ថ្ងៃ ពុធ ទី ២៧ ខែ មករា ឆ្នាំ ២០២១

បោះ​ឆ្នោត​ជ្រើសតាំង​តំណាងរាស្ដ្រ​អាណត្ដិ​ទី​៥ ​គណបក្ស​ប្រជាជន​កម្ពុជា​ទំនង​មិន​ទទួល​បាន​ប្រជាប្រិយភាព​ពី​រឿង​ក្ដី​ប្រាសាទព្រះវិហារ​ទេ​

​ប្រទេស​កម្ពុជា​ធ្លាប់​បាន​ឈ្នះក្ដី​លើ​ប្រទេស​ថៃ​ក្នុង​សំណុំរឿង​ប្រាសាទ​ព្រះ​វិហារ​ នៅ​តុលាការ​យុត្ដិធម៌​អន្ដរជាតិ​ទីក្រុង​ឡា​អេ​ នា​សម័យ​សង្គម​រាស្ដ្រ​និយម
​ ក្រោម​ព្រះរាជកិច្ច​ដឹកនាំ​របស់​សម្ដេចព្រះ​នរោត្ដម​ សីហ​នុ​ តាម​អំណាច​នៃ​សាលក្រម​លេខ​៤៥​ចុះ​ថ្ងៃ​ទី​១៥​ខែមិថុនា​ឆ្នាំ​១៩៦២​ របស់​តុលាការ​យុត្ដិធម៌​អន្ដរជាតិ​ ។​

​សាលក្រម​លេខ​៤៥​ចុះ​ថ្ងៃ​ទី​១៥​ខែមិថុនា​ឆ្នាំ​១៩៦២​ របស់​តុលាការ​យុត្ដិធម៌​អន្ដរជាតិ​ បាន​សម្រេច​ទទួលស្គាល់​តំបន់​ប្រាសាទព្រះវិហារ​ ឋិត​នៅ​ក្នុង​ដែន​អធិបតេយ្យភាព​បូរណភាព​ទឹកដី​របស់​ប្រទេស​កម្ពុជា​ និង​សម្រេច​បង្គាប់​ឱ្យ​ប្រទេស​ថៃ​មាន​កាតព្វកិច្ច​ដក​កម្លាំង​ទ័ព​ ឬ​នគរបាល​ ឬ​អ្នក​ថែរក្សា​ ឬ​ឆ្មាំ​ដទៃ​ទៀត​ដែល​ថៃ​បាន​ដាក់​ពង្រាយ​ក្នុង​ប្រាសាទ​ ឬ​ តំបន់​ក្បែរ​ជុំវិញ​ប្រាសាទ​ឱ្យ​អស់​ ព្រមទាំង​សម្រេច​បង្គាប់​ឱ្យ​ថៃ​ប្រគល់​នូវ​សម្បត្ដិទ្រព្យ​មាន​តម្លៃ​ជា​របស់បុរាណ​ដែល​ថៃ​បាន​យក​ទៅ​មក​ឱ្យ​ កម្ពុជា​វិញ​ ។​

​ថ្វី​ដ្បិត​សាលក្រម​របស់​តុលាការ​យុត្ដិធម៌​អន្ដរជាតិ​ដែល​ឋិត​នៅ​ក្នុង​ប្រព័ន្ធ​អង្គការសហប្រជាជាតិ​ បាន​សម្រេច​ដូចនេះ​ក៏​ដោយ​ ក៏​ភាគី​ប្រទេស​ថៃ​បាន​ប្រើប្រាស់​កម្លាំងយោធា​ចូល​មក​ទន្ទ្រាន​រំលោភ​ឈ្លា​ន​ពាន​កាន់កាប់​ប្រាសាទព្រះវិហារ​យ៉ាង​គឃ្លើន​ នា​ថ្ងៃ​ទី​០៣​ខែមេសា​ឆ្នាំ​១៩៦៦​ ខណៈ​ដែល​សាលក្រម​របស់​តុលាការ​យុត្ដិធម៌​អន្ដរជាតិ​មិន​ទាន់​បាន​ចូល​ជា​ស្ថាពរ​ ។​ ប៉ុន្ដែ​រយៈពេល​បី​ថ្ងៃ​ក្រោយមក​ គឺ​នៅ​ថ្ងៃ​ទី​០៦​ខែ​មេ​សា​ឆ្នាំ​១៩៦៦​ រាជរដ្ឋាភិបាល​កម្ពុ​ជានា​សម័យ​សង្គមរាស្ដ្រនិយម​ បាន​សម្រេច​ប្រើប្រាស់​កម្លាំងយោធា​វាយ​រុញច្រាន​បណ្ដេញ​កងកម្លាំង​យោធា​ថៃ​ ដណ្ដើម​បាន​ប្រាសាទព្រះវិហារ​យក​មក​កាន់កាប់​ គ្រប់គ្រង​ជា​អធិបតេយ្យភាព​ទាំងស្រុង​វិញ​ ។​

​ក្រោយមក​ សាលក្រម​លេខ​៤៥​ចុះ​ថ្ងៃ​ទី​១៥​ខែមិថុនា​ឆ្នាំ​១៩៦២​ របស់​តុលាការ​យុត្ដិធម៌​អន្ដរជាតិ​ បាន​ចូល​ជា​ស្ថាពរ​នៅ​ថ្ងៃ​ទី​១៥​ខែមិថុនា​ឆ្នាំ​១៩៧២​ ដោយ​ភាគី​ប្រទេស​ថៃ​ជា​ភាគី​ចាញ់ក្ដី​ មិន​បាន​ប្ដឹង​ប្រឆាំង​នឹង​សាលក្រម​នេះ​អស់​រយៈពេល​១០​ឆ្នាំ​កន្លង​ផុត​ទៅ​ ។​

​ខណៈ​ដែល​ប្រទេស​កម្ពុជា​ធ្លាក់​ទៅ​ក្នុង​ភ្នក់ភ្លើង​សង្គ្រាមស៊ីវិល​រ៉ាំរ៉ៃក្រោយ​រដ្ឋប្រហារ​ទម្លាក់​សម្ដេចព្រះ​នរោត្ដម​ សីហ​នុ​ នា​ថ្ងៃ​ទី​១៨​ខែ​ មីនា​ឆ្នាំ​១៩៧០​ ដោយ​លោក​ លន់​ ន​ល់​ និង​បក្ខពួក​រួច​មក​ ប្រាសាទ​ព្រះ​វិហារ​ក៏​មិន​បាន​ធ្លាក់​ទៅ​ក្នុង​ដៃ​របស់​ភាគី​ប្រទេស​ថៃ​ដែរ​ ។​

​បន្ទាប់​ពី​រាជាណាចក្រ​កម្ពុ​ជាទី​ពីរ​បាន​ចាប់កំណើត​ឡើង​(​ពី​ឆ្នាំ​១៩៣​មក​)​នា​ថ្ងៃ​ទី​០៤​ខែឧសភា​ឆ្នាំ​២០០១​ ស្រាប់តែ​សារព័ត៌មាន​ឌឺ​ ណេ​សិន​ (The Nation)​​ ​របស់​ថៃ​បាន​ចុះ​ផ្សាយ​អត្ថបទ​ក្រោម​ចំណងជើង​ថា​ “​ថៃ​សង្ឃឹមថា​ នឹង​បាន​ជួល​ប្រាសាទព្រះវិហារ​-​Thailand hopes to lease Phra​ Viharn”​ ។​ ប៉ុន្ដែ​ព័ត៌មាន​នៃ​ការ​ចុះ​ផ្សាយ​នេះ​ ​ត្រូវ​បាន​ក្រសួង​ទេសចរណ៍​កម្ពុជា​ប្រកាស​បដិសេធ​ នា​ថ្ងៃ​ទី​០៩​ ខែឧសភា​ ឆ្នាំ​២០០១​ ដោយ​បាន​បំភ្លឺ​បញ្ជាក់​ថា​“​រាជរដ្ឋាភិបាល​កម្ពុជា​កំពុង​ប្រឹងប្រែង​ថែរក្សា​ គ្រប់គ្រង​ ដើម្បី​អភិវឌ្ឍ​តំបន់​ប្រាសាទព្រះវិហារ​ទុកជា​តំបន់​មរតក​វប្ប​ធម៌​ និង​ប្រវត្ដិសាស្ដ្រ​មួយ​របស់​ព្រះរាជាណាចក្រ​កម្ពុជា​ ហើយ​ក៏​ពុំដែល​មាន​នយោបាយ​ដើម្បី​ជួល​តំបន់​ប្រាសាទព្រះវិហារ​ឱ្យ​អ្នក​វិនិយោគ​ឡើយ​។​ ”​ ។​

​តាម​សំណើ​របស់​ភាគី​ប្រទេស​កម្ពុជា​ នៅ​ថ្ងៃ​ទី​០៧​ខែកក្កដា​ឆ្នាំ​២០០៨​ ប្រាសាទព្រះវិហារ​ត្រូវ​បាន​អង្គការ​អប់រំ​វិទ្យាសាស្ដ្រ​និង​វប្បធម៌​របស់​សហប្រជាជាតិ​ ហៅ​កាត់​ថា​ អង្គការ​យូ​ណេ​ស្កូ​សម្រេច​ចុះ​ក្នុង​បញ្ជី​បេ​តិក​ភណ្ឌ​ពិភពលោក​ ។​ ព្រម​ជាមួយ​គ្នា​នឹង​ប្រា​សា​ព្រះ​វិហារ​ដែល​ត្រូវ​បាន​ អង្គការ​យូ​ណេ​ស្កូ​ចុះ​ក្នុង​បញ្ជី​បេតិកភណ្ឌ​ពិភពលោក​ គឺ​នៅ​ថ្ងៃ​ទី​១៥​ខែ​កក្កដា​ឆ្នាំ​២០០៨​ (​ចំនួន​១​ស​ប្ដា​ហ៍​ក្រោយ​)​ ប្រទេស​ថៃ​បាន​បញ្ជូន​កង​កម្លាំងយោធា​ប្រដាប់​ដោយ​អាវុធ​គ្រប់​ធុន ​ចូល​មក​ទន្ទ្រាន ​ឈ្លានពាន​ទឹកដី​ប្រទេស​កម្ពុជា​ នៅ​តំបន់​បរិវេណ​ជុំវិញ​ប្រាសាទព្រះវិហារ​ ។​ ​រាជរដ្ឋាភិបាល​បាន​ប្រើប្រាស់​វិធី​ការទូត​ចរចា​ជាមួយ​ភាគី​ប្រទេស​ថៃ​ដែល​ជា​ភាគី​ប្រទេស​រំលោភ​ឈ្លានពាន​ ដោយ​មិន​ប្រើប្រាស់​កម្លាំង​យោធា​តបត​ ឬ​វាយប្រហារ​ទៅ​លើ​កម្លាំង​ទាហាន​ថៃ​ឈ្លានពាន​វិញ​ទេ​ រហូត​ដល់​កាលបរិច្ឆេទ​បោះ​ឆ្នោត​ជ្រើសតាំង​តំណាងរាស្ដ្រ​អាណត្ដិ​ទី​៤​ (២០០៨-២០១៣)​ នា​ថ្ងៃ​ទី​២៧​ ខែកក្កដា​ ឆ្នាំ​២០០៨​ បាន​មក​ដល់​ ខណៈ​ដែល​ប្រជារាស្ដ្រ​ខ្មែរ​ជា​ម្ចាស់​ឆ្នោត​កំពុង​អបអរសាទរ​នឹង​លទ្ធផល​នៃ​ការ​ចុះបញ្ជី​ជា​បេតិកភណ្ឌ​ពិភពលោក​របស់​ប្រាសាទព្រះវិហារ​ តាម​សំណើរបស់​រាជរដ្ឋាភិបាល​កម្ពុជា​យ៉ាង​គគ្រឹកគគ្រេង​ ។​

ជា​លទ្ធផល​ គណបក្ស​ប្រជាជន​កម្ពុជា​បាន​ឈ្នះ​ឆ្នោត​ទទួល​បាន​ អាសនៈ​នៅ​ក្នុង​រដ្ឋសភា​នីតិកាល​ទី​៤​ចំនួន​៩០​អាសនៈ​ ក្នុង​ចំណោម​ អាសនៈ​រដ្ឋសភា​សរុប​ចំនួន​១២៣​ ព្រោះតែ​ប្រជាប្រិយភាព​របស់​គណ​បក្ស​ប្រជាជន​កម្ពុជា​បាន​កើនឡើង​ជាមួយនឹង​ជោគជ័យ​នៃ​ការ​ចុះបញ្ជី​ប្រាសាទព្រះវិហារ​ជា​បេតិកភណ្ឌ​ពិភពលោក​ ។​

​ទោះបី​គណបក្ស​ប្រជាជន​កម្ពុជា​ទទួល​បាន​ជ័យជម្នះ​ក្នុង​ការ​បោះ​ឆ្នោតជ្រើសតាំង​តំណាងរាស្ដ្រ​អា​ណ​ត្ដិ​ទី​៤​ និង​បាន​កាន់កាប់​អំណាច​ក្ដី​ ក៏​ជម្លោះទឹកដី​នៅ​តំបន់​ជុំវិញ​ប្រាសាទព្រះវិហារ​ជាមួយ​ភាគី​ប្រទេស​ថៃ​មិន​បាន​ចប់​ឡើយ​ ទល់​បច្ចុប្បន្ន​រហូត​បង្ក​ឱ្យ​មានការ​ផ្ទុះអាវុធ​ បណ្ដាល​ឱ្យ​ខូចខាត​ប្រាង្គ​ប្រាសាទព្រះវិហារ​ មានការ​ជម្លៀស​ប្រជាជន​ និង​ឱ្យ​មានការ​ស្លាប់​ និង​របួស​ទាហាន​ខ្មែរ​ស្នេហា​ជាតិ​ថែម​ទៀត​ កាល​ពី​អំឡុង​ដើមឆ្នាំ​២០១១​កន្លង​មក​ ។​

​នៅ​ថ្ងៃ​ទី​១៨​ខែកក្កដា​ឆ្នាំ​២០១១​ តាម​សំណើ​និង​ពាក្យបណ្ដឹង​របស់​ភាគី​ប្រទេស​កម្ពុជា​ ទើប​តុលាការ​យុត្ដិធម៌​អន្ដរជាតិ​បាន​ចេញ​សាលដីកា​បង្គាប់​មួយ​ ឱ្យ​តំបន់​ជម្លោះ​ក្លាយជា​តំបន់​គ្មាន​កងទ័ព​បណ្ដោះអាសន្ន​ (PDZ​)​ ។​ លើស​ពី​នេះ​ ទាំង​ភាគី​ប្រទេស​ថៃ​ ទាំង​ភាគី​ប្រទេស​កម្ពុជា​ កំពុង​ទន្ទឹងរង់ចាំ​មើល​ចំណាត់ការ​របស់​តុលាការ​យុត្ដិធម៌​អន្ដរជាតិ​លើ​បណ្ដឹង​របស់​ភាគី​ប្រទេស​កម្ពុជា​ ដែល​ស្នើ​សុំ​ឱ្យ​មានការ​បកស្រាយ​លម្អិត​នូវ​សាលក្រម​លេខ​៤៥​ចុះ​ថ្ងៃ​ទី​១៥​ខែមិថុនា​ឆ្នាំ​១៩៦២​របស់​តុលា​ការ​យុត្ដិធម៌​អន្ដរជាតិ​ ដែល​នឹង​ត្រូវ​សម្រេច​ឱ្យ​ដឹង​នៅ​ចុងឆ្នាំ​២០១៣​ខាង​មុខ​ ខណៈ​ដែល​អាជ្ញាធរ​កម្ពុជា​បាន​អំពាវនាវ​ឱ្យ​ប្រជាពលរដ្ឋ​ស្ងប់ស្ងាត់​ក្នុង​ចិត្ដ​ ក្នុង​សំណុំរឿង​ក្ដី​ប្រាសាទព្រះវិហារ​ដ៏​រ៉ាំរ៉ៃ​ និង​គួរ​ឱ្យ​ចាប់​អារម្មណ៍​នេះ​ ។​

​មជ្ឈដ្ឋាន​អ្នកវិភាគ​នយោបាយ​ឯករាជ្យ​នៅ​កម្ពុជា​​ បាន​បញ្ចេញ​ទស្សនៈ​ថា​ សម្រាប់​ការ​បោះ​ឆ្នោត​ជ្រើសតាំង​តំណាងរាស្ដ្រ​អាណត្ដិ​ទី​៥​ (២០១៣​ -២០១៨)​នៅ​ថ្ងៃអាទិត្យ​ទី​២៨​ខែកក្កដា​ឆ្នាំ​២០១៣​ខាង​មុខ​នេះ​ គណបក្ស​ប្រជាជន​កម្ពុជា​ដែល​កំពុង​ដឹកនាំ​ប្រទេស​បច្ចុប្បន្ន​ ទំនងជា​នឹង​មិន​ទទួល​បាន​ប្រជាប្រិយភាព​ពី​រឿង​ក្ដី​ប្រាសាទព្រះវិហារ​ ដូច​ការ​បោះ​ឆ្នោត​ជ្រើសតាំង​តំណាងរាស្ដ្រ​អាណត្ដិ​ទី​៤​ (២០០៨-២០១៣)​កន្លង​មក​ឡើយ​​ ​ ព្រោះ​រឿង​ក្ដី​ប្រាសាទព្រះវិហារ​ក្នុង​ស្ថានភាព​បច្ចុប្បន្ន​នេះ​ មិន​ ទាន់​ប្រាកដ​ថា​ កម្ពុជាមាន​ប្រៀប​ខ្លាំង​លើ​ភាគី​ប្រទេស​ថៃ​នោះ​ទេ​ ៕

Filed in: Feature, ទស្សនៈនយោបាយ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.