ថ្ងៃ អង្គារ ទី ២១ ខែ វិច្ឆិកា ឆ្នាំ ២០១៧

ផ្កាយ​២​ប៉ូលិស​ដែល​អតីត​ជា​ម្ចាស់​រថយន្ត​ទំនើប​ធ្លាក់​ក្នុង​ដៃ​ឧក្រិដ្ឋជន​គ្រឿងញៀន​ ត្រូវ​បាន​ដកហូត​តំណែង​

​លោក​ឧត្តមសេនីយ៍ទោ​ រស់​ ឧស្សាហ៍​ អតីត​ជា​អគ្គាធិការ​រង​នៃ​អគ្គាធិការដ្ឋាន​កិច្ចការ​នយោបាយ​ រដ្ឋបាល​ និង​នគរបាល​ក្រសួងមហាផ្ទៃ​ និង​អតីត​ជា​ម្ចាស់​រថយន្ត​ទំនើប​មួយ​គ្រឿង​ម៉ាក​ Audi​ ពណ៌​ស​ ពាក់​ស្លាក​លេខ​នគរបាល​ 2-0621​ ដែល​ធ្លាក់​ទៅ​ដល់​ក្នុង​ដៃ​ក្រុម​ឧក្រិដ្ឋជន​គ្រឿងញៀន​ ដែល​កម្លាំង​សមត្ថកិច្ច​កងរាជអាវុធហត្ថ​បង្ក្រាប​បាន​កាលពី​ថ្ងៃ​ទី​២៧​ ខែមេសា​ ឆ្នាំ​២០១៦​កន្លង​ទៅ​ នៅ​ត្រង់​ចំណុច​ផ្ទះ​លេខ​៣៧​ ផ្លូវ​លេខ​៣៥១​ សង្កាត់​បឹង​កក់​ទី​១​ ខណ្ឌទួលគោក​ រាជធានី​ភ្នំពេញ​ រហូត​បង្ក​ឲ្យ​មន្ត្រី​កងរាជអាវុធហត្ថ​ម្នាក់​ពលី​ជីវិត​នោះ​ ត្រូវ​បាន​រាជរដ្ឋាភិបាល​ដកហូត​តំណែង​ពី​អគ្គាធិការ​រង​នៃ​អគ្គាធិការដ្ឋាន​កិច្ចការ​នយោបាយ​ រដ្ឋបាល​ និង​នគរបាល​ក្រសួងមហាផ្ទៃ​ជា​ស្ថាពរ​ហើយ​ ដោយ​អនុក្រឹត្យ​លេខ​១១៣១​អន​ក្រ​.​ត​ត​ ចុះ​ថ្ងៃ​ទី​១៧​ ខែវិច្ឆិកា​ ឆ្នាំ​២០១៦​ តាម​សំណើ​របស់​សម្តេច​ក្រឡាហោម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ ។​

​លោក​ឧត្តមសេនីយ៍​ រស់​ ឧស្សាហ៍​ នាយ​នគរបាល​ជាតិ​ថ្នាក់ឧត្តម​សេនីយ៍​នៃ​ក្រសួងមហាផ្ទៃ​ អត្តលេខ​៦៥៨៨៨​ ទទួល​បានការ​តែងតាំង​ជា​អគ្គាធិការ​រង​នៃ​អគ្គាធិការដ្ឋាន​កិច្ចការ​នយោបាយ​ រដ្ឋបាល​ និង​នគរបាល​ក្រសួងមហាផ្ទៃ​ តាំងពី​នៅ​មាន​ឋានន្តរស័ក្តិ​ថ្នាក់​ឧត្តមសេនីយ៍ត្រី​(​ផ្កាយ​១)​មក​ម្ល៉េះ​ ដោយ​អនុក្រឹត្យ​របស់​រាជរដ្ឋាភិបាល​លេខ​២២១​អន​ក្រ​.​ត​ត​ ចុះ​ថ្ងៃ​ទី​២៥​ ខែកុម្ភៈ​ ឆ្នាំ​២០១៥​ ។​ ក្រោយមក​ លោក​ឧត្តមសេនីយ៍​ រស់​ ឧស្សាហ៍​ ក៏​ទទួល​បានការ​ដំឡើង​ឋានន្តរស័ក្តិ​ថ្នាក់​ឧត្តមសេនីយ៍ទោ​(​ផ្កាយ​២)​ ដោយ​ព្រះរាជក្រឹត្យ​លេខ​ន​ស​/​រក​ត​/០៣១៥/១៧៧​ ចុះ​ថ្ងៃ​ទី​០២​ ខែមីនា​ ឆ្នាំ​២០១៥​ ។​

​រថយន្ត​ទំនើប​មួយ​គ្រឿង​ម៉ាក​ Audi​ ពណ៌​ស​ ពាក់​ស្លាក​លេខ​នគរបាល​ 2-0621​ ព្រមទាំង​មាន​បិទ​ស្លាក​សញ្ញា​នគរបាល​ផង​ ត្រូវ​សមត្ថកិច្ច​រឹបអូស​បាន​កាលពី​ថ្ងៃ​ទី​២៧​ ខែមេសា​ ឆ្នាំ​២០១៦​ ក្នុង​បេសកកម្ម​បង្ក្រាប​គ្រឿងញៀន​ដ៏​កក្រើក​មួយ​នៅ​ខណ្ឌទួលគោក​ រាជធានី​ភ្នំពេញ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.