ថ្ងៃ ចន្ទ ទី ២៤ ខែ មករា ឆ្នាំ ២០២២

តុលាការ​សាលាដំបូង​រាជធានី​ភ្នំពេញ​បាន​សម្រេច​ផ្ដល់​យុត្ដិធម៌​ឱ្យ​ជនជាតិ​ចិន​ម្នាក់​ឈ្មោះ He Ming Chai វិញ​ហើយ

​សាលាដំបូង​រាជធានី​ភ្នំពេញ​ដែល​មាន​លោកស្រី ​ចាំង​ ស៊ី​ណាត​ ជា​ប្រធាន​ក្រុមប្រឹក្សា​ជំនុំជម្រះ​,​ លោកស្រី​សែ​ម​ សក្ដិ​កូ​ឡា​ និង​ លោក​លាង​ សំណាត់​ ជា​ចៅក្រម​ប្រឹក្សា​បាន​ប្រកាស​សាលក្រម ​ កាលពី​ថ្ងៃ​ទី​០១​ខែមេសា​ឆ្នាំ​២០១៣​ កន្លង​ទៅ​នេះ​ ដោយ​សម្រេច​ឱ្យ​ ជនជាប់ចោទ​ជា​ជនជាតិ​ចិន​ម្នាក់​ឈ្មោះ​ ហ៊ី​ មីង​ឆាយ​ (He Ming Chai )​ភេទ​ប្រុស​ អាយុ​៤៦​ឆ្នាំ​ មុខ​របរ​មេការ​ត្រួតពិនិត្យ​នៅ​រោងចក្រ​កាត់ដេរ​អ៊ី​ស៊ា​ង​ បាន​រួច​ផុត​ពី​ការ​ចោទប្រកាន់​ក្នុង​បទ​សមគំនិត​ក្នុង​អំពើ​ឃាតកម្ម​គិត​ទុកជា​មុន​ទៅ​លើ​ជនជាតិ​ចិន​ដូច​គ្នា​ឈ្មោះ​ zou Jian Chang​ ​ប្រព្រឹត្ដ​នៅ​បន្ទប់​លេខ​៨០៥​ជាន់​ទី​៨​នៃ​សណ្ឋាគារ​ណា​ហ្គា​វើ​ល​ ឋិត​នៅ​សង្កាត់​ទន្លេបាសាក់​ ខណ្ឌ​ចំការមន​ រាជធានី​ភ្នំពេញ​ នា​ថ្ងៃ​ទី​១៨​ខែវិច្ឆិកា​ឆ្នាំ​២០១០​តាម​សាល​ក្រមព្រហ្មទណ្ឌ​លេខ​១៨​កប​៥​ ចុះ​ថ្ងៃ​ទី​០១​ខែមេសា​ឆ្នាំ​២០១៣​ ។​ ​ស្រប​ពេល​នឹង​ការ​សម្រេច​ឱ្យ​ជនជាប់ចោទ​ឈ្មោះ​ He Ming Chai​ បាន​រួច​ផុត​ពី​បទចោទប្រកាន់​នេះ​ដែរ​ ក្រុមប្រឹក្សា​ជំនុំជម្រះ​បាន​សម្រេច​កែប្រែ​បទចោទប្រកាន់​លើ​ឈ្មោះ​Wu Wen Hsiang​ ហៅ​ ជែ​ ជា​ជនជាតិ​ចិន​ ពី​បទ​ឃាតកម្ម​គិត​ទុកជា​មុន​ ទៅ​ជា​បទ​មនុស្សឃាត​ដោយ​ចេតនា​វិញ​និង​ផ្ដន្ទាទោស​ដាក់​ពន្ធនាគារ​កំណត់​រយៈពេល​១៣​ឆ្នាំ​,​ កែប្រែ​បទចោទប្រកាន់​លើ​ឈ្មោះ​ Qian Yue Fei ជា​ជន​ជាតិចិន​ ពី​បទ​ឃាតកម្ម​គិត​ទុកជា​មុន​ ទៅ​ជា​បទ​សមគំនិត​ក្នុង​អំពើ​មនុស្សឃាត​ដោយ​ចេតនា​វិញ​ និង​ផ្ដន្ទាទោស​ដាក់​ពន្ធនាគារ​កំណត់​រយៈពេល​១១​ឆ្នាំ​ និង​កែប្រែ​បទ​ចោទប្រកាន់​លើ​ឈ្មោះ​ សយ​ សា​រិ​ន​ ជា​ជនជាតិ​ខ្មែរ​ ពី​បទ​សម​គំនិត​ក្នុង​អំពើ​ឃាតកម្ម​គិត​ទុកជា​មុន​ ទៅ​ជា​បទ​សមគំនិត​ក្នុង​អំពើ​មនុស្សឃាត​ដោយ​ចេតនា​វិញ​ និង​ផ្ដន្ទាទោស​ដាក់​ពន្ធនាគារ​កំណត់​ រយៈពេល​១១​ឆ្នាំ​ ។​ លើស​ពី​នេះ​ តុលាការ​ក៏​បាន​សម្រេច​បង្គាប់​ឱ្យ​ជនជាប់ចោទ​ឈ្មោះWu Wen Hsiang​ ហៅ​ជែ​,​ឈ្មោះ​ Qian Yue Fei និង​ឈ្មោះ​​​ សយ​ សា​រិ​ន​ រួម​គ្នា​សង​សំណង​រដ្ឋប្បវេណី​ចំនួន​៥០​លាន​រៀល​ឱ្យ​ដើមបណ្ដឹង​រដ្ឋប្បវេណី​ឈ្មោះ​ Cao Huiling និង​ចេញ​ដីកា​បង្គាប់​ឱ្យ​ចាប់​ខ្ល្ញួ​ន​ឈ្មោះ​ សយ​ សា​រិ​ន​ ។​

​លោក​មេធាវី​កៅ​ ស៊ូ​ផា​ ជា​មេ​ធា​វី​ការពារ​ក្ដី​ឱ្យឈ្មោះ​He Ming Chai ​បាន​មាន​ប្រសាសន៍​ប្រាប់​សារព័ត៌មាន​ដើម​ត្នោត​តាម​ទូរស័ព្ទ​នា​ថ្ងៃ​សុក្រ​ទី​០៥​ខែមេសា​ឆ្នាំ​២០១៣​ នេះ​ថា​ ការ​សម្រេច​របស់​ក្រុម​ប្រឹក្សា​ជំនុំជម្រះ​ដែល​ឱ្យ​កូនក្ដី​របស់​លោក​ឈ្មោះ​He Ming Chai បាន​រួច​ផុត​ពី​បទចោទប្រកាន់​ គឺជា​ការ​ត្រឹមត្រូវ​ហើយៗ​ក៏​មាន​ន័យ​ថា​ ការ​កាត់ក្ដី​មាន​យុត្ដិធម៌​ដែរ​ ពីព្រោះ​ក្នុង​សំណុំរឿង​នេះ​ គឺ​មិន​មាន​ព័ស្ដុ​តាង​ដាក់បន្ទុក​ទាល់តែ​សោះ​ទៅ​លើ​ឈ្មោះ​He Ming Chai​ ឱ្យ​មាន​ពិរុទ្ធ​ពី​បទ​សមគំនិត​ក្នុង​អំពើ​ឃាត​កម្ម​នោះ​ទេ​ ។​ ប៉ុន្ដែ​លោក​មាន​ការ​សោកស្ដាយ​ គឺ​ទំ​រាំ​កូនក្ដី​លោក​ឈ្មោះ​He Ming​ Chai ទទួល​បាន​យុត្ដិធម៌​វិញ​ ត្រូវ​បាន​ឃុំខ្លួន​នៅ​ក្នុង​ពន្ធនាគារ​ទាំង​អយុត្ដិធម៌​អស់​រយៈ​ពេល​ជាង​២​ឆ្នាំ​មក​ហើយ​ ខណៈ​ដែល​ជនជាប់ចោទ​ឯទៀត​រត់គេច​ខ្លួន​អស់​ ។​

​បុរស​ឈ្មោះ​He Ming Chai ជា​ជនជាតិ​ចិន​ត្រូវ​បាន​សមត្ថកិច្ច​ឃាត់ខ្លួន​នា​ថ្ងៃ​ទី​២១​ខែវិច្ឆិកា​ឆ្នាំ​២០១០​ និង​ត្រូវ​បាន​តុលាការ​សម្រេច​ឃុំខ្លួន​ដាក់​ពន្ធនាគារ​នា​ថ្ងៃ​ទី​២២​ខែវិច្ឆិកា​ឆ្នាំ​២០១០​ ក្រោម​ការ​ចោទប្រកាន់​ពី​បទ​សមគំនិត​ក្នុង​អំពើ​ឃាតកម្ម​គិត​ទុកជា​មុន​ទៅ​លើ​ឈ្មោះZou Jian Chang​ ប្រព្រឹត្ដ​នៅ​បន្ទប់​លេខ​៨០៥​ ជាន់​ទី​៨​នៃ​សណ្ឋាគារ​ណា​ហ្គា​វើ​ល​ ឋិត​នៅ​សង្កាត់​ទន្លេបាសាក់​ ខណ្ឌចំការមន​ រាជធានី​ភ្នំពេញ​ កាលពី​ថ្ងៃ​ទី​១៨​ ខែវិច្ឆិកា​ឆ្នាំ​២០១០​ ដែល​ការ​ចោទ​ប្រកាន់​នេះ​ត្រូវ​បាន​មជ្ឈដ្ឋាន​អ្នក​ច្បាប់​ឯករាជ្យ​ធ្វើការ​រិះគន់​ថា​ ជា​ការ​ចោទប្រកាន់​ដោយ​អយុត្ដិធម៌​ គ្មាន​ព័ស្ដុតាង​(​អាន​សារព័ត៌មាន​ដើម​ត្នោត​លេខ​១៧៥​បន្ថែម​)​​ ៕

 

Filed in: ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.