ថ្ងៃ ពុធ ទី ២៥ ខែ ឧសភា ឆ្នាំ ២០២២

សាលាឧទ្ធរណ៍​សម្រេច​មិន​ឱ្យ​បុគ្គលិក​សហជីព​និង​កម្មករ​រោងចក្រ​សា​ប្រ៊ី​ណា​៨​នាក់​នៅ​ក្រៅ​ឃុំ​ទេ​

​សវនាការ​ជំនុំជម្រះ​អសាធារណៈ​របស់​សាលាឧទ្ធរណ៍​នា​រសៀល​ថ្ងៃ​ទី​០៥​ខែកក្កដា​ឆ្នាំ​២០១៣​នេះ ​ ដែល​មាន​ឯកឧត្ដម​ សេង​ ស៊ី​វុ​ត្ថា​ អនុប្រធាន​សាលាឧទ្ធរណ៍​ និង​ជា​ប្រធាន​ក្រុមប្រឹក្សា​ជំនុំជម្រះ​ បាន​សម្រេច​តម្កល់​សេចក្ដីសម្រេច​របស់​ចៅក្រម​ស៊ើបសួរ​សាលាដំបូង​ខេត្ដ​កំពង់ស្ពឺ​ទុកជា​បានការ​ គឺ​មិន​អនុ​ញ្ញាត​ឱ្យ​បុគ្គលិក​សហជីព​សេរី​កម្មករ​នៃ​ព្រះរាជាណាចក្រ​កម្ពុជា​​ និង​កម្មករ​រោងចក្រ​កាត់ដេរ​សា​ប្រ៊ី​ណា​ ចំនួន​៨​នាក់​ដែល​កំពុង​ជាប់​ឃុំខ្លួន​នោះ​បាន​ឋិត​នៅ​ក្រៅ​ឃុំ​បណ្ដោះ​អាសន្ន​ តាម​សំណើ​របស់​មេធាវី​ការពារ​ក្ដី​ឱ្យ​ជន​ត្រូវ​ចោទ​ឡើយ​ ។​ ​

នៅ​ក្រោយ​សវនាការ​របស់​សា​លា​ឧទ្ធរណ៍​ ដែល​គ្មាន​វត្ដមាន​របស់​ជន​ត្រូវ​ចោទ​ទាំង​៨​នាក់​នោះ​ លោក​មេធាវី​ កៅ​ ទី​ ជា​មេធាវី​ការពារ​ក្ដី​ឱ្យ​ជន​ត្រូវ​ចោទ​ បាន​ប្រាប់​ថា​ លោក​នឹង​ធ្វើការ​ប្ដឹង​សាទុក្ខ​ទៅ​តុលាការ​កំពូល​តាម​នីតិវិធី​បន្ដ​ទៀត​ ដើម្បី​ឱ្យ​តុលាការ​កំពូល​ពិចារណា​ទៅ​លើ​សំណើ​របស់​លោក​ដែល​សុំ​ឱ្យ​កូនក្ដី​បាន​នៅ​ក្រៅ​ឃុំ​បណ្ដោះអាសន្ន​ ។​

​គួរ​រម្លឹក​ជូន​ថា​ ក្រោម​ទម្ងន់​នៃ​បណ្ដឹង​ចុះ​ថ្ងៃ​ទី​២៩​ខែឧសភា​ឆ្នាំ​២០១៣​ របស់​លោកស្រី​ ឈិ​ន​ ស៊ី​ង​អ៊ី​ង​ ​(Chen Xingying ​) ​សញ្ជាតិ​ចិន​ នាយិកា​ក្រុមហ៊ុន​រោងចក្រ​កាត់ដេរ​សា​ប្រ៊ី​ណា​(​ខេ​ម​បូ​ឌា​)​ ហ្គា​មេន​ មាន​ទីតាំង​ឋិត​នៅ​ភូមិ​ត្រ​ពាំង​ឫស្សី​ ឃុំ​សំបូរ​ស្រុក​សំរោង​ទង​ ខេត្ដកំពង់ស្ពឺ​ ទៅ​តុលាការ​ខេត្ដកំពង់ស្ពឺ​ បន្ទាប់​ពី​លេច​មាន​ករណី​អំពើ​ហិង្សា​ក្នុង​ពេល​កម្មករ​ កម្មការិនី​រោងចក្រ​កាត់ដេរ​សា​ប្រ៊ី​ណា​ធ្វើ​កូដកម្ម​នា​ថ្ងៃ​ទី​២៧​ខែឧសភា​ឆ្នាំ​២០១៣​នោះ​ កងកម្លាំង​សមត្ថកិច្ច​បាន​ចាប់​ឃាត់ខ្លួន​បុគ្គលិក​សហជីព​សេរី​កម្មករ​នៃ​ព្រះរាជាណាចក្រ​កម្ពុជា​ និង​កម្មករ​រោងចក្រ​កាត់​ដេរ​សា​ប្រ៊ី​ណា​ចំនួន​៨​នាក់​​នៅ​ថ្ងៃ​ទី​០៣​ខែមិថុនា​ឆ្នាំ​២០១៣​ បញ្ជូន​សំណុំរឿង​ទៅ​តុលាការ​ និង​ត្រូវ​ បាន​សាលាដំបូង​ខេត្ដកំពង់ស្ពឺ​ចេញ​ដីកាឃុំខ្លួន​បណ្ដោះអាសន្ន​នៅ​ថ្ងៃ​ទី​០៤​ខែមិថុនា​ឆ្នាំ​២០១៣​ទល់​បច្ចុប្បន្ន​ ដោយ​ចោទប្រកាន់​ពី​បទ​ផ្ដើមគំនិត​ក្នុង​អំពើ​ហិង្សា​ដោយ​ចេតនា​ និង​ក្នុង​អំពើ​ធ្វើ​ឱ្យ​ខូចខាត​ដោយ​ចេតនា​ ដោយ​មាន​ស្ថាន​ទម្ងន់ទោស​ ។​ លើស​ពី​នេះ​ បុគ្គលិក​សហជីព​សេរី​កម្មករ​នៃ​ព្រះ​រាជាណាចក្រ​កម្ពុជា​ និង​កម្មករ​ រោងចក្រ​សា​ប្រ៊ី​ណា​ចំនួន​៨​នាក់​ផ្សេង​ទៀត​ ​ក៏​ត្រូវ​ទទួល​រង​ការ​ចោទ​ប្រកាន់​ពី​តុលាការ​ផង​ដែរ​ ប៉ុន្ដែ​មិន​ទាន់​ត្រូវ​បាន​ចាប់​ឃាត់ខ្លួន​ និង​ឃុំខ្លួន​នៅឡើយ​ ។

​ ​នៅ​ថ្ងៃ​ទី​០៦​ខែមិថុនា​ឆ្នាំ​២០១៣​ លោក​មេធាវី​ កៅ​ ទី​ ជា​មេធាវី​ការ​ពារ​ក្ដី​ឱ្យ​ជន​ត្រូវ​ចោទ​ទាំង​៨​នាក់​ ដែល​កំពុង​ជាប់​ឃុំខ្លួន​ បាន​ដាក់​ពាក្យ​ស្នើ​សុំ​ឱ្យ​កូនក្ដី​របស់​លោក​បាន​នៅ​ក្រៅ​ឃុំ​បណ្ដោះអាសន្ន​ទៅ​តុលាការ​ តែ​ត្រូវ​បាន​លោក​ ឆឹ​ម​ ឫ​ទ្ធី​ ចៅក្រម​ស៊ើបសួរ​សាលា​ដំបូង​ខេត្ដ​កំំ​ពង់​ស្ពឺ​បដិសេធ​តាម​ដីកា​សម្រេច​លេខ​១៣៥១​ចុះ​ថ្ងៃ​ទី​០៧​ខែមិថុនា​ឆ្នាំ​២០១៣​ ។​ ​ក្រោយ​មក​លោក​មេធាវី​ កៅ​ ទី​ បាន​ប្ដឹង​ឧទ្ធរណ៍​បន្ដ​ ហើយ​ក៏​ត្រូវ​បាន​សា​លា​ឧទ្ធរណ៍​សម្រេច​បដិសេធ​នៅ​រសៀល​ថ្ងៃនេះ​ទៀត​ ។​

​លោក​ ជា​ មុនី​ ប្រធាន​សហ​ជីព​សេរី​កម្មករ​នៃ​ព្រះរាជាណាចក្រ​កម្ពុជា​ធ្លាប់​បាន​ធ្វើ​លិខិតផ្លូវការ​គោរព​ជូន​ឯកឧត្ដម​ឯកអគ្គរដ្ឋទូត​សហរដ្ឋអាមេរិក​ប្រចាំ​នៅ​កម្ពុជា​ ដើម្បី​ស្នើ​សុំ​ជួយ​អន្ដរាគមន៍​ឱ្យ​មាន​ការ​ស៊ើបអង្កេត​លើ​ករណី​អំពើ​ហិង្សា​នៅ​រោងចក្រ​សា​ប្រ៊ី​ណា​ប្រកបដោយ​សុក្រឹតភាព​ និង​ស្នើ​សុំ​ជួយ​អន្ដរាគមន៍​ឱ្យ​មានការ​ដោះ​ លែង​បុគ្គលិក​សហជីព​និង​កម្មករ​រោងចក្រ​សា​ប្រ៊ី​ណា​ចំនួន​៨​នាក់​ដែល​កំពុង​ជាប់​ឃុំខ្លួន​ផង​ដែរ​ ប៉ុន្ដែ​មិន​ទាន់​ទទួល​បាន​លទ្ធផល​ជា​វិ​ជ្ជ​មាន​ទេ​ ៕

Sabrina-Case-Letter

Filed in: តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.