ថ្ងៃ ព្រហស្បតិ៍ ទី ២៤ ខែ កក្កដា ឆ្នាំ 2014
4

ទីតាំង​នយោបាយ​សម្រាប់​ឯកឧត្តម​ សម​ រ​ង្ស៊ី​

​ថ្វី​ដ្បិត​គណបក្ស​សង្គ្រោះ​ជាតិ​ទទួល​បាន​អាសនៈ​នៅ​ក្នុង​រដ្ឋសភា​នីតិកាល​ទី​៥​ "២០១៣-២០១៨"​ចំនួន​៥៥​អាសនៈ​ ឬ​មាន​បេក្ខជន​ជាប់​ឆ្នោត​ជា​អ្នកតំណាង​រាស្ត្រ​ចំនួន​៥៥​រូប​ តាម​ការ​ប្រកាស​លទ្ធផល​ឆ្នោត​ផ្លូវការ​ដោយ​គណៈកម្មាធិការ​ជាតិ​រៀបចំ​ការ​បោះ​ឆ្នោត​ "​គ​.​ជ​.​ប​"​ ក៏​ដោយ​ ក៏​ឯកឧត្តម​ សម​ រ​ង្ស៊ី​ ក្នុង​នាម​ជា​ប្រធាន​គណបក្ស​ដ៏​មាន​ប្រជាប្រិយភាព​ទាំងមូល​ មិន​មានឈ្មោះ​ជាប់​ជា​អ្នកតំណាង​រាស្ត្រ​នីតិកាល​ថ្មី​នេះ​ទេ​ ។​

បន្ទាប់​ពី​ទទួល​បានការ​លើកលែងទោស​ដោយ​ព្រះមហាក្សត្រ​តាម​សេចក្តី​ទូល​ថ្វាយ​ស្នើ​សុំ​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ដែល​ជា​បុរស​ខ្លាំង​នៃ​កម្ពុជា​ នា​ថ្ងៃ​ទី​១២​ ខែកក្កដា​ ឆ្នាំ​២០១៣​ និង​បាន​ធ្វើ​មាតុភូមិនិវត្តន៍​មក​ដល់​ព្រះរាជាណាចក្រ​កម្ពុជា​វិញ​ កាលពី​ថ្ងៃ​ទី​១៩​ ខែកក្កដា​ ឆ្នាំ​២០១៣​រួច​មក​ ឯកឧត្តម​ សម​ រ​ង្ស៊ី​ បាន​ខិតខំ​ប្រឹងប្រែង​យ៉ាង​ខ្លាំង​ដើម្បី​ទាមទារ​ឲ្យ​មានការ​ដាក់​បញ្ចូល​ឈ្មោះ​ឯកឧត្តម​ក្នុង​បញ្ជី​ផ្លូវការ​បេក្ខជន​ឈរឈ្មោះ​បោះ​ឆ្នោត​នៅ​មណ្ឌល​ខេត្តកណ្តាល​ និង​ស្នើ​សុំ​អភ័យឯកសិទ្ធិ​ និង​បុព្វសិទ្ធិ​ជា​តំណាងរាស្ត្រ​របស់​ឯកឧត្តម​ដែល​បាន​បាត់បង់​មក​ឡើង​វិញ​ ប៉ុន្តែ​ត្រូវ​បាន​ច្រានចោល​ជា​បន្តបន្ទាប់​ដោយ​ គ​.​ជ​.​ប​ រដ្ឋសភា​ និង​ក្រុមប្រឹក្សាធម្មនុញ្ញ​ ។​

​តាម​រយៈ​នៃ​ការ​ខិតខំ​ប្រឹងប្រែង​ឈ្មុសឈ្មុល​នេះ​ បាន​សបញ្ជាក់​ឲ្យ​ឃើញ​ថា​ មិនមែន​ឯកឧត្តម​ សម​ រ​ង្ស៊ី​ ក្នុង​នាម​ជា​ប្រធាន​គណបក្ស​សង្គ្រោះ​ជាតិ​ទាំងមូល​មិន​ចង់​ឈរឈ្មោះ​ជា​បេក្ខជន​តំណាងរាស្ត្រ​ ឬ​បាន​ជាប់​ឆ្នោត​ជា​អ្នកតំណាង​រាស្ត្រ​នោះ​ទេ​ គឺ​ចង់​ណាស់​ ប៉ុន្តែ​មិន​មានឱកាស​ទទួល​បាន​ ។​ ​

ដូច្នេះ​ ប្រសិនបើ​គណបក្ស​សង្គ្រោះ​ជាតិ​ដើរតួ​ធ្វើ​ជា​គណបក្ស​នយោបាយ​ប្រឆាំង​នៅ​ក្នុង​រដ្ឋសភា​ គឺ​ឯកឧត្តម​ សម​ រ​ង្ស៊ី​ គ្មាន​ឈ្មោះ​ជា​អ្នកតំណាង​រាស្ត្រ​ទេ​ បាន​ត្រឹម​មានឈ្មោះ​ជា​ប្រធាន​គណបក្ស​ប៉ុណ្ណោះ​ ។​ ផ្ទុយ​ទៅ​វិញ​ បើ​គណបក្ស​សង្គ្រោះ​ជាតិ​ព្រមព្រៀង​ធ្វើ​រាជរដ្ឋាភិបាល​ចម្រុះ​ជាមួយ​គណបក្ស​ប្រជាជន​កម្ពុជា​ ជា​គណបក្ស​នយោបាយ​កាន់កាប់​អំណាច​ គឺ​ឯកឧត្តម​ សម​ រ​ង្ស៊ី​ ក៏​ពិបាក​នឹង​ទទួល​បាន​មុខ​តំណែង​ធំដុំ​ក្នុង​ជួរ​រាជរដ្ឋាភិបាល​ដល់​ថ្នាក់​ឧបនាយករដ្ឋមន្ត្រី​ ឲ្យ​ស័ក្តិសម​នឹង​ប្រជាប្រិយភាព​ និង​ចំណេះដឹង​របស់​ឯកឧត្តម​នោះ​ដែរ​ ពីព្រោះ​ឯកឧត្តម​ សម​ រ​ង្ស៊ី​ គ្មាន​ឈ្មោះ​ជាប់​ឆ្នោត​ជា​បេក្ខជន​តំណាងរាស្ត្រ​ ។​ ​

តើ​ទីតាំង​នយោបាយ​សម​ស្រប​ណាមួយ​ទៅ​សម្រាប់​ឯកឧត្តម​ សម​ រ​ង្ស៊ី​ បើ​សមាជិក​រដ្ឋសភា​ក៏​មិន​អាច​ និង​សមាជិក​រាជរដ្ឋាភិបាល​ក៏​មិន​អាច​ ?

​មជ្ឈដ្ឋាន​អ្នក​ច្បាប់​និង​អ្នក​តាមដាន​ព្រឹតិការណ៍​នយោបាយ​នៅ​កម្ពុជា​ បាន​លើក​ឡើង​ថា​ រឿង​ធ្វើ​ជា​អ្នកតំណាង​រាស្ត្រ​សម្រាប់​ឯកឧត្តម​ សម​ រ​ង្ស៊ី​ គឺ​ហួសពេល​ហើយ​ ដ្បិត​ឯកឧត្តម​ សម​ រ​ង្ស៊ី​ មិន​មានឈ្មោះ​ជា​បេក្ខជន​តំណាងរាស្ត្រ​ ប៉ុន្តែ​បើ​ធ្វើ​ជាទី​ប្រឹក្សា​រដ្ឋសភា​ ទីប្រឹក្សា​រាជរដ្ឋាភិបាល​ ឬ​ជា​ប្រធាន​ស្ថាប័ន​ផ្សេង​ទៀត​នឹង​អាច​ទៅ​រួច​ ប្រសិនបើ​ឯកឧត្តម​ សម​ រ​ង្ស៊ី​ ចង់​ និង​យល់ព្រម​ និង​ក្នុង​ករណី​ភាគី​គណបក្ស​ប្រជាជន​កម្ពុជា​សម្បទាន​បាន​ ។​ មាន​ន័យ​ថា​ ទីតាំង​នយោបាយ​សម្រាប់​ឯកឧត្តម​ សម​ រ​ង្ស៊ី​ ត្រូវ​តែ​មានការ​ពាក់ព័ន្ធ​នឹង​គណបក្ស​ប្រជាជន​កម្ពុជា​ជា​ដាច់ខាត​ ដោយ​មិន​អាច​មើល​រំលង​បាន​ឡើយ​ វៀរលែងតែ​ឯកឧត្តម​ សម​ រ​ង្ស៊ី​ ចង់​ធ្វើ​ត្រឹម​ប្រធាន​គណបក្ស​សង្គ្រោះ​ជាតិ​មួយ​មុខ​គត់​ ។​

​ក្រុម​អ្នកវិភាគ​នយោបាយ​ឯករាជ្យ​នៅ​កម្ពុជា​ បាន​លើក​ឡើង​ថា​ ក្នុង​ករណី​ឯកឧត្តម​ សម​ រ​ង្ស៊ី​ មិន​មានឈ្មោះ​ជា​សមាជិក​រដ្ឋសភា​ក៏​ដោយ​ ក៏​ក្នុង​នាម​ជា​ប្រធាន​គណបក្ស​នយោបាយ​ប្រឆាំង​ដ៏​ធំ​ទាំងមូល​ ក៏​អាច​ជួយ​ជាតិ​ និង​ប្រជាពលរដ្ឋ​បាន​ដែរ​ តាម​រយៈ​យន្តការ​នៃ​ការ​ឃ្លាំមើល​ និង​ការ​រិះគន់​ស្ថាបនា​ ដែល​ការ​រិះគន់​នេះ​នឹង​មិន​មាន​ភាព​ទើសទាល់​ទៀត​ផង​ ។​ លើស​ពី​នេះ​ ឯកឧត្តម​ សម​ រ​ង្ស៊ី​ អាច​នឹង​ជាប់​ឈ្មោះ​ជា​វីរបុរស​គណបក្ស​សង្គ្រោះ​ជាតិ​ និង​ក្នុង​ដួងចិត្ត​ប្រជាពលរដ្ឋ​ជា​ម្ចាស់​ឆ្នោត​ជា​ច្រើន​លាន​នាក់​ ដោយសារ​តែ​ឯកឧត្តម​ធ្វើ​នយោបាយ​មិន​យក​លាភសក្ការៈ​ និង​បុណ្យស័ក្តិ​ជា​ត្រីមុខ​ ៕​

DSC02212

Filed in: Feature, ព័ត៌មានជាតិ

4 Responses to "ទីតាំង​នយោបាយ​សម្រាប់​ឯកឧត្តម​ សម​ រ​ង្ស៊ី​"

  1. De Vea says:

    ពិតជាត្រឹមត្រូវ។ ធ្វើនយោបាយដើម្បីជាតិ មិនមែនដើម្បីបុគ្គលខ្លួន ពិតជាពុំចាំបាច់ត្រូវការបុណ្យសក្ដិនោះ​ទេ ត្រឹមជាប្រធានគណបក្សមួយនោះវាគ្រប់គ្រាន់ណាស់ទៅហើយ ។ ហើយត្រូវខិតខំប្រឹងប្រែង ដើម្បីនៅ​អាណត្តិបន្តបន្ទាប់ខាងមុខនឹងទទួលបានជោគជ័យ មានអំណាចគ្រប់គ្រាន់ដឹកនាំប្រទេសជាតិ​ទាំងមូលតែម្ដង។ ផ្ទុយទៅវិញ បើរវល់គិតពីអំណាច ឧត្ដមគតិដ៏ល្អរបស់ខ្លួន នឹងត្រូវបានបែកជាមិនខាន។

  2. SEN SOK says:

    He is my hero and always in my heart. All Khmer leadership should do something good beyond your life! If I have a good chance like all of you I will do the best for my NATION!

  3. sankongborom says:

    why not co-president of nec? chairman of anti corruption unit? ect.

  4. Chea Touch says:

                                                   TO ALL CAMBODIAN IN CAMBODIA                                                                    PLEASE MAKE YOUR JUDMENT BETWEN  Mr SAM RANSY AND Mr HUN SEN   WHO IS THE GOOD LEADER FOR OUR NATION.WHO HAS KHNOWLAGE AND ABILITY TO RUNN THE COUNTRY. DEMONCRACY IS THE WAY FOR THIS NATION  . DIGNITY, FREEDOM, PEACE FOR OUR NATION.. THANK YOU                              

Leave a Reply

Submit Comment

Recent Posts

© ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 015 745 215 E-mail ៖ deumtnotnews@gmail.com
ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
Proudly designed by Theme Junkie.