្រឹម​ចំនួន​៥​ដុល្លារ​អា​មេ​រិ​ក​ក្នុង​១​ប័ណ្ណ​ប៉ុណ្ណោះ​ ។​ ម្យ៉ាងទៀត​ កាលពី​ពេល​មុន​គណៈមេធាវី​មិន​បាន​ចាត់ការ​របៀប​នេះ​ទេ​ គឺ​គ្រាន់តែ​តម្រូវ​ឱ្យ​សហ​ភាតា​មេធាវី​ទាំងអស់​ដែល​មាន​ជំនួយការ​ធ្វើការ​ជូនដំណឹង​ទៅ​គណៈមេធាវី​ជា​ការ​ស្រេច​ រីឯ​ការ​ចេញ​ប័ណ្ណសំគាល់ខ្លួន​ជំនួយការ​មេធាវី​នៅ​ក្នុង​បន្ទុក​ឬ​ការ​ចាត់ចែង​ផ្ទាល់​របស់​សហ​ភាតា​មេធាវី​នីមួយៗ​ ពីព្រោះ​ជំនួយការ​មេធាវី​ ឋិត​នៅ​ក្រោម​ការ​ទទួលខុសត្រូវ​ផ្ទាល់​របស់​មេធាវី​សាមី​ដែល​មាន​ជំនួយការ​នោះ​ ។​

​មជ្ឈដ្ឋាន​អ្នក​រិះគន់​បាន​លើក​ឡើង​ថា​ សេចក្ដីជូនដំណឹង​របស់​គណៈមេធាវី​លើ​ការ​ចេញ​ប័ណ្ណ​សំគាល់​ខ្លួន​ជំនួយការ​មេធាវី​បែប​នេះ​ គឺជា​ការ​ជ្រៀតជ្រែក​ទៅ​លើ​ការងារ​ និង​ការងារ​ទទួលខុសត្រូវ​ផ្ទាល់​របស់​សហ​ភាតា​មេធាវី​នីមួយៗ​ដែល​មាន​ជំនួយការ​ និង​មាន​លក្ខណៈ​ជា​ការ​ប្រមូលផ្ដុំ​អំណាច​ក្ដោប​ក្រសោប​ បំបិទ​សិទ្ធិ​សេរី​ភាព​សមាជិក​គណៈមេធាវី​ ។​

​ក្រុម​អ្នក​រិះគន់​បាន​លើក​ឡើង​ទៀត​ថា​ សូ​ម្បី​អង្គភាព​សារព័ត៌​មាន​នានា​ដែល​ត្រូវ​ចេញ​ប័ណ្ណ​សំគាល់​ខ្លួន​ឱ្យទៅ​បុគ្គលិក​ឬ​ភ្នា​ក់​ងារ​យក​ព័ត៌មាន​ដើម្បី​បំពេញ​ការ​ងារ​យក​ព័ត៌មាន​ក្នុង​វិជ្ជាជីវៈ​ ឋិត​ក្រោម​ច្បាប់​ស្ដី​ពី​របប​សារព័ត៌មាន​នោះ​ ក៏​ក្រសួង​ព័ត៌មាន​ដែល​ជា​ក្រសួង​អាណាព្យាបាល​ មិន​បាន​ដាក់​កំហិត​ទៅ​លើ​អង្គភាព​សារព័ត៌​មាន​ទាំងនោះ​ត្រូវ​តែ​ធ្វើ​ប័ណ្ណ​សំគាល់​ ខ្លួន​ឱ្យ​បុគ្គលិក​ឬ​អ្នក​យក​ព័ត៌មាន​នៅ​ក្រសួង​ព័ត៌មាន​ផ្ដាច់​មុខតែ​មួយ​ដែរ​ គឺ​ក្រសួង​ព័ត៌មាន​បាន​បើក​ច្រក​ឱ្យ​អង្គភាព​សារព័ត៌មាន​នីមួយៗ​អាច​ចេញ​ប័ណ្ណសំគាល់ខ្លួន​ឱ្យទៅ​បុគ្គលិក​ឬ​ភ្នាក់ងារ​យក​ព័ត៌មាន​ដោយ​ផ្ទាល់​បាន​ ។​ ចុះ​ប្លែក​អ្វី​តែ​ ស្ថាប័ន​គណៈមេធាវី​ដែល​ជា​ស្ថាប័ន​អ្នកចេះ​ច្បាប់ទម្លាប់​ទៅ​វិញ​ ?

​សូម​បញ្ជាក់​ជូន​ថា​ គណៈ​មេធាវី​នៃ​ព្រះរាជាណាចក្រ​កម្ពុជា​បច្ចុប្បន្ន​ ដឹកនាំ​ដោយ​ឯកឧត្ដម​ ប៊ុ​ន​ ហុ​ន​ ជា​ប្រធាន​ ដែល​ ឯកឧត្ដម​មេធាវី​អត្ដលេខ​១៤១​រូប​នេះ​ មានមុខ​ងារ​មួយទៀត​ជា​សមាជិក​ក្រុមប្រឹក្សា​អ្នក​ច្បាប់​នៃ​ទីស្ដីការគណៈរដ្ឋមន្ដ្រី​ មាន​ឋានៈ​ស្មើ​រដ្ឋលេខាធិការ​ និង​គ្រប់គ្រង​ដោយ​សមាជិក​ សមាជិកា​ក្រុម​ប្រឹក្សា​គណៈមេធាវី​ចំនួន​២៧​នាក់​ ព្រមទាំង​មាន​សមាជិក​មេធាវី​សរុប​ទាំងអស់​ក្នុង​រង្វង់​ចំនួន​ក្រោម​១.០០០​នាក់​ ៕

11BAKC1

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.